ដោយៈ ទិន សុខាវុធ
អ្នកជំនាញវិស័យអចលនទ្រព្យមានក្តីបារម្ភថា ការបិទកាស៊ីណូនៅលើបណ្តាញ Internet ដែលភាគច្រើនវិនិយោគដោយក្រុមហ៊ុនចិន កំពុងបន្តធ្វើអោយតំលៃអចលនទ្រព្យនៅក្នុងខេត្តព្រះសីហនុ ត្រូវធ្លាក់ចុះ។
យោងតាមលោក គីម ហ៊ាង ប្រធានក្រុមហ៊ុនខ្មែររៀលអេស្តេត ការធ្លាក់ចុះនៃតំលៃអចលនទ្រព្យនៅខេត្តនេះ បណ្តាលមកពីកាស៊ីណូនៅលើបណ្តាញ Internet ភាគច្រើន ត្រូវបានវិនិយោគដោយក្រុមហ៊ុនចិន ហើយការបិទកាស៊ីណូទាំងនោះ បានធ្វើជនជាតិចិនជាច្រើននាក់ចាកចេញពីកម្ពុជា។ ជាលទ្ធផល បណ្តាអចលនទ្រព្យទាំងឡាយ ដែលធ្លាប់ត្រូវបានជួលដោយជនជាតិចិន ត្រូវបានទុកចោល ព្រោះគ្មានទីផ្សារ។
លោក គឺម ហ៊ាង បានបន្ថែមទៀតថា ផលប៉ះពាល់ទៅលើវិស័យអចលនទ្រព្យ មិនត្រឹមតែនៅក្នុងខេត្តព្រះសីហនុតែប៉ុណ្ណោះទេ ខេត្តមួយចំនួនទៀត ដែលធ្លាប់មានកាស៊ីណូលើបណ្តាញ Internet ក៏ត្រូវបានប៉ះពាល់ដូចគ្នាដែរ មានដូចជាខេត្តព្រៃវែង ដែលធ្លាប់មានកាស៊ីណូប្រភេទនេះក្នុងក្រុងបាវិត ខេត្តបាត់ដំបងដែលធ្លាប់មានកាស៊ីណូដូចគ្នានេះក្នុងក្រុងប៉ោយប៉ែត រួមទាំងក្រុងភ្នំពេញផងដែរ។
យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា ហៅកាត់ថា CDC ដែលជាស្ថាប័នមួយរបស់រាជរដ្ឋាភិបាល គិតចាប់ពីឆ្នាំ ២០១៦ មកទល់នឹងខែ សីហា ឆ្នាំ ២០១៩ នេះ ទំហំវិនិយោគចិនក្នុងខេត្តព្រះសីហនុ បានកើនដល់ចំនួនប្រមាណជា $2,000 លានដុល្លារ គឺស្មើនឹង ៨.៩% នៃទុនវិនិយោគសរុប។
ទាក់ទងនឹងរឿងនេះ នៅក្នុងការជួបសន្ទនាជាមួយអ្នកវិនិយោគចិនត្រកូល«ហ៊ុន» ប្រមាណជា ៤០ នាក់ នៅឯវិមានសន្តិភាព កាលពីថ្ងៃទី ៨ ខែ តុលា ឆ្នាំ ២០១៩ លោកនាយករដ្ឋមន្ត្រីបានគូសបញ្ជាក់ពីមូលហេតុដែលរាជរដ្ឋាភិបាលបានសំរេចបិទកាស៊ីណូអនឡាញពីព្រោះវាមិនចំណេញអ្វីដល់សេដ្ឋកិច្ចកម្ពុជាឡើយ។ ផ្ទុយទៅវិញ កាស៊ីណូអនឡាញទាំងនោះនាំមកនូវបញ្ហាជាច្រើនដូចជាអំពើឧក្រឹដ្ឋកម្ម និងការលាងលុយកខ្វក់ជាដើម។
សម្តេចបានបញ្ជាក់ថា កម្ពុជាត្រូវការពង្រឹងផ្នែកច្បាប់អោយបានរឹងមាំ ក្នុងគោលបំណងទាក់ទាញវិនិយោគយ៉ាងច្បាស់លាស់ និងផ្តល់ផលចំណេញដែលអាចទទួលយកបាន។
យោងតាមសម្តេចតេជោ នៅពេលបច្ចុប្បន្ននេះ ទំហំពាណិជ្ជកម្មរវាងកម្ពុជានិងចិនមានលក្ខណៈកើនឡើងជាបន្តបន្ទាប់។ ហើយនៅក្នុងឆ្នាំ ២០២២ ទំហំពាណិជ្ជកម្មនេះអាចកើនឡើងដល់ $10 ពាន់លានដុល្លារ។
កំណើននៃទំហំពាណិជ្ជកម្មនេះ បានមកដោយសារវត្តមាននៃតំបន់សេដ្ឋកិច្ចសេរីរវាងប្រទេសអាស៊ាន តំបន់សេដ្ឋកិច្ចសេរី ចិន-អាស៊ាន និងតំបន់សេដ្ឋកិច្ច អាស៊ាន-ចិន។ លើសពីនេះទៀត កិច្ចសហប្រតិបត្តិការយុទ្ធសាស្ត្រគ្រប់ជ្រុងជ្រោយរវាងចិននិងកម្ពុជា ក៏ជាកត្តាមួយជួយជំរុញអោយមានកំណើនទំហំពាណិជ្ជកម្មនេះដែរ៕