កិច្ចព្រមព្រៀងពាណិជ្ជកម្មសេរីរវាងកម្ពុជា និងចិន ដែលបានចរចាអស់រយៈពេលជាច្រើនខែ នឹងត្រូវចុះហត្ថលេខា ខណៈឯកឧត្តម វ៉ាង យី រដ្ឋមន្ត្រីក្រសួងការបរទេសចិន កំពុងមានវត្តក្នុងដំណើរទស្សនកិច្ចនៅកម្ពុជា រយៈពេល ២ថ្ងៃ។
ឯកឧត្ដម វ៉ាង យី បានអញ្ជើញមកដល់កម្ពុជាកាលពីរសៀលថ្ងៃទី១១ ខែតុលា ឆ្នាំ២០២០ តាមជើងយន្តហោះពិសេស ដើម្បីបំពេញទស្សនកិច្ចផ្លូវការរយៈពេលពីរថ្ងៃនៅកម្ពុជា (ថ្ងៃទី១១-១២ ខែតុលា ឆ្នាំ២០២០)។ ក្នុងដំណើរទស្សនកិច្ចនេះដែរ ឯកឧត្តមនឹងអញ្ជើញចូលជួបសម្តែងការគួរសមចំពោះ សម្តេច ហ៊ុន សែន និងជួបពិភាក្សាការងារជាមួយ ឯកឧត្តម ហោ ណាំហុង។ មិនតែប៉ុណ្ណោះ ឯកឧត្ដម វ៉ាង យី នឹងមានជំនួបប្រជុំផ្លូវការជាមួយឯកឧត្តម ប្រាក់ សុខុន ផងដែរ ដើម្បីពិភាក្សាលើកិច្ចសហប្រតិបត្តិការទ្វេភាគីក្នុងវិស័យនានា។
ជាមួយគ្នានេះ សម្ដេចតេជោ នឹងអញ្ជើញធ្វើជាសាក្សីក្នុងពិធីចុះហត្ថលេខាលើកិច្ចព្រមព្រៀងពាណិជ្ជកម្មសេរីកម្ពុជា-ចិន និងឯកសារសំខាន់០២ ទៀតរួមមាន លិខិតប្ដូរសារស្ដីពីការសិក្សាសមិទ្ធិលទ្ធភាពគម្រោងធ្វើឱ្យប្រសើរឡើងមន្ទីរពេទ្យបង្អែកខេត្តព្រះសីហនុ និងលិខិតប្ដូរសារស្ដីពីការសិក្សាសមិទ្ធិលទ្ធភាពគម្រោងអភិវឌ្ឍន៍ហេដ្ឋារចនាសម្ព័ន្ធប្រព័ន្ធលូ និងប្រព្រឹត្តកម្មទឹកកខ្វក់នៅខេត្តព្រះសីហនុ។
សូមជម្រាបថា កិច្ចព្រមព្រៀងពាណិជ្ជកម្មសេរីរវាងកម្ពុជា-ចិន នឹងជួយឲ្យទំនិញកម្ពុជារាប់ម៉ឺនមុខនាំចូលទៅកាន់ទីផ្សារប្រទេសចិន ដែលវានឹងធ្វើឲ្យកំណើនសេដ្ឋកិច្ច និងការអភិវឌ្ឍន៍របស់កម្ពុជាកាន់តែរីកចម្រើនទៅមុខកាន់តែលឿនថែមទៀតផងដែរ។
អត្ថបទដោយ៖ Nevin