ដោយៈ ទិន សុខាវុធ
ស្ថានទូតជប៉ុនប្រចាំនៅកម្ពុជា បានសំរេចផ្តល់ហិរញ្ញប្បទានឥតសំណងចំនួនប្រមាណ $3.2 លានដុល្លារ អោយដល់កម្មវិធីស្បៀងអាហារពិភពលោក ហៅកាត់ថា WEP ក្នុងគោលបំណងចូលរួមចំណែកផ្តល់អាហារូបត្ថម្ភ ក្រោមរូបភាពជាអាហារពេលព្រឹក ដល់កុមារក្រីក្រនៅតាមសាលារៀននានា នៅក្នុងប្រទេសកម្ពុជា។
យោងតាមទំព័រ Facebook របស់ស្ថានទូតជប៉ុនប្រចាំនៅកម្ពុជា កាលពីថ្ងៃទី ១៧ ខែ តុលា ឆ្នាំ ២០១៩ កន្លងទៅនេះ ឯកឧត្តម MIKAMI Masahiro ឯកអគ្គរាជទូតវិសាមញ្ញនិងពេញសមត្ថភាព នៃប្រទេសជប៉ុនប្រចាំព្រះរាជាណាចក្រកម្ពុជា បានចុះហត្ថលេខាជាមួយនឹងលោកស្រី Francesca ERDELMANN នាយិកាកម្មវិធីស្បៀងអាហារពិភពលោក (WFP) ប្រចាំប្រទេសកម្ពុជា ក្នុងគោលបំណងផ្តល់ហិរញ្ញប្បទានឥតសំណង គិតជាទឹកប្រមាណជា $3.2 លានដុល្លារនេះ ដើម្បីរួមចំណែកក្នុងការផ្តល់អាហារូបត្ថម្ភ អោយដល់កុមារក្រីក្រ នៅតាមសាលារៀននានានៅក្នុងប្រទេសកម្ពុជា ក្រោមរូបភាពជាអាហារពេលព្រឹក។
នៅក្នុងពិធីចុះហត្ថលេខ លោកឯកអគ្គរាជទូតបានលើកឡើងថា គំរោងនេះនឹងមិនត្រឹមតែចូលរួមចំណែកលើកកំពស់សុខភាពរប់សកុមារកម្ពុជាតែប៉ុណ្ណោះទេ វានឹងធ្វើអោយកមារកម្ពុជាក្រីក្រទាំងឡាយ អាចចមានសមត្ថភាពទទួលបានការអប់រំ ដូចជាកុមារដទៃទៀតដែរ។
លើសពីនេះទៀត គំរោងនេះនឹងចូលរួមផងដែរក្នុងការរឹតចំណងមិត្តភាព រវាងប្រទេសជប៉ុននិងប្រទេសកម្ពុជា អោយបានកាន់តែរឹងមាំថែមទៀត។
«[…] Japan’s assistance will contribute to improving not only children’s health but also their access to school education. I sincerely hope that our assistance will be effectively used to secure a better future for children,» នេះជាការលើកឡើងរបស់ឯកអគ្គរាជទូតជប៉ុន នៅក្នុងសន្ទរកថារបស់លោក។
លោកទូតជប៉ុនក៏បានលើកឡើងផងដែរថា ថវិកាប្រមាណ $3.2 លានដុល្លារនេះ នឹងត្រូវ WEP យកទៅប្រើប្រាស់សំរាប់ទិញត្រីខកំប៉ុងប្រមាណជា ៤១៥ កំប៉ុង សំរាប់ចែកជូនដល់កុមារក្រីក្រនៅតាមសាលារៀននានា។
ទន្ទឹមនឹងនេះ លោកទូតជប៉ុនក៏បានគូសបញ្ជាក់ផងដែរថា កន្លងមកនេះ សេដ្ឋកិច្ចកម្ពុជាមានការរីកចំរើនយ៉ាងខ្លាំងដ៏គួរអោយកត់សំគាល់ ដែលជាកត្តាធ្វើអោយអត្រានៃភាពក្រីក្របានចុះថយយ៉ាងលឿនជាទីបំផុត។ ក៏ប៉ុន្តែទោះជាយ៉ាងក៏ដោយ ក៏ប្រជាពលរដ្ឋកម្ពុជារស់នៅតាមតំបន់ជនបទមួយចំនួន នៅតែជួបនឹងបញ្ហាកង្វះអាហារូបត្ថម្ភ៕