We TV Cambodia

IMF ស្នើអោយរាជរដ្ឋាភិបាលតំឡើងពន្ធអចលនទ្រព្យ ដើម្បីកាត់បន្ថយគំលាតជីវភាព

IMF ស្នើអោយរាជរដ្ឋាភិបាលតំឡើងពន្ធអចលនទ្រព្យ ដើម្បីកាត់បន្ថយគំលាតជីវភាព

ដោយៈ ទិន សុខាវុធ

ស្ថាប័ន​អន្តរជាតិ International Monetary Fund ហៅ​កាត់​ថា IMF បាន​ស្នើ​អោយ​រាជ​រដ្ឋាភិបាលកម្ពុជា​ ពិនិត្យលទ្ធភាពដំឡើង​ពន្ធ​លើអចលនទ្រព្យ ដើម្បី​ដោះស្រាយ​គំលាតជីវភាពរបស់ប្រជាពលរដ្ឋ​កម្ពុជា ជា​ពិសេស គំលាតរវាង​អ្នកមាននិងអ្នក​ក្រ​។

យោង​តាម​ការបាយការណ៍​របស់​​ IMF នៅ​ពេល​បច្ចុប្បន្ន​នេះ ចំណូល​បានមក​ពីការប្រមូល​ពន្ធ​លើ​អចលនទ្រព្យ​ មាន​ប្រមាណតែ ០.១% នៃ​ទំហំទឹកប្រាក់ GDP សរុប​តែ​ប៉ុណ្ណោះ គឺ​ទាបជាង​ចំណូល​បាន​មកពី VAT (១៧%) ទៅ​ទៀត​។

អាស្រ័យ​ហេតុ​នេះ IMF បាន​លើកឡើង​ថា ប្រសិន​បើ​រាជ​រដ្ឋាភិបាល​កម្ពុជា​តំលើង​ពន្ធ​លើអចលនទ្រព្យ ដោយ​ប្រើប្រាស់​ប្រព័ន្ធ​ថ្មី ប្រការ​នេះ​នឹងជួយ​បង្កើន​ថវិកា​ជាតិ ដែល​អាចត្រួវ​យក​ទៅ​ប្រើប្រាស់​សំរាប់​ប្រយោជន៍​របស់​ប្រជាពលរដ្ឋ​ភាគច្រើន​។ ជាលទ្ធផល គំលាត​ជីវភាព​រវាង​​ប្រជាពលរដ្ឋ​កម្ពុជា​ នឹង​ត្រូវ​កាត់​បន្ថយ​។

IMF បានបន្ថែមទៀត​ថា ចាប់​ពី​ឆ្នាំ ១៩៩៧ មកដល់​ឆ្នាំ ២០១២ រាជ​រដ្ឋាភិបាល​កម្ពុជា​បានបំពេញ​តួនាទីយ៉ាងល្អ ដោយ​បានកាត់​បន្ថយ​វិសមភាព​រវាងប្រជាពលរដ្ឋ​កម្ពុជា​ពី ៤០.៤% អោយ​មក​នៅ​ត្រឹម​តែ​ ២៩% តែ​ប៉ុណ្ណោះ​។

ក៏ប៉ុន្តែ នៅចន្លោះ​ឆ្នាំ ២០១២-២០១៥ តួលេខ​ខាង​លើនេះ ស្ថិត​នៅ​តែដដែល ដោយ​គ្មានការផ្លាស់ប្តូរអ្វីទាំងអស់​។ ដូចនេះ ប្រទេស​កម្ពុជាត្រូវ​ស្ថិត​ក្នុង​លំដាប់ថ្នាក់ទាបជាង​គេ នៅក្នុង​ចំណោម​ប្រទេស​សមាជិក ASEAN  ទាក់ទង​ទៅ​នឹង​វិសមភាព​រវាង​អ្នកមាននិង​អ្នកក្រ។

បើ​តាម IMF នៅ​ពេលបច្ចុប្បន្ន​នេះ ការអភិវឌ្ឍត្រូវ​បាន​ធ្វើឡើង​​តែ​នៅតាម​ទីក្រុងប៉ុណ្ណោះ នៅ​ពេល​ដែលប្រជាជនជាង ៨០% រស់​នៅ​តាម​តំបន់​ជនបទ​។ ហើយ​​ប្រាក់​ចំណូល​របស់គ្រួសារ​នៅ​ជនបទ មាន​ប្រមាណត្រឹម​តែ ៦០% នៃ​ប្រាក់ចំណួល​របស់​អ្នករស់​នៅតាម​ទីក្រុង​​តែ​ប៉ុណ្ណោះ​។

មួយវិញទៀត IMF បានគូស​បញ្ជាក់ថា ការតំលើង​ពន្ធ​លើអចលនទ្រព្យ​ មិនត្រឹម​តែ​​ជួយ​បង្កើន​ថវិកា​ជាតិ សំរាប់​យក​មកប្រើប្រាស់​ដើម្បី​ប្រយោជន៍​រួម​តែ​ប៉ុណ្ណោះ​ទេ វា​​ក៏​នឹង​អាច​ជួយ​បន្ធូរបន្ថយ​ចំណូល​ពី​ការយក​ VAT ដែល​ជា​ចំណូល​ពន្ធបាន​មក​ពី​ប្រជាពលរដ្ឋគ្រប់​រូប​ មិន​ថា​ជា​អ្នកមានឬ​អ្នក​ក្រ​ឡើយ​៕

Related Articles