We TV Cambodia

៤ ចំណុចជួយអោយអ្នកមានចំណូលទាប អាចមានផ្ទះរស់នៅក្នុងទីក្រុងបាន

៤ ចំណុចជួយអោយអ្នកមានចំណូលទាប អាចមានផ្ទះរស់នៅក្នុងទីក្រុងបាន
រូបថតៈ ធនាគារអភិវឌ្ឍន៍អាស៊ី

ដោយៈ ទិន សុខាវុធ

លោក Matthias Helble អ្នកស្រាវជ្រាវ​ផ្នែកសេដ្ឋកិច្ច ប្រចាំ​នៅ​ធនាគារអភិវឌ្ឍន៍អាស៊ី (ADB) នៅ​ក្នុង​បទវិភាគមួយ​មាន​ចំណង​ជើង​ថា «The housing unaffordability crisis in Asia» ​ចុះ​ផ្សាយ​នៅ​លើគេហទំព័រ​របស់ ADB បាន​លើកឡើងថា អ្នកមាន​ចំណួលទាប​និង​មធ្យម​នៅក្នុង​ទ្វីបអាស៊ី កំពុង​ជួបប្រទះនឹង​បញ្ហា​តំលៃ​ផ្ទះ​ថ្លៃ ខណៈ​ដែល​បញ្ហានេះ​អាច​ត្រូវ​ដោះស្រាយ​បាន ដោយ​ប្រើប្រាស់​មធ្យោបាយ​មួយ​ចំនួន​។

«The poor and middle class are struggling to find affordable housing across the region, but there are some basic steps cities can take to improve the situation,» នេះ​ជា​សំណេររបស់​លោក Matthias Helble នៅក្នុង​បទវិភាគរបស់​លោក​។

យ៉ាងណាម៉ិញ លោក​បានបន្ថែមទៀត​ថា តំលៃ​ផ្ទះ​ខ្ពស់​នេះ​ក្រៅ​ពី​មាន​ផលប៉ះពាល់​ដល់​បុគ្គលម្នា់ក់​ៗ​ទាក់​ទង​នឹងបញ្ហា​លំនៅដ្ឋាន វា​ក៏​ជះ​ឥទ្ធិពលផង​ដែរ​នៅ​លើ​សេដ្ឋកិច្ច​ជាតិ​ទាំងមូល​។ ដោយហេតុថា កន្លង​មក ផ្ទះ​នៅ​ក្នុង​ទីក្រុង​​មានតំលៃ​កាន់​តែ​ខ្ពស់ អ្នកមាន​ចំណូល​ទាប​និងមធ្យម​​គ្មាន​សមត្ថភាព​​អាច​រស់​នៅក្នុង​ទីក្រុង​បានឡើយ ពួកគេបាន​សំរេចចិត្ត​ទៅ​រស់នៅតាមតំបន់ជាយ​ក្រុង​។

កត្តា​នេះ​ធ្វើអោយពួកគេត្រូវ​​ប្រើពេល​វេលា​យ៉ាង​​យូរ​ ដើម្បី​ធ្វើ​ដំណើរមក​ធ្វើការ​នៅ​ក្នុង​ទីក្រុង​។ ជាលទ្ធផល ប្រសិទ្ធភាព​ការងារ​នៅ​ក្នុង​ទីក្រុង​​ត្រូវ​ធ្លាក់​ចុះ ដែលជា​ហេតុផលមួយ​ជះ​ឥទ្ធិពល​ដ៏​អាក្រក់​ទៅ​លើ​សេដ្ឋកិច្ច​​​នៅ​ក្នុង​ទីក្រុង​​។

យោង​តាម​លោក Matthias Helble កំណើននៃ​ប្រជាពលរដ្ឋចូលមករស់​នៅ​ក្នុង​ទីក្រុង​នៅ​ក្នុង​ទ្វី​បអាស៊ី​ជាង​ ៣ ទសវត្ស​កន្លង​មកនេះ ជាប្រការ​ដ៏​ល្អ​​​មួយ​ជួយ​អោយ​មានកំណើនសេដ្ឋកិច្ចនៅ​ក្នុងប្រទេស​និមួយ​ៗ​។

អាស្រ័យ​ហេតុ​នេះ បណ្តាប្រទេស​ទាំងឡាយ​នៅ​ក្នុង​ទ្វីប​អាស៊ី ចាំបាច់​ត្រូវ​ដោះស្រាយ​បញ្ហាលំនៅដ្ឋាន អោយ​ប្រជាពលរដ្ឋដែល​បាន​សំរេច​ចិត្ត​ចូល​មករស់​នៅ​ក្នុង​ទីក្រុង ព្រោះ​ពួក​គេ​ជាកំលាំងពលកម្មដ៏​ចាំបាច់ សំរាប់ធ្វើអោយ​មាន​កំណើន​សេដ្ឋកិច្ច​នៅ​ក្នុង​ទីក្រុង​ទាំងឡាយ​។

​ហើយ​ដើម្បីដោះស្រាយ​បញ្ហា​លំនៅ​ដ្ឋាន​នេះ លោក Matthias Helble បានគូស​បញ្ជាក់​ថា ក្រុមស្រាវជ្រាវ​ផ្នែកសេដ្ឋកិច្ច ប្រចាំ​នៅ​ធនាគារអភិវឌ្ឍន៍​អាស៊ីរបស់​លោក បាន​រកឃើញ​មធ្យោបាយ​ចំនួន​ ៤ ដែលអាចជួយ​អោយ​អ្នកមានចំណូលទាប​ អាច​មានលទ្ធភាព​រស់នៅ​ក្នុងទីក្រុង​បាន​។ មធ្យោបាយទាំងនោះរួម​មាន​៖

១. មុន​នឹង​ឈានទៅ​ដោះស្រាយ​បញ្ហា​លំនៅដ្ឋាន ចាំបាច់​ត្រូវ​មាន​ «ទិន្នន័យ» (data) ទាក់ទង​នឹងបញ្ហានេះ​អោយ​បានគ្រប់គ្រាន់​ជា​មុន​សិន ព្រោះបើគ្មានទិន្នន័យ​ទេ​ ​ពិតជា​ពិបាកនឹង​កំណត់នូវ​គោលនយោបាយ​ផ្ទះសំបែង​ណា​មួយ​អោយ​បានត្រឹមត្រូវ​ណាស់​។

២. ត្រូវ​ធ្វើយ៉ាង​ណា​​ផ្តល់​ដីឡូតិ៍​ក្នុង​តំលៃទាប សំរាប់ការសាងសង់​លំនៅដ្ឋាន​។ ជាទូទៅ តំលៃដី​ឡូតិ៍​មានទំនាក់ទំនងយ៉ាង​ជិតស្និទ្ធិ​ទៅ​នឹងតំលៃ​ផ្ទះ បានន័យ​ថា​​បើដីឡូតិ៍ថោក ផ្ទះ​ក៏​ថោក បើដីឡូតិ៍​ថ្លៃ​ ផ្ទះ​ក៏​ថ្លៃ​។ ឧទាហរណ៍ ដើម្បី​អោយ​អ្នកមានចំណូល​មធ្យម ​អាច​រស់​នៅ​ក្នុង​ផ្ទះ​ក្នុង​តំលៃ​ដ៏​សម​រម្យ​បាន រដ្ឋាភិបាលនៃ​ប្រទេស​សិង្ហបុរីបានផ្តល់ដី​ឡូតិ៍​មាន​តំលៃថោក អោយ​ដល់​ក្រុមហ៊ុន​​សាងសង់​លំនៅដ្ឋាន​ទាំងឡាយ​។

៣. យោង​តាម​ការស្រាវជ្រាវ​មួយ​ ធ្វើ​ឡើង​នៅ​សហរដ្ឋ​អាមេរិក ប្រព័ន្ធ​ដឹកជញ្ជូនអ្នកដំណើរ​ដ៏​ល្អមួយ អាច​ធ្វើ​អោយ​តំលៃ​លំនៅ​ដ្ឋានថយ​ចុះ ដ៏គួរ​អោយ​កត់សំគាល់ ដោយ​ហេតុថា តំរូវ​ការលំនៅដ្នានរស់នៅក្នុង​ទីក្រុង​នៅ​ជិតកន្លែងធ្វើការត្រូវ​ថយ​ចុះ ពីព្រោះ​បុគ្គលិក កម្មករ និង និយោជិក អាច​ជិះ​រថយន្ត​ក្រុង​ឬ​មេត្រូ​មក​ធ្វើការទាន់ពេលវេលា ទោះបីជា​ពួកគេរស់​នៅ​ក្នុងតំបន់ជាយ​ក្រុង​យ៉ាង​ណាក៏​ដោយ​។

៤. ចុង​ក្រោយ​បង្អស់ ការលើកស្ទួយ​ទីផ្សារនៃ​ការជួលផ្ទះ ក៏​​ជា​កត្តា​មួយ​ជួយ​សំរួល​ដល់ការតាំង​លំនៅដ្ឋាននៅ​ក្នុង​ទីក្រុង​ផង​ដែរ​។ ចំពោះ​រឿង​នេះ រដ្ឋាភិបាល​ក៏​អាច​ដើរតួនាទី​ដ៏​សំខាន់ផងដែរ ក្នុងការពង្រីកទីផ្សារ​នៃ​ការជួល​ផ្ទះនេះ​៕

Related Articles