ក្រសួងអប់រំ៖ មានតែខេត្តចំនួន ០៤ប៉ុណ្ណោះ ដែលត្រូវបានអនុញ្ញាតឱ្យបើកសាលារៀនឡើងវិញ

មានតែសាលារៀនក្នុងខេត្តចំនួន ៤ប៉ុណ្ណោះ ដែលត្រូវបានអនុញ្ញាតឲ្យបើកសាលារៀនឡើងវិញចាប់ពីថ្នាក់ទី០១ ដល់ទី១២ គឺខេត្តក្រចេះ ស្ទឹងត្រែង រតនគិរី និងមណ្ឌលគិរី ប៉ុន្តែសម្រាប់តែសាលាដែលស្ថិតនៅក្នុងទីរួមខេត្តតែប៉ុណ្ណោះ។ នេះបើតាមការឲ្យដឹងពី អ្នកនាំពាក្យក្រសួងអប់រំ។

ការអនុញ្ញាតចំពោះខេត្តទាំង ៤នេះ ដោយសារជាខេត្តដែលមានហានិភ័យឆ្លងកូវីដ-១៩ កម្រិតទាប។ ចំណែកសាលារៀនក្នុងខេត្តផ្សេងៗ គឺក្រសួងបានអនុញ្ញតឲ្យថ្នាក់ទី៩ និងទី១២ អាចចូលរៀនវិញបានធម្មតា ប៉ុន្តែត្រូវគោរពគោលការណ៍សុវត្ថិភាព ដោយមួយថ្នាក់មានសិស្សតែ ១៥ ទៅ ២០នាក់ប៉ុណ្ណោះ ព្រមទាំអមានការត្រួតពិនិត្យផ្សេងៗទៀតផងដែរ។

ទោះយ៉ាងណា ខេត្តចំនួន៤ ខាងលើត្រូវគោរពគោលការណ៍របស់ក្រសួងអប់រំ និងក្រសួងសុខាភិបាលយ៉ាងខ្ជាប់ខ្ជួនបំផុត ដើម្បីការពារពីការឆ្លងរីករាលដាលនៃជំងឺកូវីដ១៩ ពិសេសគឺកុមារតែម្ដង ដោយសាលាត្រូវពិនិត្យ និងតាមដានគ្រប់សកម្មភាពទាំងអស់របស់សិស្ស។

សូមរំលឹកថា សាលារៀននៅទូទាំងប្រទេសកម្ពុជា ត្រូវបានបិទកាលពីថ្ងៃទី១៦ ខែមីនា ឆ្នាំ២០២០ បន្ទាប់ពីកម្ពុជាមានការឆ្លងរីករាលដាលកូវីដ១៩ ចូលមកក្នុងប្រទេសតាមរយៈជនជាតិជប៉ុនម្នាក់ ដែលបានប៉ះពាល់ចាមួយបុរសម្នាក់ក្នុងខេត្តសៀមរាប។

អត្ថបទដោយ៖ Nevin