ក្រុមហ៊ុនហ្វេសប៊ុកមានការមិនពេញចិត្តជាមួយមុខងារក្រើនរំឭកថ្មី ដែលទាក់ទងនឹងការទាញយកទិន្នន័យ

ដោយ៖រដ្ឋ ស្រីពេជ្រ

បើតាមនាយកដ្ឋានប្រឆាំងបទល្មើសបច្ចេកវិទ្យា បានឱ្យដឹងថា នៅពេលដែលក្រុមហ៊ុន Apple បានដាក់ឱ្យប្រើប្រាស់ប្រព័ន្ធប្រតិបត្តិការជំនាន់ថ្មី iOS 14 កាលពីខែកញ្ញាកន្លងទៅ ក្រុមហ៊ុនបានបន្ថែមមុខងារថ្មីៗជាច្រើនដើម្បីឱ្យការប្រើប្រាស់ទូរសព្ទកាន់តែមានភាពល្អប្រសើរឡើង។ ក្នុងចំណោមមុខងារថ្មីៗទាំងនោះមានតែមុខងារមួយប៉ុណ្ណោះដែលធ្វើឱ្យក្រុមហ៊ុនផ្សព្វផ្សាយពាណិជ្ជកម្ម ជាពិសេសក្រុមហ៊ុនហ្វេសប៊ុកកើតទុក្ខមិនសុខចិត្ត ព្រោះវាអាចធ្វើឱ្យកាន់តែមានការលំបាកក្នុងការទាញយកទិន្នន័យឯកជនភាពរបស់អ្នកប្រើប្រាស់។

ជាមួយមុខងារថ្មីនេះក្រុមហ៊ុន Apple បានទាមទារឱ្យអ្នកអភិវឌ្ឍកម្មវិធីបន្ថែមមុខងារក្រើនរំឭក (prompt) ទាក់ទងនឹងការទាញយកទិន្នន័យឯកជនភាពរបស់អ្នកប្រើប្រាស់មិនត្រឹមតែប៉ុណ្ណោះលោកអ្នកប្រហែលជាអាចបិទកុំឱ្យមានការទាញយកបានផងដែរ។ កាលពីម្សិលមិញនេះ ក្រុមហ៊ុនហ្វេសប៊ុកបានធ្វើការផ្សព្វផ្សាយរិះគន់ក្រុមហ៊ុន Apple ខ្លាំងៗ ដោយចោទប្រកាន់ថាមុខងារថ្មីនេះគឺមិនមែនដើម្បីសម្រាប់ការពារទិន្នន័យឯកជនភាពនោះទេ ផ្ទុយទៅវិញគឺវាដើម្បីឱ្យក្រុមហ៊ុន Apple ទាញយកផលចំណេញតែប៉ុណ្ណោះ។

គួរបញ្ជាក់ផងដែរថា កាលពីដើមសប្តាហ៍នេះក្រុមហ៊ុន Mozilla ដែលជាក្រុមហ៊ុនបង្កើតកម្មវិធី web browser Firefox បានចេញសេចក្ដីរាយការណ៍គាំទ្រក្រុមហ៊ុន Apple ដែលបានបន្ថែមមុខងារនេះ ព្រោះការទាញយកទិន្នន័យឯកជនភាពរបស់អ្នកប្រើប្រាស់នាពេលបច្ចុប្បន្នគឺវាមានច្រើនលើសលប់ ដោយអ្នកប្រើប្រាស់ជាច្រើនពុំបានដឹងទេថាទិន្នន័យរបស់ពួកគេកំពុងតែត្រូវបានទាញយក។ ជាងនេះទៅទៀតអ្នកប្រើប្រាស់ក៏ពុំបានដឹង ថាតើក្រុមហ៊ុនណាខ្លះដែលបានទិញយកទិន្នន័យទាំងនោះ៕