ភ្ញៀវទេសចរភាគច្រើន មិនថាភ្ញៀវជាតិ អន្ដរជាតិទេ ដែលបានធ្វើដំណើរកម្សាន្ដទៅកាន់ខេត្ដ បាត់ដំបង រមែងតែងតែនឹកឃើញ តំបន់កន្សាន្ដ អំពីការជិះ ឡូរី មើលទេសភាព និងសាកល្បងបទពិសោធន៍ថ្មី ដែលមិនទាន់មាននោះទេកន្លងមក។ ហេតុដូច្នេះហើយទើប អាជីវកម្មមួយនេះ មានការគាំទ្រ អាចរកប្រាក់ចំណូលកាក់កបគ្រាន់បើ។
បើពិនិត្យឲ្យមែនទែនទៅ ឡូរី គឺសំដៅលើយានតូចៗដែលគេប្រើប្រាស់សម្រាប់បម្រើការងារ ត្រួតពិនិត្យ និង ជួសជុលផ្លូវដែក ប៉ុន្តែសម្រាប់អ្នកខេត្តបាត់ដំបង និងខេត្តដែលធ្លាប់ប្រើប្រាស់វាកន្លងមក វា គឺជាយានកែច្នៃនៅក្នុងស្រុកដែលផ្គុំឡើងពីគ្រែឫស្សី កែច្នៃដាក់កង់ដែក និងដំណើរការដោយម៉ាស៊ីនភ្លើងហើយ បរនៅលើផ្លូវរថភ្លើង។
លោក រិន ផា បុគ្គលិករដ្ឋាករទឹកស្វយ័តភ្នំពេញ បានឱ្យដឹងថា “ចង់ទៅលេង និងជិះឡូរី នៅបាត់ដំបងយូរហើយ ព្រោះធ្លាប់លឺតែគេថា និងឃើញនៅក្នុងរូបហ្វេស ប៊ុក។ ជិះឡូរីហ្នឹងប្លែកម្យ៉ាង ព្រោះអត់មាននៅកន្លែងផ្សេង មានតែនៅបាត់ដំបង ដូច្នេះក៏ចង់ទៅលេងឱ្យស្គាល់នឹងគេ”។ ចំណែក លោកស្រី សឿម រដ្ឋា ម្ចាស់ផ្ទះសំណាក់ ហូលីដេ ស្ថិតនៅក្នុងបាត់ដំបង បានឱ្យដឹងថា ភ្ញៀវទេសចរបរទេសភាគច្រើន សួរនាំច្រើន ពីឡូរី ។ លោកស្រីបានបន្តថា ភាគច្រើនទេសចរបរទេសសួរព័ត៌មានច្រើនអំពីឡូរី នៅពេលដែលពួកគេចង់ដឹងពីទិសដៅទេសចរណ៍សំខាន់ៗនៅក្នុងខេត្តបាត់ដំបង ។
គូសបញ្ជាក់ផងដែរថា ឡូរី គឺជាយានដែលផ្គុំឡើងដោយគ្រែឫស្សី និងអាចធ្វើដំណើរបានដោយសារម៉ាស៊ីនដែលគេកែច្នៃ និងអាចរត់បាននៅក្នុងល្បឿន ប្រមាណជា ៣០ គីឡូម៉ែត្រនៅក្នុងមួយម៉ោង ។ នេះជាយានដែលគ្មានកៅអីនោះទេ គឺអ្នកដំណើរអាចធ្វើដំណើរដោយអង្គុយផ្ទាល់នឹងគ្រែឫស្សីនោះ។ នៅក្នុងអំឡុងពេលសង្រ្គាមស៊ីវិល ជាពិសេសនៅដើមទស្សវត្សរ៍ នៃឆ្នាំ១៩៩០ ឡូរី ត្រូវបានគេប្រើប្រាស់ដោយសហគមន៍ដែលមានទីលំនៅតាមបណ្តោយផ្លូវដែកពីរខ្សែ ដែលមាននៅក្នុងប្រទេស គឺនៅភូមិភាគពាយ័ព្យ និងនៅភូមិភាគនិរតី ។
ដោយ៖Stince
ប្រភព៖ AKP