កោះកុង៖ កោះកុងគឺជាខេត្ដមួយ ដែលមានទីតាំងឆ្ងាយហើយមានលក្ខណៈដាច់ស្រយាលបន្ដិចពីទីក្រុងភ្នំពេញ ហើយខេត្ដនេះក៏មានប្រជាជនមិនសូវច្រើននោះទេ។ ប៉ុន្ដែខេត្ដនេះ ក៏នៅមានលក្ខណៈពិសេសរបស់ខ្លួនឯងដែរ ទាំងតំបន់វិស័យសេដ្ឋកិច្ចឧស្សាហកម្ម វិស័យទេសចរណ៍ និងវិស័យទំនាក់ទំនងអន្ដរជាតិ ក៏មានបើធៀបទៅនឹងខេត្ដដទៃ គឺមិនអន់ជាងប៉ុន្មាននោះទេ។
ស្របនឹងគម្រោងអភិវឌ្ឈន៍របស់ រាជរដ្ឋាភិបាលកម្ពុជា លើផ្នែកហេដ្ឋារចនាសម្ពន្ធដឹកជញ្ជូន ទាំងផ្លូវគោក នឹងផ្លូវអាកាស កោះកុងអាចនឹងកំពុងតែត្រូវបាន អ្នកវិនិយោគទុន ចាប់អារម្មណ៍ក្នុងគម្រោងឆ្នាំថ្មីនេះ។ ៦ចំណុចខាងក្រោមនេះ អាចជាសក្ដានុពល ធ្វើឲ្យអ្នកវិនិយោគចាប់អារម្មណ៍ ខេត្ដកោះកុង៖
១.គម្រោងអភិវឌ្ឈព្រលានយន្ដហោះ
ខេត្ដកោះកុង ត្រូវបានរដ្ឋាភិបាល សម្រេចចេញនូវគម្រោងអភិវឌ្ឈន៍ ព្រលានយន្ដហោះថ្មី កាលពីពាក់កណ្ដាលខែ មករា ក្រោមទំហំទឹកប្រាក់វិនិយោគប្រមាណជា ៤០លានដុល្លារដែលស្ថិតនៅក្នុងភូមិកោះប៉ោ ឃុំប៉ាក់ខ្លង ស្រុកមណ្ឌលសីមា ខេត្តកោះកុង។
២.គម្រោងអភិវឌ្ឈផ្លូវជាតិលេខ៤៨
រាជរដ្ឋាភិបាលកម្ពុជា បានដាក់ចេញនូវគម្រោង អភិវឌ្ឈន៍បន្ថែម នូវកំណាត់ផ្លូវ ៤៨ តភ្ជាប់ចេញពីផ្លូវជាតិលេខ៤ទៅកាន់ទីរួមខេត្តកោះកុង។ គម្រោងអភិវឌ្ឈន៍ផ្លូវជាតិលេខ៤៨នេះ ត្រូវបានប្រកាសដោយសម្តេចតេជោ ហ៊ុន សែន ក្នុងឱកាសពិធីបុណ្យសមុទ្រកាលពីចុងឆ្នាំមុន។
៣- គម្រោង អភិវឌ្ឈន៍កំណាត់ផ្លូវពីស្រុកសំឡូតខេត្តបាត់ទៅកាន់ខេត្តកោះកុង ឆ្លងកាត់ពោធិ៍សាត់
សម្តេចតេជោ ហ៊ុន សែន ក៏បានបញ្ជាក់កាលពីព្រឹកមិញ អំពីគម្រោងអភិវឌ្ឈន៍ ផ្លូវនេះនឹងចាប់ផ្តើមនៅឆ្នាំ២០២០នេះហើយដែលមានប្រវែង ជាង ១៩០គីឡូម៉ែត្រ។
៤- គម្រោងអភិវឌ្ឈន៍កំពង់ផែទឹកជ្រៅនៅក្នុងខេត្តកោះកុង
កំពង់ផែអន្ដរជាតិ កំពុងតែស្ថិតក្នុងការសាងសង់ មកទល់ពេលនេះសម្រេចបានស្ទើតែ ៩០ភាគរយហើយ មិនត្រឹមតែប៉ុណ្ណោះ ក៏នៅមានកំពង់ផែឯកជនរបស់ក្រុមហ៊ុនលីយ៉ុងផាត់ (LYP Group) ក៏កំពុងសាងសង់នៅក្បែរនោះដែរ ។
៥- តំបន់ជាប់ព្រំប្រទល ប្រទេសថៃ
កោះកុងគឺជាខេត្ដដែលមានព្រំប្រទល់គៀកនឹងប្រទេសថៃ ដែលងាយស្រួល ក្នុងការ នាំចេញនាំចូល ទំនិញទៅវិញទៅមក។
៦. តំបន់ភូមិសាស្រ្ដ អាកាសធាតុ និង តំបន់ទេសចរណ៍ធម្មជាតិ
កោះកុង ក្រៅពីតំបន់ដែលមាន សក្ដានុពលខាង វិស័យសេដ្ឋកិច្ច ឧស្សាហកម្មទៅ ខេត្ដនេះ ក៏នៅមាន តំបន់ ទេសចរណ៍ធម្មជាតិច្រើនកន្លែងផងដែរ។ តំបន់ទេសចរធម្មជាតិ ជាច្រើនកន្លែងដែលស្ថិត នៅតំបន់ ជាប់ៗគ្នា តួយ៉ាងដូចជានៅតំបន់ អារ៉ែង តំបន់តាតៃជាដើម និងវាលសមុទ្រព្រៃឈើជាច្រើន នៅតំបន់ស្រុកថ្មបាំង។
អត្ថបទដោយ៖ អឿ អ៊ុយ
ប្រភព៖ ក្នុងស្រុក