We TV Cambodia

​ពហុ​កីឡដ្ឋានជាតិ​​​មរតក​តេជោ​ នឹង​ត្រូវ​សង់​រួច​​នៅ​ចុងឆ្នាំ​ ២០២០​

​ពហុ​កីឡដ្ឋានជាតិ​​​មរតក​តេជោ​ នឹង​ត្រូវ​សង់​រួច​​នៅ​ចុងឆ្នាំ​ ២០២០​

ដោយៈ ទិន សុខាវុធ

ពហុកីឡាដ្ឋានជាតិ​មរតក​តេជោ ដែល​ត្រូវ​បាន​និង​កំពុង​សាងសង់​ឡើង​​នៅ​លើ​ផ្ទៃ​ដី​ប្រមាណ​ជា​ជាង ៨៥ ហិកតា ដោយ​ក្រុមហ៊ុន​របស់​លោក​ឧកញ្ញា​ លី យ៉ុងផាត់ គ្រោង​នឹង​សម្ពោធ​ដាក់​អោយ​ប្រើប្រាស់​នៅ​ចុង​ឆ្នាំ ២០២០ នេះ​។

យោង​តាម​ទំព័រ​ Facebook របស់​ពហុកីឡាដ្ឋាន​​ជាតិ​មរតក​តេជោ រហូត​មក​ដល់​ពេល​បច្ចុប្បន្ន​នេះ អ្វីៗ​ទាំងអស់​ត្រូវ​បាន​សង់​ឡើងរួច​រាល់​អស់​ហើយ នៅតែ​ដំបូល​ពហុកីឡាដ្ឋាន​តែ​ប៉ុណ្ណោះ​។

« បានបញ្ចប់បង្គុំសំណង់ ១០០% ហើយកំពុងបន្តតម្លើងដំបូល ។ គម្រោងទាំងមូលនឹងបញ្ចប់ចុងឆ្នាំ២០២០ខាងមុខ» នេះ​ជា​សំណេររបស់​ពហុកីឡាដ្ឋាន​ជាតិ​មរតក​នៅ​លើ​ទំព័រ​ Facebook របស់​ពួ​ក​គេ​។

ទំព័រ Facebook របស់ពហុកីឡាដ្ឋាន​នេះ បាន​អោយ​ដឹង​ទៀត​ថា នៅ​ពេលសង់រួច កីឡាដ្ឋាន​​មួយ​នេះ​នឹងមាន​សាល​កីឡា​ផ្សេង​ៗ​ជា​ច្រើន មាន​ដូចជា​សាល​​កីឡា​ហែល​ទឹក សាល​កីឡា​ប្រយុទ្ធ សាល​ហាត់សាច់​ដុំ សាល​បាល់​បោះ សាល​បាល់​ទះ សាលកាយ​សម្ព័ន្ធ សាល​កីឡា​បាញ់​កាភ្លើង សាល​កីឡា​ហុកគី និង​សាល​កីឡា​​ជា​ប្រពៃណីផ្សេង​ៗ​ទៀត​។

លើស​ពី​នេះ​ទៀត នៅ​ក្នុង​ពហុកីឡាដ្ឋាន​នេះ ក៏​នឹងមាន​ផង​ដែរ​នូវ​អគារ​ស្នាក់​នៅ អាហារដ្ឋាន ទីលាន​ហ្វឹកហាត់​ក្រៅ​អាគារ និង​សាល​វេជ្ជសាស្ត្រ​​ជា​ដើម​។

ពហុកីឡាដ្ឋានជាតិ​មរតកតេជោ ត្រូវ​បាន​និងកំពុង​សាងសង់​ឡើង​​នៅ​ក្រោម​ហិរញ្ញប្បទានឥ​ត​សំណង​របស់​រដ្ឋាភិបាល​ចិន​​ចំនួន​ប្រមាណ $160 លាន​ដុល្លារ​។ សំណង់​នេះ​ត្រូវ​​បាន​សម្ពោធ​ចាប់​ផ្តើម​ការសាងសង់​កាល​ពី​ឆ្នាំ ២០១៣ កន្លង​ទៅ​។

យ៉ាង​ណា​ម៉ិញ ពហុកីឡាដ្ឋាន​ជាតិមរតក​តេជោ ស្ថិត​នៅ​​ក្នុង​សង្កាត់​ព្រែក​តាសេក ខណ្ឌ​ជ្រោយ​ចង្វារ រាជ​ធានី​ភ្នំពេញ​។ នៅ​ពេល​សង់​រួច​ ពហុកីឡាដ្ឋាន​នេះ​​នឹង​មានសមត្ថភាពអាច​អោយ​ទស្សនិក​ជន​ចំនួន​ប្រមាណ ៧ ម៉ឺននាក់​ចូល​ទស្សនា​ការប្រកួតកីឡា​ផ្សេង​ៗ​នៅ​ក្នុង​ពហុកីឡាដ្ឋាន​​។

មួយវិញទៀត នៅ​ពេល​សង់​រួច ពហុកីឡាដ្ឋាន​ជាតិ​មរតកតេជោ​​នឹងត្រៀម​ទទួល​រៀបចំ​ការប្រកួត​កីឡា​អាស៊ី​អាគ្នេយ៍ (SEA Games) លើក​ទី ៣២ នៅ​ក្នុង​ឆ្នាំ ២០២៣ ខាង​មុខ​នេះ ដែល​នៅ​ពេល​នោះ កម្ពុជា​នឹង​ធ្វើ​ជា​ម្ខាស់​ផ្ទះ​ ក្នុង​ការរៀបចំ​ការប្រកួតកីឡា SEA Games នេះ​៕

Related Articles