ជាទូទៅ មានមនុស្សមួយចំនួនធំ តែងតែឆ្ងល់ថា មិចបានពេលខ្ឡះ ពួកគេជួបតែរឿងស៊យ ឬរឿងស្មុគស្មាញរហូត ដល់ពេញមួយថ្ងៃ? រឿងទាំងអស់នេះមិនមែនជារឿងចៃដន្យទេ គឺសុទ្ធតែមានហេតុនិងផល។ សូមចាំថា រឿងដែលកើតឡើង មិនមែនកើតដោយសារអ្វីផ្សេងពីក្រៅមកឡើយ តែវាកើតឡើងចេញពីខ្លួនឯងផ្ទាល់តែម្ដង។ ប្រសិនបើយើងមិនចេះគ្រប់គ្រងខ្លួនឯងបានល្អ ពិតណាស់អ្នកនឹងជួបតែរឿងអពមង្គល ឬរាសីចុះយ៉ាងត្រដែត។ ចំណុចសំខាន់បំផុតសម្រាប់អ្នក ត្រូវធ្វើឱ្យអារម្មណ៍ល្អជានិច្ច ពេលក្រោកពីដំណេក ត្រូវងើបឱ្យរហ័សរហួន បើកបង្អួចឱ្យមានខ្យល់ចេញចូល ហើយស្រូបខ្យល់អាកាសពេលព្រឹកដោយធ្វើចិត្តឱ្យស្រស់ស្រាយ ញញឹមទទួលថ្ងៃថ្មី។
ម៉្យាងវិញទៀត ប្រសិនបើពេលព្រឹកឡើង អ្នកមានបញ្ហា ឬមានអ្វីមួយ ដែលធ្វើឱ្យអ្នកមានអារម្មណ៍មិនល្អ សូមកុំឱ្យអារម្មណ៍នោះទៅតាមរឿងទាំងនោះឱ្យសោះ (បើមិនដូច្នោះទេ អ្នកនឹងជួបបញ្ហាពេញមួយថ្ងៃតែម្ដង) ត្រូវតែសម្រួលអារម្មណ៍ឱ្យបានលឿនតាមដែលអាចធ្វើបាន ហើយធ្វើការដោះស្រាយដោយវៃឆ្លាត។ ការបណ្ដោយអារម្មណ៍ គឺប្រៀបដូចជាអ្នកកំពុងទាញ យកនូវបញ្ហាផ្សេងៗទៀតឱ្យមករកអ្នកកាន់តែច្រើនទៅៗ ព្រោះកំហឹង ការធុញទ្រាន់ ភាពស្មុគស្មាញ មានឥទ្ធិពលខ្លាំងណាស់។ យើងទទួលស្គាល់ថាការគ្រប់គ្រងខ្លួនឯងជាពិសេសគ្រប់គ្រងអារម្មណ៍ពិតជាពិបាក ប៉ុន្ដែសូមធ្វើការព្យាយាមបន្ដិចម្ដងៗ។
អត្ថបទដោយ៖ ពិសី