ដោយ ហួ ឆេងស៊ីម
ភ្នំពេញ៖ មនុស្សម្នាក់ៗតែងតែមានភាពមមាញឹកនឹងការងារ ឬការសិក្សារៀងៗខ្លួន ដែលបណ្តាឲ្យពួកគេពុំមានពេលវេលាគ្រប់គ្រាន់សម្រាប់ឪពុកម្តាយចាស់ជរាដែលនៅផ្ទះ។
មនុស្សចាស់ភាគច្រើនគឺមានអារម្មណ៍តានតឹងច្រើននៅពេលដែលគាត់ពុំមានអ្នកមើលថែទាំឲ្យបានកក់ក្តៅ និងមានភាពឯកា។ មនុស្សចាស់ដែលរស់នៅក្នុងភាពឯកោយូរ ច្រើនតែប្រឈមនឹងអត្រាមរណភាពខ្ពស់ យោងតាមការសិក្សាពីសាកលវិទ្យាល័យនៅសហរដ្ឋអាមេរិក ២៣% នៃមនុស្សចាស់ជរាឯកោ បានស្លាប់ក្នុងរយៈពេល ៦ ឆ្នាំ និង ១៤% នៃមនុស្សចាស់មានសាច់ញាតិនិងមិត្តភក្តិបានស្លាប់ក្នុងអំឡុងពេលនេះ។
ប្រសិនបើអ្នកចង់ឲ្យឪពុកម្ដាយរស់នៅជាមួយអ្នកបានយូរ អ្នកត្រូវចំណាយពេលឲ្យបានច្រើនជាមួយលោកទាំងពីរ។ នេះជាឱសថទិព្វជួយបង្កើនអាយុដល់អ្នកមានគុណបាន។
បន្ថែមពីនេះ អ្នកក៏គួរចែករំលែករឿងល្អៗ អារម្មណ៍សប្បាយរីករាយ រួមទាំងការជជែកលេងឲ្យបានច្រើនជាមួយឪពុកម្ដាយ។ មនុស្សគ្រប់គ្នាតែងតែរវល់ តែយ៉ាងហោចណាស់ក៏ត្រូវឆ្លៀតពេលដើម្បីនៅជាមួយឪពុកម្តាយដើម្បីបង្កើនភាពរីករាយដល់ពួកគាត់ខ្លះដែរ។
បើសិនអ្នកមានកូនៗនៅផ្ទះ ក៏ត្រូវបង្ហាត់កូនឲ្យមានទំនាក់ទំនងជាមួយលោកតាលោកយាយរបស់គេ។ កុំគិតតែពីការងារ មុខជូរហួញ ធ្វើឲ្យឪពុកម្ដាយមិនសប្បាយចិត្តដែរ។
ម្យ៉ាងទៀត គួរឆ្លៀតពេលនាំឪពុកម្ដាយទៅដើរលេង សម្រេចបំណងប្រាថ្នាដែលលោកចង់ធ្វើជាយូរមកហើយ។ ទាំងនេះជាតម្លៃនៃអនុស្សាវរីយ៍ដែលមិនអាចកាត់ថ្លៃបាន៕
