We TV Cambodia

គំរោងបុរីដ៏ធំមួយលើផ្ទៃដីជាង ៣០ ហិកតា ចាប់ផ្តើមការសាងសង់

 
 

ដោយៈ ទិន សុខាវុធ

សំណង់​បុរី ML វិមាន​មង្គល ត្រូវ​បាន​សម្ពោធ​​ចាប់​ផ្តើម​ដំណើរការ​សាងសង់​ កាល​ពី​សប្តាហ៍​​មុន​។ នៅ​ពេល​សង់​រួច​ បុរី​នេះ​នឹង​ជា​បណ្តុំ​លំនៅ​ដ្ឋាន​មួយ ប្រកប​ដោយ​គុណភាព ប្រណីតភាព និង ផាសុខភាព ដែល​អាច​ផ្តល់​លទ្ធភាព​អោយ​អ្នក​​ទិញ​លំនៅ​ស្ថាន​ទាំងឡាយ អាចបើក​ហាង​និង​ឬ​ប្រកប​មុខ​របរ​អាជីវកម្ម​ផ្សេង​ៗ​ទៀត​​បាន​។

លោក ពេជ្រ សីហា ប្រធាន​ផ្នែក​ទីផ្សារ​របស់​បុរី ML វិមាន​មង្គល បាន​ថ្លែង​អោយ​ដឹង​​​ថា ពិធី​សម្ពោធ​បើក​ការ​ដ្ឋាន​សាងសង់​​បុរី​របស់​លោក បាន​ធ្វើ​ឡើង​នៅ​ថ្ងៃ​ទី ៣​ ខែ វិច្ឆិកា ឆ្នាំ ២០១៩ កន្លងទៅ​នេះ។ ហើយ​គឺ​ក្រុមហ៊ុន ML ​មង្គលរៀលធី ​ដែល​បាន​បោះ​ទុន​វិនិយោគ​ក្នុង​ការសាងសង់​​បុរី​នេះ​។

សំណង់​បុរី ML វិមាន​មង្គល កំពុង​ត្រូវ​បាន​សាងសង់​ឡើង​នៅតាម​បណ្តោយ​ផ្លូវ​ជាតិ​លេខ ៤ ស្ថិត​ក្នុង​សង្កាត់​ កំបូល ខ័ណ្ឌ កំបូល រាជធានីភ្នំពេញ ដែល​ជា​ទីតាំង​មួយ​ប្រកប​ដោយ​សក្តានុពល​អចលទ្រព្យ​ យោង​តាម​អ្នក​ជំនាញ​អចលនទ្រព្យ​។

មួយវិញទៀត លោក​ប្រធាន​ផ្នែក​ទីផ្សារ​របស់​បុរី ML វិមាន​មង្គល បាន​បន្ថែម​ទៀត​ថា ការវិនិយោគ​ក្នុង​វិស័យ​អចលនទ្រព្យ​របស់​ក្រុមហ៊ុន ML មង្គល​រៀលធី គឺ​ដើរ​ស្រប​នឹង​​យុទ្ធសាស្ត្រ​ចតុកោណ​ដំណាក់កាល​ទី ៤ របស់​រាជ​រដ្ឋាភិបាល នៅ​ក្នុង​ការអភិវឌ្ឍ​លើ​វិស័យ «មនុស្ស ផ្លូវ ទឹក និង ភ្លើង» ដែល​ត្រូវ​បាន​លើក​ឡើង​ដោយ​លោក​នាយក​រដ្ឋ​មន្ត្រី ហ៊ុន សែន ៕

Related Articles