ប្រជាជនខ្មែរមួយភាគតូចតាមខេត្ដ ចាប់អារម្មណ៍នឹងរបរចិញ្ចឹមមាន់ស្រែ បែបទំនើប

ស្ថិតក្នុងស្ថានភាព កូវីដ១៩ បានធ្វើឲ្យសេដ្ឋកិច្ចប្រទេសកម្ពុជារងផលប៉ះពាល់ យ៉ាងធ្ងន់ធ្ងរ ស្ទើរតែគ្រប់វិស័យ ប៉ុន្ដែសម្រាប់ផ្នែកវិស័យកសិកម្មមួយ ហាក់ដូចជាមានភាពលេចធ្លោខុសពីផ្នែកដទៃៗទៅវិញ។ យ៉ាងណាមិញ ដូចជាកសិកម្មផ្នែកចិញ្ចឹម មាន់ស្រែជាដើម ត្រូវបានគេមើលឃើញថា កំពុងតែមានប្រជាប្រិយភាពខ្លាំងនៅតាមបណ្ដាខេត្ដ និងតំបន់ក្បែរទីក្រុងផងដែរ។

យោងតាមការធ្វើបទសម្ភាសន៍តាមរយៈទូរស័ព្ទជាមួយនឹង យុវជនមួយរូប ឈ្មោះ ញឹម ឡុងស្រេង ដែលរស់នៅ ភូមិផ្អាវ ឃុំផ្អាវ ស្រុកបាធាយ ខេត្ដកំពង់ចាម បច្ចុប្ប្នគាត់បានសាកល្បងចិញ្ចឹមមាន់ស្រែ​បែបទំនើបដោយសាកល្បងដាក់កូនមាន់ចំនួន ១៥០ក្បាល ទៅ ២០០ក្បាល ហើយទទួលបានលទ្ធផលល្អប្រសើរ ក្នុងគម្រោងទី១​របស់គាត់។

គាត់បានប្រាប់ភ្នាក់ងារព័ត៌មាន Wetv ថា មូលហេតុដែលគាត់សាកល្បងចាប់យកអាជីបបន្ថែម នៃការចិញ្ចឹមមាន់ស្រែនេះ គឺគិតថា​វាអាចផ្ដល់ប្រាក់ចំណូលបន្ថែម​ជួយដល់ជីវភាពគ្រួសារ និងម្យ៉ាងវិញទៀត ការចិញ្ចឹមមាន់ស្រែនេះ វាមានទីផ្សារថ្លៃគ្រាន់បើ អាចចន្លោះពី១៥០០០៛ ទៅ ១៨០០០៛ ឬអាចដល់ទៅ ២០០០០៛ ក្នុងមួយគីឡូ អាស្រ័យលើ ស្ថានភាពក្នុងឱកាសបុណ្យទានផ្សេងៗ។ ការចិញ្ចឹមមាន់ស្រែនេះ មានលក្ខណៈងាយស្រួលចិញ្ចឹម ហើយការចំណាយ ក៏មិនស្រូវច្រើន ពិសេសវាងាយស្រួល​ស្វែងរកទីផ្សារលក់ចេញទៀតផង។ យុវជនរូបនេះក៏បានបន្ថែមទៀតថា ការចិញ្ចឹមមាន់ស្រែរបស់គាត់​ គឺត្រូវបានសិក្សាតាមបច្ចេកទេសកសិកម្ម ទាំងអស់ ដូច​ជា​ការ​ផ្ដល់ចំណី ការប្រើប្រាស់វ៉ាក់សាំង ក្នុងកំលុងពេល​ពេលមាន់គ្រប់ពេលវេលា​របស់វា។ ហើយជំហានបន្ទាប់ គាត់គ្រោងនឹងពង្រឹកគម្រោងបន្ថែម នៅពេលខាងមុខ ដើម្បីបំពេញតម្រូវការ ទីផ្សារ។

ស្របគ្នាទៅនឹងយន្ដការរបស់រដ្ឋាភិបាលកម្ពុជា ​ដែលធ្លាប់លើកឡើងកាលពីពេលថ្មីៗនេះ ស្ដីអំពីការ កើនឡើងនូវតម្រូវការទីផ្សារ​ផលិតផលកសិកម្មក្នុងស្រុក ខណៈដែលកម្ពុជាបានចំណាយថវិការរាប់រយលានដុល្លារ ក្នុងមួយឆ្នាំៗ​ដើម្បីនាំចូលផលិតផលទាំងនោះ ពីបណ្ដាប្រទេសជិតខាង។

អត្ថបទដោយ៖ Stince