We TV Cambodia

EBA ទាក់ទងនឹងជោគវាសនារបស់កម្មការិនីខ្មែរជិត ១ លាននាក់ និងក្រុមគ្រួសារពួកគេជាច្រើនលាននាក់ទៀត

EBA ទាក់ទងនឹងជោគវាសនារបស់កម្មការិនីខ្មែរជិត ១ លាននាក់ និងក្រុមគ្រួសារពួកគេជាច្រើនលាននាក់ទៀត
រូបថតៈ គេហទំព័រ IDC-CDI

ដោយៈ ទិន សុខាវុធ

ក្រសួង​ការបរទេស​កម្ពុជា កាលពី​ថ្ងៃ​ទី ១២ ខែ ធ្នូ ឆ្នាំ ២០១៩ បានចុះ​ផ្សាយ​នូវ​សេចក្តី​ថ្លែង​ការណ៍​​មួយ​ នៅ​លើទំព័រ​ Facebook របស់​ក្រសួង ដោយសុំអោយ​សហភាពអឺរ៉ុប គិតគូ​ពិចារណា​​ពី​ជីវភាព​របស់កម្មការិនីកម្ពុជាជិត ១ លាននាក់ និងក្រុមគ្រួសារ​របស់​ពួក​គេ​ជា​ច្រើនលាននាក់ទៀត ជាប់ទាក់ទង​នឹង​ប្រព័ន្ធអនុគ្រោះពន្ធ EBA របស់​សហភាព​អឺរ៉ុប​ មុននឹង​សំរេច​ចិត្តថាព្យួរ​ឬ​មិនព្យួរប្រពន្ធ​អនុគ្រោះពន្ធ EBA នេះ​។

«ក្នុង​ចន្លោះ​ពេល​ដែល​គណៈកម្មការ​អឺរ៉ុប​ចេញ​សេចក្តី​សម្រេច​ចុង​ក្រោយ​របស់​ខ្លួន នៅខែ​កុម្ភៈ ឆ្នាំ​២០២០ ខាង​មុខ​នេះ រាជ​រដ្ឋាភិបាល​សង្ឃឹម​ថា គណកម្មការ​អឺរ៉ុប​នឹងធ្វើការពិចារណា​លើ​កិច្ច​ខិតខំប្រឹងប្រែង ប្រកបដោយ​សុឆន្ទៈ​របស់​រាជ​រដ្ឋាភិបាល ក្នុង​ការអនុវត្ត​​រាល់​អនុសញ្ញាអន្តរជាតិទាំងអស់ ក្រោម​លក្ខខណ្ឌអនុគ្រោះ​ពន្ធ គ្រប់មុខ​ទំនិញលើកលែងតែសព្វាវុធ-EBA ដែល​អាចផ្តល់ផលប៉ះពាល់ដល់​សង្គម​ ដល់កម្មការិនី​ប្រមាណ​ជិត​​មួយ​លាន​នាក់ និងផលប៉ះពាល់ដោយ​ប្រយោលដល់ក្រុម​គ្រួសារ​និងសាច់ញាតិ ដែលរស់នៅពឹងផ្អែកលើប្រាក់ឈ្នួល​របស់​ពួកគេ» នេះ​ជា​សំណេររបស់នៅ​ក្នុង​សេចក្តី​ថ្លែងការណ៍ រប់សក្រសួង​ការបរទេស​។

ទាក់ទងនឹងបញ្ហា EBA ​នេះ នៅ​ក្នុងពិធី​​ចែកសញ្ញាប័ត្រដល់និស្សិត​នៃ​សាកលវិទ្យាល័យ​ឯកទេសនៃកម្ពុជា (CUS) សរុបចំនួន ៦,៧៦២ នាក់ កាលពីថ្ងៃ​ទី ១១ ខែ ធ្នូ ឆ្នាំ ២០១៩ លោកនាយក​រដ្ឋ​មន្ត្រី ហ៊ុន សែន បាន​លើកឡើង​ថា ប្រសិន​បើសហភាព​អឺរ៉ុប (EU) សំរេច​ព្យួរ​ភាព​អនុគ្រោះ​ពន្ធ EBA សហភាពអឺរ៉ុប​ខ្លូនឯង ក៏​នឹងខាតបង់ប្រាក់ជាច្រើន ដូច​ជាកម្ពុជា​ដែរ​ ពីព្រោះនៅ​ពេលដែល​ទំនិញ​កម្ពុជា​ត្រូវ​ជាប់​ពន្ធ តំលៃ​នៃទំនិញទាំងនោះក៏​នឹងត្រូវ​ឡើងថ្លៃ​​ទៅ​តាម​តំលៃ​ពន្ធនោះដែរ​។

មួយវិញ​ទៀត កាល​ពី​​ខែ មេសា ឆ្នាំ ២០១៩ បណ្តា​គណបក្ស​នយោបាយ​មួយ​ចំនួន​នៅ​អឺរ៉ុប ដែល​ជា​សមាជិក​នៃអង្គការ​អន្តរជាតិ​មួយ​មាន​ឈ្មោះ​ថា Centrist Democrats International (IDC-CDI) បាន​ចុះ​ផ្សាយ​នូវ​សេចក្តីសំរេច​មួយ​នៅ​លើ​គេហទំព័រ​របស់​ពួកគេ ដោយ​សុំ​អោយ​សហគមន៍​អឺរ៉ុប​ធ្វើ​ការសំរេច​ចិត្ត​អោយបានត្រឹមត្រូវចំពោះបញ្ហាការផ្តល់​ការអនុគ្រោះ​ពន្ធ​ EBA ដល់​កម្ពុជា​។

សំរាប់​បណ្តា​គណបក្ស​នយោបាយ​ទាំងនោះ កម្ពុជា​ជា​ប្រទេស​មួយ​ដែល​ទើប​នឹងងើបចេញ​ពីភ្នក់​ភ្លើង​​នៃសង្គ្រាមស៊ីវិល​អស់​រយៈពេល​ជាង​ពីរ​ទស្សវត្ស​ និង​ជា​ប្រទេស​ដ៏​ក្រីក្រជាងគេមួយ​នៅ​ក្នុង​ពិភពលោក។ ហើយ​កន្លង​មក EBA បាន​ដើរ​តួនាទី​ដ៏​សំខាន់​មួយ ក្នុងការផ្តល់​អត្ថប្រយោជន៍ផ្សេង​ៗ​ដល់​ជន​​កម្ពុជា​រាប់​លាននាក់​។

យោង​តាម IDC-CDI ប្រជាពលរដ្ឋ​កម្ពុជាប្រមាណ​ជា​មួយ​លាន​នាក់ ដែល​ជា​កម្មករ-កម្មការិនី​ធ្វើការ​នៅ​ក្នុង​រោងចក្រ​កាត់​ដេរ​សំលៀកបំពាក់ ដោយ​មានការអនុគ្រោះ​ពាណិជ្ជកម្ម EBA នេះ ពួកគេ​បាន​ទទួល​នូវ​​ផលប្រយោជន៍​ដែល​ជា​ប្រាក់​កំរៃ​ដ៏​សមរម្យសំរាប់​ពួកគេ​ចិញ្ជឹម​ជីវិត​និង​ផ្គត់ផ្គង់ដល់ក្រុមគ្រួសារ​របស់​ពួក​គេ​​ដែល​រស់​នៅ​តាម​តំបន់ជនបទនានា​​។

គណបក្ស​នយោបាយ​ទាំងនោះ ក៏​បានលើកឡើងប្រកប​ដោយ​ភាព​សោមនស្ស​ផងដែរ​ថា រាជរដ្ឋាភិបាល​កម្ពុជា​បានខិតខំ​ប្រឹងប្រែង​​​ជា​ខ្លាំង​ក្នុងការ​ធ្វើតាម​សេចក្តី​ស្នើសុំ​របស់​សហគមន៍​អឺរ៉ុប ហើយ​ក៏​បាន​បំពេញនូវ​កាតព្វកិច្ច​របស់​ខ្លួនផង​ដែរ ក្នុង​ការអនុវត្ត​នូវ​សន្ធិសញ្ញ​របស់​អង្គការសហប្រជាជាតិ​និងអង្គការ​ពលកម្ម​អន្តរជាតិ​ (ILO) ​ចំនួន ១៥ ទាក់​ទង​នឹង​ការ​ពង្រីក​នូវ​សិទ្ធ​ ​នយោបាយ​ សេដ្ឋកិច្ច ការងារ ក៏​ដូច​ជា​សេរីភាព​ទាំងឡាយ​នៅ​ក្នុង​ប្រទេស​កម្ពុជា​ផង​ដែរ​។

លើស​ពី​នេះ​ទៀត បណ្តា​គណបក្ស​នយោបាយ​ទាំងនោះ បាន​បន្ថែម​ទៀត​ថាប្រជាធិបតេយ្យ​ភាវូបនីយកម្ម​ទាមទារ​នូវ​រយៈពេល​​មួយ​យ៉ាង​យូរ​ ហើយ​ការករកើត​ឡើង​នូវ​វណ្ណៈ​អ្នក​មាន​មធ្យម​នៅ​កម្ពុជា​កន្លង​មក​នេះ បាន​​ជួយ​ពង្រឹង​នូវ​តំលៃ​ប្រជាធិបតេយ្យ​ និង​ស្ថាប័នប្រជាធិបតេយ្យ​ ដ៏​គួរ​អោយ​កត់​សំគាល់​។ ជារួម EBA ដើរ​តួនាទី​យ៉ាង​សំខាន់​ក្នុងការ​ជួយ​ជា​វិភាគទាន​ក្នុង​ការកសាង​មូលដ្ឋាន​សេដ្ឋកិច្ច សំរាប់​ប្រជាធិបតេយ្យ​នៅ​កម្ពុជា​។

ប្រព័ន្ធ​អនុគ្រោះពន្ធ EBA បាន​និង​កំពុង​អនុញ្ញាត​អោយ​កម្ពុជា​ដែល​ជា​ប្រទេស​​អភិវឌ្ឍន៍​​​តិចតួច​មួយ​ (least developed country) ​ក្នុងចំណោម​ប្រទេស​​អភិវឌ្ឍ​​ន៍​តិច​តួច​មួយ​ចំនួន​ទៀត អាច​នាំ​ទំនិញ​ចេញ​ទៅ​លក់​ក្នុង​ទី​ផ្សារ​​របស់​សហភាព​អឺរ៉ុប ដោយ​មិនបាច់​បង់​ពន្ធ​សំរាប់​ទំនិញប្រមាណជា ៩៥%​ និង​ក្នុង​បរិមាណ​គ្មានចំនួនកំណត់​។ ក៏ប៉ុន្តែ ភាព​អនុគ្រោះពន្ធ​នេះ នឹង​ត្រូវ​ដកហូត​យក​ទៅ​វិញ​ពី​ប្រទេស​​ដែល​នៅ​ទីនោះ សហភាព​អឺរ៉ុប​យល់​ឃើញ​ថា​មាន​ការរំលោភ​សិទ្ធិ​មនុស្ស​៕

Related Articles