We TV Cambodia

7-Eleven ប្រកាសបើក ៧០០ សាខានៅស្រុកខ្មែរ

ហាង 7-Eleven នៅប្រទេសជប៉ុន

 
 

ដោយៈ ទិន សុខាវុធ

ក្រុមហ៊ុន​មួយ​ដែលមានទីតាំង​នៅ​ប្រទេស​ថៃ បានបង្ហើប​អោយ​ដឹងថា ក្រុមហ៊ុន​គ្រោង​នឹង​បើក​សាខាហាង​លក់​ទំនិញ​រាយ «7-Eleven» អោយ​បាន​ចំនួន ៧០០ សាខា​ នៅ​ទូទាំង​ប្រទេស​កម្ពុជា​។

ក្រុមហ៊ុន​នោះ​បាន​អោយ​ដឹង​ទៀត​ថា រាល់​លិខិត​ស្នាម​រដ្ឋបាល មាន​ដូច​ជា​កិច្ច​សន្យា និង​លិខិត​ប្រគល់​សិទ្ធិ​អាជីវកម្ម ត្រូវ​បាន​រៀបចំ​រួច​រាល់​អស់​ហើយ សំរាប់​ការបើក​សាខា​ហាង​លក់​ទំនិញ​រាយ «7-Eleven» នៅ​ក្នុង​ប្រទេស​កម្ពុជា​។

7-Eleven ជា​ហាង​លក់​ទំនិញ​រាយ​ មានប្រភេទ​ជា​​ម៉ាត (Mart) ដែល​ត្រូវ​បាន​បង្កើត​ឡើង​នៅ​សហរដ្ឋ​អាមេរិក​ នៅ​ក្នុង​កំឡុង​ឆ្នាំ ១៩២៧ ។ ហើយ​ចាប់​តាំង​ពី​ឆ្នាំ ២០០៥ ហាង​ 7-Eleven ត្រូវ​បាន​​ក្រុមហ៊ុន​ជប៉ុន Seven-Eleven Japan Co., Ltd., ទិញ​យក​មក​ធ្វើ​អាជីវកម្ម។​ ជាលទ្ធផល រហូត​មក​ដល់​ខែ មិថុនា ឆ្នាំ ២០១៩ នេះ ហាង​ 7-Eleven ចំនួន ៦៨,២៣៦ ត្រូវ​បាន​បើក​លក់​នៅ​ក្នុង​ប្រទេស​ចំនួន ១៧ នៅ​ជុំវិញ​​ពិភពលោក​។

ដោយឡែក នៅ​ក្នុង​តំបន់​អាស៊ាន មាន​ប្រទេស​ចំនួន ៦ ហើយ ដែលនៅ​ក្នុង​នោះ មាន​ការវិនិយោគ​បើក​ហាង​ 7-Eleven នេះ​។

នៅ​ប្រទេស​ថៃ យោង​តាម​កាសែត​បាងកកប៉ុស្តិ៍ រហូត​មក​ដល់​ឆ្នាំ ២០១៨ ចំនួន​ហាង 7-Eleven បាន​កើន​ដល់​ ១១,០០០ ហាង។ ហើយ​ហាង 7-Eleven ដំបូង​គេបំផុតត្រូវ​បាន​បើក​​នៅ​ក្នុង​ប្រទេស​ថៃ នៅឆ្នាំ ១៩៨៩ នៅ​តាម​ផ្លូវ Patpong Road ក្នុង​ទីក្រុង​បាងកក​។

មួយវិញទៀត គឺ​ក្រុមហ៊ុន​ថៃ CP ALL Public Company Limited ​ដែល​​​ទទួលបាន​អាជ្ញាប័ណ្ណ​មាន​សិទ្ធិ​​បើក​ហាង 7-Eleven ឬ​ក៏​មាន​សិទ្ធិ​លក់​អាជ្ញាប័ណ្ណ​នេះ​អោយ​​ទៅ​ក្រុមហ៊ុន​ថៃ​ផ្សេង​ៗ​ទៀត​អាច​​មាន​សិទ្ធិ​បើក​ហាង 7-Eleven នេះ​នៅ​ក្នុង​ប្រទេស​ថៃ​។

ហើយ​បើ​និយាយ​ពី​ប្រទេស​ជប៉ុន​វិញ រហូត​មក​ដល់​ឆ្នាំ ២០១៩​​ នេះ ចំនួនហាង 7-Eleven បានកើន​ឡើង​ដល់ ២០,៧០០ ហាង​ហើយ​។ តួលេខ​នេះ បានធ្វើអោយ​ប្រទេស​ជប៉ុន​ក្លាយ​ប្រទេស​​មាន​ហាង​ 7-Eleven ច្រើន​ជាង​គេបំផុត​នៅ​ក្នុង​ពិភពលោក​​ ពោល​គឹ​ច្រើន​ជាង​នៅប្រទេស​អាមេរិក​ ដែល​ជា​ប្រទេស​ដើម​កំណើត​របស់​​ហាង 7-Eleven នេះ​ទៅ​ទៀត​។ នៅ​សហរដ្ឋ​អាមេរិក រហូត​មក​ដល់​ឆ្នាំ ២០១៩ នេះ ចំនួន​ហាង​ 7-Eleven មាន​ត្រឹម​តែ ៩,៣៤០ ហាង​តែ​ប៉ុណ្ណោះ​៕

ហាង 7-Eleven នៅ​សហរដ្ឋ​អាមេរិក

Related Articles