We TV Cambodia

ឧបនាយករដ្ឋមន្ត្រីៈ បង្កើនទំហំវិនិយោគ ដើម្បីបង្កើតការងារក្នុងស្រុក ដោះស្រាយបញ្ហាចំណាកស្រុកធ្វើការក្រៅប្រទេស

ដោយៈ ទិន សុខាវុធ

លោក​ឧបនាយក​រដ្ឋ​មន្ត្រី ស ខេង បាន​គូស​បញ្ជាក់​ថា ដើម្បីដោះស្រាយ​បញ្ហា​​ចំណាកស្រុក​ទៅ​ធ្វើការ​ក្រៅ​ប្រទេស រដ្ឋាភិបាល​នៃ​ប្រទេស​​ដែល​កំពុង​ជួបនឹងបញ្ហា​នេះ ត្រូវ​តែ​បង្កើន​ទំហំវិនិយោគក្នុង​ប្រទេស អោយ​​កាន់តែ​ច្រើនឡើង​ថែមទៀត ក្នុង​គោល​បំណង​បង្កើតការងារអោយបា​នកាន់តែ​ច្រើន​នៅ​​ក្នុង​ប្រទេស សំរាប់ប្រជា​​ពលរដ្ឋ​។

ការលើក​ឡើង​របស់​លោក​ឧបនាយក​រដ្ឋ​មន្ត្រី ស ខេង ត្រូវ​បាន​ធ្វើ​ឡើង​នៅ​ក្នុង​កិច្ចប្រជុំពិគ្រោះ​យោបល់​លើក​ទី ២ នៅ​ខេត្ត​សៀមរាប កាលពី​ថ្ងៃ​ទី ៣០​ ខែ តុលា ឆ្នាំ ២០១៩ រវាង​​ថ្នាក់ដឹកនាំ​បច្ចេកទេស​នៃ​ប្រទេស​កម្ពុជា ឡាវ និង មីយ៉ានម៉ា (CML) ដែល​មាន​ពលករ​ធ្វើចំណាក​ស្រុក​ទៅ​ធ្វើការ​នៅ​ប្រទេស​ក្រៅ ជាពិសេស​ប្រទេស​ថៃ​។

លោកឧបនាយក​រដ្ឋ​មន្ត្រី​ក៏​បានលើក​ឡើងផង​ដែរ​ថា ប្រទេស​ដែល​មាន​ពលករ​ចំណាកស្រុក​ទៅ​ធ្វើការនៅ​បរទេស (CLM) ត្រូវ​ធ្វើ​យ៉ាងណាការពារ​ផលប្រយោជន៍​របស់​ពលករ​នៅប្រទេស​ក្រៅ និងព្រម​ពេល​ជាមួយ​គ្នា ត្រូវ​ដោះស្រាយ​បញ្ហា​ចំណាក​ស្រុក​នេះ​អោយ​ចំ​គោលដៅ​។

ក៏ប៉ុន្តែ សម្តេច ស ខេង ក៏​បាន​លើក​ឡើងផង​ដែរ​ថា បញ្ហាចំណាក​ស្រុក​ទៅ​ធ្វើ​នៅក្រៅ​ប្រទេស មាន​នៅ​ស្ទើរ​គ្រប់​ប្រទេស មិនថា​ជា​ប្រទេស​កំពុង​អភិវឌ្ឍ ឬ​ប្រទេស​អភិវឌ្ឍន៍​ឡើយ។ សូម្បី​តែ​ប្រទេស​ថៃ​ខ្លួន​ឯង ក៏​មានពលករចំណាកស្រុកទៅ​ធ្វើការនៅក្រៅ​ប្រទេស​ដែរ​។

មួយវិញទៀត ដើម្បី​ការពារ​ផលប្រយោជន៍​របស់​​ពលករចំណាកស្រុក​ទៅ​ធ្វើការ​នៅ​​ប្រទេស​ថៃ (ពលករ​ទេសន្ដប្រវេសន៍) ប្រទេស CLM មិន​គួរ​ដាក់​សំពាធ​តែ​ទៅ​​លើប្រទេស​ថៃតែ​មួយ​នោះ​ទេ ប្រទេស CLM ត្រូវ​​ស្វែង​រកដំណោះស្រាយ​រួម​មួយ​ចំនួន ដើម្បី​យក​ទៅ​ប្រជុំ​ជជែក​ពិភាក្សា​ជាមួយ​នឹង​ប្រទេស​ថៃ​ជា​បន្ត​ទៅ​ទៀត​ ដោយ​ឈរ​លើ​គោលការណ៍​សមធម៌ និង​ផលប្រយោជន៍​រួម​គ្នា​។

ទាក់ទង​នឹង​បញ្ហា​នេះ នៅ​ក្នុងពិធី​បើក​សន្និសីទ​ថ្នាក់​រដ្ឋមន្ត្រី​ការងារ​លើក​ទី ៣ ក្នុង​ក្របខ័ណ្ឌ​ក្រុម​ប្រទេស CLMTV (កម្ពុជា ឡាវ មី​យ៉ាន់​ម៉ា ថៃ និង​វៀតណាម​) កាលពី​ថ្ងៃទី​ ១៧ ​ខែ កញ្ញា ឆ្នាំ ២០១៩ ​កន្លងទៅ​ លោក​នាយក​រដ្ឋ​មន្ត្រី ហ៊ុន សែន បាន​មានប្រសាសន៍​ថា ប្រទេស​ថៃ​ខ្លួន​ឯង​ក៏​កំពុង​ត្រូវកំលាំង​ពលកម្ម​បរទេស​​ផងដែរ អាស្រ័យហេតុនេះ ពលករ​​ចំណាកស្រុកមកពី​ប្រទេស CLM មិនមែនសុទ្ធតែ​​ជា​បញ្ហា​នោះទេ ផ្ទុយទៅវិញ ពលករ​ទេសន្តប្រវេសន៍ (migrant worker) ទាំងនោះ ក៏​កំពុង​ជួយ​អោយ​សេដ្ឋកិច្ចប្រទេស​ថៃ​រីកចំរើនផង​ដែរ​។

យោង​តាមសម្តេច​ ហ៊ុន សែន របប​សន្តិសុខសង្គម​​សំរាប់​ពលករ​ទេសន្តប្រវេសន៍ ជា​រឿង​​​ដ៏​សំខាន់​មួយ ដែលបណ្តា​ប្រទេស​ពាក់ព័ន្ធ​ទាំងអស់​ត្រូវ​យកចិត្តទុកដាក់ ដើម្បីការពារ​ផលប្រយោជន៍​រួម​គ្នា​។

ទន្ទឹមនឹងនេះ លោក​នាយក​រដ្ឋ​មន្ត្រី​ក៏​បាន​គូស​បញ្ជាក់​ផងដែរ​ថា បញ្ហា​ពលករទេសន្តប្រវេសន៍​ខុសច្បាប់ គួរ​ត្រូវ​ដោះ​ស្រាយ​ដោយ​សន្តិវិធី ពោលគឺត្រូវ​ធ្វើអោយ​ពលករទាំងនោះ​ក្លាយ​ទៅ​ជាពលករស្របច្បាប់​៕

Related Articles