We TV Cambodia

ទូតអាមេរិកថាកម្ពុជាគួរមានប្រភពហិរញ្ញប្បទាន ពី​ច្រើន​ប្រទេស​

ទូតអាមេរិកថាកម្ពុជាគួរមានប្រភពហិរញ្ញប្បទាន ពី​ច្រើន​ប្រទេស​

 
 

ដោយៈ ទិន សុខាវុធ

មន្ត្រី​ស្ថានទូត​អាមេរិកបាន​លើក​ឡើង​ថា កម្ពុជា​គួរ​មាន​ប្រភព​ហិរញ្ញប្បទាន​​​មក​ពី​ច្រើន​​ប្រទេស គឺ​មិន​ត្រូវ​ពឹង​ពាក់​អាស្រ័យ​តែ​ទៅលើ​ហិរញ្ញប្បទាន​របស់​ចិន​តែ​មួយ​នោះទេ​។

នៅក្នុង​បទ​សម្ភាសន៍​ជាមួយ​នឹងវិទ្យុ​សំលេង​សហរដ្ឋ​អាមេរិក (VOA) កាល​ពី​ថ្ងៃ​ទី ១៣ ខែ ធ្នូ ឆ្នាំ ២០១៩ កន្លងទៅ​នេះ លោក​ Patrick Murphy ឯក​អគ្គរដ្ឋទូត​នៃ​សហរដ្ឋ​អាមរិកប្រចាំ​នៅ​កម្ពុជា បាន​លើកឡើងថា​ កម្ពុជា​អាច​​រកបាន​នូវ​ហិរញ្ញប្បទាន​ពី​បណ្តាប្រទេស​ផ្សេង​ៗទៀត​ជា​ច្រើន​ មិន​គួរ​ពឹង​តែ​ទៅ​លើ​ប្រទេស​ចិន​តែមួយ​​ប៉ុណ្ណោះទេ​។

«អ្វី​ដែល​យើង​លើក​ឡើង​គឺ​ថា​ ​កម្ពុជា​គួរ​តែ​ពិចារណា​ទៅ​លើ​ទំនាក់​ទំនង​របស់​ខ្លួន​ ​មិន​គួរ​នៅ​ខ្ទាស់​ជាប់​ទាំងស្រុង​ជាមួយ​ប្រទេស​តែមួយ​នោះ​ទេ។​ ​កម្ពុជា​មានដៃ​គូ​ជាច្រើន​ ​ហើយ​កម្ពុជា​គួរ​តែ​គិតគូរ​ឱ្យ​ប្រុងប្រយ័ត្ន​អំពី​លក្ខខណ្ឌ​ភ្ជាប់​ជាមួយ​នឹង​ជំនួយ​ ​ប្រាក់កម្ចី​ ​និង​ការ​វិនិយោគ​នានា​ ​ឱ្យ​ស្រប​ទៅ​តាម​និយាម​អន្តរជាតិ​ ​និង​តាម​គោលបំណង​ជាក់ស្ដែង​របស់​រដ្ឋាភិបាល​កម្ពុជា​ផង​ដែរ​ ​ដែល​ធានា​នូវ​តម្លាភាព​ ​ការ​ប្រឆាំង​អំពើពុករលួយ​ ​និង​ការ​វិនិយោគ​ដែល​ធ្វើ​ឱ្យ​ប្រសើរ​ឡើង​នូវ​ជីវភាព​របស់​ប្រជាជន​កម្ពុជា​ ​ដែល​រស់នៅ​តាម​មូលដ្ឋាន។​ ​វា​មាន​សារៈសំខាន់​ខ្លាំង​ណាស់​ក្នុង​ការ​សម្រេច​ជ្រើស​រើស​ប្រទេស​ជា​ដៃគូ» នេះ​ជាការលើកឡើង​របស់​លោកទូត Patrick Murphy ។

ចំណែកឯលោក​​ភារធារី Michael Newbill វិញ កន្លង​មក លោកបាន​ថ្លែងថា រាល់​ប្រាក់​កំចី​ពី​ប្រទេស​ចិន គួរ​តែ​ត្រូវ​មាន​តំលាភាព និង​បំរើអោយ​ផលប្រយោជន៍របស់​ប្រជាពលរដ្ឋ​កម្ពុជា​ពិត​ប្រាកដ គឺ​មិ​ន​សំរាប់​តែ​អ្នក​មាន​អំណាច​មួយ​ក្រុមតូច​តែ​ប៉ុណ្ណោះ​ទេ​។

ទាក់ទង​នឹង​កំចី​ពី​ប្រទេស​ចិន លោក​នាយក​រដ្ឋ​មន្ត្ ហ៊ុន សែន ធ្លាប់​​បាន​ពន្យល់​ថា នៅ​ពេល​បច្ចុប្បន្ន​នេះ មាន​តែ​ប្រទេស​ចិន​មួយ​ប៉ុណ្ណោះ​ដែល​ហ៊ាន​ផ្តល់​កំចី​អោយ​ប្រទេស​កម្ពុជា​ច្រើន​ជាង​គេ ហើយ​រដ្ឋាភិបាល​របស់​លោក​គ្មាន​ជំរើស​ណា​ក្រៅ​ពី​ប្រទេស​ចិន​ឡើយ​ ព្រោះកម្ពុជា​ត្រូវការប្រាក់​ដើម្បី​យក​មក​អភិវឌ្ឍ​ប្រទេស​ជាតិ​។ តែ​បើ​ប្រទេស​ផ្សេង​ទៀត​ អាច​ផ្តល់​ប្រាក់​កំចី​យ៉ាង​ច្រើន​ដូច​ជា​ប្រទេស​ចិន​ដែរ​នោះ រដ្ឋាភិបាល​របស់​លោក​នឹង​មិនរុញរា​ក្នុងការ​ខ្ចី​ប្រាក់​ពី​ប្រទេស​នោះ​ឡើយ។

មួយវិញទៀត លោក​នាយករដ្ឋ​មន្ត្រី ហ៊ុន សែន​ បាន​លើកឡើង​​ផង​ដែរ​ថា បើ​ប្រទេស​ទាំងឡាយ​ណា​មិន​ចង់​អោយ​ប្រទេស​​ចិន​មាន​ឥទ្ធិពល​ខ្លាំង​នៅ​ក្នុង​ប្រទេស​កម្ពុជា បណ្តា​ប្រទេសទាំងនោះ​គួរគាប់បី​​ធ្វើការវិនិយោគ​អោយ​បាន​ច្រើន​​​ជាង​វិនិយោគចិន​នៅ​ក្នុង​ប្រទេស​កម្ពុជា​។

​យ៉ាងណាម៉ិញ ចំពោះ​សម្តេច​ផ្ទាល់ ការរិះគន់ពី​ឥទ្ធិពល​ចិន​នៅ​ក្នុង​ប្រទេស​កម្ពុជា គឺ​គ្រាន់​តែ​ជាទំនាស់ផលប្រយោជន៍ភូមិសាស្ត្រ​នយោបាយ​រវាង​មហា​អំណាច​ទាំងឡាយ ដែល​តែង​តែ​ចង់​អោយ​ឥទ្ធិពលរបស់​ខ្លួន​គ្រប់​ដណ្តប់​នៅ​លើ​តំបន់​ភូមិសាស្ត្រ​នយោបាយ​នានា អោយ​បានកាន់​តែ​ធំទូលំទូលាយ​កាន់​តែ​ល្អ​។

មួយវិញទៀត ឆ្លើយតប​ទៅ​នឹង​ការចោទ​ប្រកាន់​ថា ចិនកំពុង​ប្រើ​ល្បិច​ «អន្ទាក់​បំណុល» ដោយ​ផ្តល់​នូវ​ប្រាក់​កំចី​យ៉ាង​ច្រើន​លើសលប់​​ដល់​ប្រទេស​កម្ពុជា​ ដើម្បី​​ធ្វើ​អោយកម្ពុជា​​ជំពាក់​បំណុល​វ័ណ្ឌក​គ្មាន​ប្រាក់​សង ដែល​ជា​ប្រការ​អាច​ធ្វើអោយ​ប្រទេស​ចិន​អាច​​ដាក់​អាណានិគម​លើប្រទេស​កម្ពុជាបាន​នោះ លោក​នាយក​រដ្ឋ​មន្ត្រី​បាន​បញ្ជាក់​ថា កម្ពុជា​មិន​មែន​ខ្ចី​ប្រាក់​តែ​ពី​ប្រទេស​ចិននោះ​ទេ កម្ពុជា​ក៏​បាន​និង​កំពុង​ខ្ចី​ប្រាក់ពី​ប្រទេស​ជាមិត្ត​ និង​អង្គការ​ដៃគូ​អភវឌ្ឍន៍​ផ្សេង​ៗ​ទៀត​​ជាច្រើន​​​ផង​ដែរ​។

សរុប​មក អត្រា​បំណុល​របស់​កម្ពុជា​បច្ចុប្បន្ន មាន​ត្រឹម​ប្រមាណ​ជា​ ២១ ភាគ​រយ​តែ​ប៉ុណ្ណោះ​ ធៀប​ទៅ​នឹង​ផលិតផល​ក្នុង​ស្រុក​សរុប ខណៈ​ដែល​ច្បាប់​របស់​កម្ពុជា​អនុញ្ញាត​អោយ​រាជរដ្ឋាភិបាល​ខ្ចី​ប្រាក់​ពី​បរទេស​ រហូត​ដល់​ទៅ ៤០ ភាគរយ​នៃ​ផលិតផល​ក្នុង​ស្រុក​សរុប​ឯណោះ​។

Related Articles