ជាធម្មតា ម៉ាក់ប៉ាគ្រប់រូប តែងតែចង់ឲ្យកូនតូចញ៉ាំអាហារល្អៗគ្រប់គ្រាន់សម្រាប់ការលូតលាស់ ហើយភាគច្រើនឃើញកូនមានរូបរាងស្គមស្គាំងចេះតែបារម្ភ រកនឹកគ្រប់វិធីដើម្បីឲ្យឡើងទម្ងន់តាមស្តង់ដារ។ ទាក់ទងនឹងបញ្ហានេះ លោកស្រីវេជ្ជបណ្ឌិត កុសល កណិការ ឯកទេសជំងឺកុមារបានឲ្យដឹងថា ការដែលចង់ឲ្យកូនឡើងគីឡូមិនមែនជារឿងពិបាកទេ បើធ្វើតាមតិចនិកខាងក្រោម ហើយអាហារដែលជួយកូនឲ្យឡើងគីឡូផ្ដើមចេញពីអាហារគ្រឹះគ្រប់មុខដូចជា៖
១. ឧស្សាហ៍ធ្វើជាប្រភេទទឹកស៊ុបឲ្យកូនញ៉ាំ ឬយកទឹកស៊ុបទៅដាំបាយ បបរឬធ្វើម្ហូបឲ្យកូន ដើម្បីទទួលបានវីតាមីនបន្ថែម (អាចយកទឹកស៊ុបប្រើជំនួសទឹកស្អាត)
២. ផ្ដល់វីតាមីនចម្រុះឲ្យកូនជាមួយ ប្រភេទអាហារដែលមានប្រូតេអ៊ីន និងផ្ដល់ថាមពលខ្ពស់ដូចជា ដំឡូង ចេក ប៊ើរ ស៊ុត ប្រភេទគ្រាប់ធញ្ញជាតិដែលមានជាតិម្សៅ ឬប្រភេទធញ្ញជាតិប្រើជំនួសបាយបាន
៣. បន្ថែមប្រភេទដំណាប់ផ្លែឈើដែលគ្មានជាតិស្ករ ដើម្បីជួយឲ្យកូនមានថាមពល និងជាប្រភពកាបូអ៊ីដ្រាតល្អបំផុតសម្រាប់កុមារ
៤. ញ៉ាំទឹកឲ្យបានគ្រប់គ្រាន់ទៅតាមអាយុកូន
៥. ទម្លាប់កូនឲ្យគេងទៀងទាត់ល្អ។ល។
គួរជម្រាបផងដែរថា បើម៉ាក់ប៉ាបារម្ភពីការលូតលាស់កាយសម្បទាកូន គួរយកកូនទៅពិគ្រោះជាមួយពេទ្យជំនាញ និងសុំគ្រូពេទ្យពិនិត្យតាមការជាក់ស្ដែងជាជម្រើសល្អបំផុត។
អត្ថបទដោយ៖ ពិសី
