យោងតាមគេហទំព័រ skyscrapercenter.com អគារជន្ទល់មេឃចំនួន ៣ នៅទីក្រុងភ្នំពេញ នឹងត្រូវសង់រួចនៅឆ្នាំ ២០២០ ខាងមុខនេះ។
អគារ MORGAN TOWER នឹងមាន ៤៦ ជាន់ ស្ថិតក្នុងកំពស់ ២១០ ម៉ែត្រ នឹងលេចចេញរូបរាងនៅលើកោះពេជ្រ នៅឆ្នាំក្រោយនេះ។ អគារនេះនឹងជាបណ្តុំការិយាល័យ សាលប្រជុំ សណ្ឋាគារ ភោជនីយដ្ឋាន និង Sky Bar នៅជាន់លើបំផុត។
អគារ MORGAN TOWER ត្រូវបាននិងកំពុងសង់ឡើង ដោយក្រុមហ៊ុន MORGAN ដែលមានបទពិសោធជាច្រើននៅក្នុងវិស័យសំណង់ ដោយបានសាងសង់អគារខ្ពស់ៗ និងទំនើបៗជាច្រើន នៅប្រទេសចិន ដូចជានៅទីក្រុងសៀងហៃ និងទីក្រុងឆេងឌូជាដើម។ ការសាងសង់អគារ MORGAN TOWER ត្រូវបានចាប់ផ្តើមឡើងនៅថ្ងៃទី ១៨ ខែ សីហា ឆ្នាំ ២០១៨ ។
អាគារ Sky Villa នឹងមានកំពស់ ៣៥ ជាន់ និងមានយូនីតសរុបចំនួន ២៥៦ ដែលកំពុងត្រូវសាងសង់ឡើង ដោយក្រុមហ៊ុន Crystal Orange Construction នៅតាមបណ្តោយមហាវិថីព្រះសីហនុ ក្រោមទុនវិនិយោគប្រហែលជា $100 លានដុល្លារ។
រចនាបថរបស់អគារ Sky Villa ត្រូវបានធ្វើឡើងដោយក្រុមហ៊ុន C.Y. Lee & Partners, Architects & Planners ដែលជាក្រុមហ៊ុនល្បីឈ្មោះមួយ នៅក្នុងពិភពលោក ដោយបានរចនាប្លង់របស់អគារ Taipei 101 នៅចិនតៃវ៉ាន់។
The Peak នឹងជាអគារពាណិជ្ជកម្មចំនួន ៣ ដ៏ខ្ពស់ជាងគេនៅរាជធានីភ្នពេញ ដែលនឹងមានកំពស់ ៥៥ ជាន់ ក្បែមាត់ទន្លេ នៅក្បែស្ពាននាគកោះពេជ្រ។
អគារនេះបាននិងកំពុងសាងសង់ឡើង ដោយក្រុមហ៊ុន Oxley-Gem (Cambodia) Co.,LTtd តាមរយៈការវិនិយោគទុនរបស់ក្រុមហ៊ុន Oxley International Holding Land Limited នៃប្រទេសសិង្ហបុរី។ ទុនវិនិយោគសំរាប់សំណង់នៃអគារ The Peak នេះ មានចំនួន $580 លានដុល្លារ។
នៅក្នុងអគារ The Peak នឹងមានសាខារបស់សណ្ឋាគារ The Shangri-La Hotel ដែលជាបណ្តាញសណ្ឋាគារអន្តរជាតិដ៏ល្បីឈ្មោះមួយនៅក្នុងពិភពលោក តាំងពីយូរយារណាស់មកហើយ។ មួយវិញទៀត ចំនួនយូនីតសរុបទាំងអស់នៅក្នុងគំរោង The Peak នឹងមានចំនួន ១០១៤ យូនីត៕