កាលពីថ្ងៃចន្ទម្សិលមិញនេះ ឯកឧត្តមឯកអគ្គរាជទូត អ៊ូក សោភ័ណ បានជួបពិភាក្សាជាមួយលោក Chairoj Tiwatmuncharoen អនុប្រធានជាន់ខ្ពស់ក្រុមហ៊ុន CP ALL Plc. និងជាអគ្គនាយកក្រុមហ៊ុន CP ALL (Cambodia) Co., Ltd អំពីគម្រោងវិនិយោគហាងលក់ទំនិញ 7-Eleven នៅក្នុងប្រទេសកម្ពុជា។ នេះបើយោងតាមទំព័រហ្វេសប៊ុកផ្លូវការរបស់ស្ថានទូតកម្ពុជាប្រចាំប្រទេសថៃ។
នៅក្នុងជំនួបនេះដែរ ឯកឧត្តមឯកអគ្គរាជទូតកម្ពុជា បានសម្តែងការអបអរចំពោះក្រុមហ៊ុន CP ALL ដែលបានទទួលសិទ្ធិធ្វើអាជីវកម្មហ្វ្រេនឆាយពីក្រុមហ៊ុន 7-Eleven Inc. នៅជប៉ុន និងសហរដ្ឋអាមេរិក និងបានស្នើសុំក្រុមហ៊ុនគោរពពាក្យសន្យា គឺប្រើប្រាស់បុគ្គលិកខ្មែរឱ្យបានច្រើន និងដាក់លក់ផលិតផលខ្មែរឱ្យបាន៥០%។
ជាការឆ្លើយតប លោក Chairoj Tiwatmuncharoen បានគូសបញ្ជាក់ពីការប្តេជ្ញាចិត្តរបស់ក្រុមហ៊ុនក្នុងការអនុវត្តពាក្យសន្យាខាងលើ និងបានស្នើសុំស្ថានទូតកម្ពុជាជួយសម្របសម្រួលផ្តល់ព័ត៌មានអំពីផលិតផលខ្មែរ ជាពិសេសអាហារកែច្នៃ និងអាហារក្រៀមដើម្បីឲ្យក្រុមហ៊ុនសិក្សា និងដាក់បញ្ចូលក្នុងបញ្ជីមុខទំនិញសម្រាប់លក់នៅក្នុងសាខាដំបូង ដែលគ្រោងនឹងបើកនៅចុងឆ្នាំនេះ។
គូសបញ្ជាក់ផងដែរថា 7-Eleven ជាយីហោម៉ាតដ៏ល្បីមួយនៅទូទាំងពិភពលោក ដែលមានចំនួន ៦៨,២៣៦សាខា និងត្រូវបានក្រុមហ៊ុន CP ALL Cambodia នាំចូលមកវិនិយោគក្នុងប្រទេសកម្ពុជា ដោយមានកុងត្រារយៈពេល ៣០ឆ្នាំ។ មិនតែប៉ុណ្ណោះ យីហោនេះមានគម្រោងបង្កើតសាខាក្នុងប្រទេសកម្ពុជាឲ្យបាន ៧០០សាខា ទៅ ១,០០០សាខាឯណោះក្នុងរយៈពេល៥ឆ្នាំដំបូង។
អត្ថបទដោយ៖ Nevin