លោកជំទាវ ជា សេរី ឧបការីទេសាភិបាល និងជាអគ្គនាយកបច្ចេកទេស នៃធនាគារជាតិនៃកម្ពុជាបានឲ្យដឹងថា ធនាគារជាតិបានប្រកាសចេញកញ្ចប់ថវិកាប្រមាណ ២ពាន់លានដុល្លារដើម្បីដោះស្រាយផលប៉ះពាល់នៃ COVID-19 ។ នេះបើតាមកិច្ចសម្ភាសន៍រវាងលោកជំទាវ ជាមួយសារព័ត៌មានពិភពលោកមួយ។
លោកជំទាវក៏បានប្រាប់បន្ថែមតាមរយៈបណ្ដាញសង្គម Instagram ទៀតថា កម្ពុជា និងបណ្ដាប្រទេសជាច្រើន គឺមិនបានត្រៀមខ្លួនជាមុននោះទេ សម្រាប់ផលប៉ះពាល់យ៉ាងខ្លាំងមកលើវិស័យទេសចរណ៍ ដោយសារតែការរីករាលដាលនៃ COVID-19 នេះ។ ប៉ុន្តែកម្ពុជាបានដឹងហើយថា នឹងមានផលប៉ះពាល់មកលើវិស័យកាត់ដេរ ហើយរដ្ឋាភិបាល និងធនាគារជាតិបានត្រៀមខ្លួនរួចជាស្រេចសម្រាប់បញ្ហានេះ។
គូសបញ្ជាក់ផងដែរថា ការរីករាលដាលនៃជំងឺ COVID-19 បានធ្វើឲ្យប៉ះពាល់ដល់វិស័យជាច្រើននៅទូទាំងពិភពលោក ជាពិសេសគឺវិស័យទេសចរណ៍ ហើយកម្ពុជាយើងក៏បានរងផលប៉ះពាល់ខ្លាំងគួរសមដែរមកលើវិស័យនេះ ដែលបានធ្វើឲ្យសណ្ឋាគារ និងផ្ទះសំណាក់រាប់រយកន្លែងបានប្រកាសបិទទ្វា និងខ្លះទៀតបានប្រកាសផ្អាកជាបណ្ដោះអាសន្ន។
អត្ថបទដោយ៖ Nevin
ប្រភព៖ ក្នុងស្រុក
