ដោយៈ ទិន សុខាវុធ
លំនៅដ្ឋាននិងអគារពាណិជ្ជកម្មផ្សេងៗរបស់គំរោងសំណង់ទីក្រុងលំហែកាយបែបទំនើប Crystalville Ream Beach នឹងត្រូវដាក់លក់អោយអថិជន ចាប់ពីខែមករាឆ្នាំ ២០២០ ខាងមុខនេះ។
កញ្ញាលីម សុខាដាវីន នាយិកាផ្នែកលក់នៃគំរោង Crystalville Ream Beach បានថ្លែងអោយដឹងថា គំរោងទីក្រុងទំនើបនេះគឺជាការវិនិយោគរួមគ្នារវាងក្រុមហ៊ុនក្នុងស្រុក FURI Corporation និងក្រុមហ៊ុនដ៏ធំមួយមកពីប្រទេសសិង្ហបុរី។
កញ្ញាបានបន្ថែមទៀតថា ចំនួនសំណង់ផ្សេងៗនៅក្នុងគំរោង Crystalville Ream Beach សរុបមក មានចំនួនត្រឹមតែ ១០០ ខ្នងប៉ុណ្ណោះ ដែលនៅក្នុងនោះនឹងមាន អាងហែលទឹកដ៏ធំមួយ ដែលនឹងត្រូវសង់ឡើងនៅលើផ្ទៃដីមានទំហំរហូតដល់ ៦ ហិកតា។ ជាលទ្ធផល អាងហែលទឹកនោះនឹងអាចទាក់ទាញអតិជនមកពីគ្រប់ទិសទីទាំងអស់នៅជុំវិញពិភពលោក។
ក្រៅពីអាងហែលទឹកដ៏ធំល្វឹងល្វើយនេះ នៅក្នុងអនាគតទីក្រុងលំហែកាយ Crystalville Ream Beach នឹងមានផងដែរនូវ លំនៅដ្ឋានសំរាប់អ្នកមានធូរធារ មជ្ឍមណ្ឌលពាណិជ្ជកម្ម ផ្សារទំនើប និង សណ្ឋាគារផ្កាយប្រាំ។
ទីក្រុងលំហែកាយដ៏ទំនើប Crystalville Ream Beach នឹងត្រូវសាងសង់ឡើងនៅលើផ្ទៃដីទំហំ ៤៣ ហិកតា ស្ថិតនៅតាមឆ្នេរសមុទ្ររាម ក្នុងខេត្តព្រះសីហនុ៕
