សឹង្ហបុរី៖ ឧស្សាហកម្មទេសចរណ៍របស់ប្រទេសសឹង្ហបុរី នឹងព្យាករណ៍ថាឈានដល់ការធ្លាក់ចុះយ៉ាងខ្លាំង ដោយចន្លោះតួលេខ ចាប់ពី ២៥% ទៅ ៣០% ក្នុងឆ្នាំនេះដោយសារជម្ងឺកូរ៉ូណា ជាពិសេសនោះគឺអ្នកដំណើរជនជាតិចិន ដែលមានចំនួនប្រមាណ២០% នៃភ្ញៀវទេសចរណ៍សរុបរបស់សឹង្ហបុរី។ នេះបើយោងតាមការប្រកាសដោយក្រុមប្រឹក្សាទេសចរណ៍សឹង្ហបុរី( STB) កាលពីថ្ងៃអង្គារ។
បើតាម ការព្យាករណ៍នៅក្នុងឧស្សាហកម្មទេសចរណ៍សឹង្ហបុរីនៅឆ្នាំ ២០២០ នឹងមានការធ្លាក់ចុះច្រើន បើធៀបនឹងឆ្នាំ ២០១៩ ដែលមានប្រមាណ ១៩.១ លាននាក់ ហើយចំណូលពីវិស័យទេសចរណ៍មានចំនួនប្រមាណជា ១៩.៥ ពាន់លានដុល្លារអាមេរិក កាលពីឆ្នាំ២០១៩។
ដោយឡែក ប្រទេសចិនគឺជាប្រភពគោលដៅទេសចរណ៍ធំជាងគេរបស់សឹង្ហបុរី បន្ទាប់ពីឥណ្ឌូនេស៊ី និងឥណ្ឌា។ ហើយកាលពីឆ្នាំ២០១៩ ភ្ញៀវទេសចរណ៍មានការកើនឡើង៣.៣% ដែលមានចំនួន១៩.១លាននាក់ បើធៀបទៅនឹងឆ្នាំ២០១៨។
សូមជម្រាបថា ការចំណាយសរុបជាទឹកប្រាក់ដែលសឹង្ហបុរី ទទួលបានពីវិស័យទេសចរណ៍ ដែលមានប្រមាណ២៧.១ពាន់លានដុល្លារសឹង្ហបុរី ហើយមានប្រហែល ១៦៣ លាននាក់ ជាភ្ញៀវទេសចរជនជាតិចិន បានធ្វើដំណើរកម្សាន្ដនៅក្រៅប្រទេសកាលពីឆ្នាំ២០១៨ ហើយមានប្រមាណជាង ៣០% នៃការចំណាយធ្វើដំណើរនៅទូទាំងពិភពលោក។
យោងតាម សារព័ត៍មានក្នុងស្រុក មួយបាន លើកពី លោក Keith Tan ដែលជាប្រធាននាយកប្រតិបត្តិនៃ (STB)និយាយថា៖« ប្រទេសសឹង្ហបុរីកំពុងតែបាត់បង់ភ្ញៀវទេសចរណ៍ចំនួន ១៨ម៉ឺន ទៅ ២០ម៉ឺននាក់ក្នុងមួយថ្ងៃ ហើយការបាត់បង់អ្នកទេសចរណ៍ភាគច្រើនគឺជាជនជាតិដោយសារតែមានការរឹងបណ្តឹងការធ្វើដំណើររបស់ប្រទេសទាំងពីរ»។
គួរបញ្ជាក់ផងដែរថា ឥទ្ធិពលវីរុសកូរ៉ូណា គឺមានផលប៉ះពាល់ខ្លាំងជាងការរាតត្បាតនៃជំងឺសារ (Sars) កាលពីឆ្នាំ ២០០៣ ទៅទៀត ពីព្រោះកាលពីអំឡុងផ្ទុះនូវជម្ងឺសារ កាលពីឆ្នាំ២០០៣ ប្រទេសសឹង្ហបុរីបានធ្លាក់ចុះចំនួនភ្ញៀវទេសចរណ៍ប្រមាណ ១៨% ទៅ ១៩% ប៉ុណ្ណោះ៕
ប្រភព៖ សារព័ត៍មានក្នុងស្រុក
