We TV Cambodia

ឧបករណ៍លេងហ្គេមដ៏ល្បីរបស់ជប៉ុន Nitendo និង PSP នឹងត្រូវផលិតនៅកម្ពុជាសំរាប់នាំចេញ

ឧបករណ៍លេងហ្គេមដ៏ល្បីរបស់ជប៉ុន Nitendo និង PSP នឹងត្រូវផលិតនៅកម្ពុជាសំរាប់នាំចេញ
ឧបករណ៍លេងហ្គេម Nitendo

 
 

ដោយៈ ទិន សុខាវុធ

ក្រុមហ៊ុន​យក្ស​​ MinebeaMitsumi របស់​ជប៉ុន ដែល​ជា​ក្រុមហ៊ុន​​ផលិតឧបករណ៍​អេឡិចត្រូនិក​មួយ បានអោយ​ដឹង​ថា ក្រុមហ៊ុន​នឹង​ផ្ទេរ​ការផលិតឧបករណ៍​លេង​ហ្គេម Nitendo និង PSP អោយ​មក​នៅ​ក្នុង​ប្រទេស​កម្ពុជា​វិញ​។

ឧបករណ៍លេងហ្គេម Nitendo

យោង​តាម​ទីភ្នាក់ងា​​សារព័ត៌មាន​​​ជប៉ុន NNA ចាប់​ពី​ឆ្នាំ ២០២០ ទៅ ក្រុមហ៊ុន​យក្ស MinebeaMitsumi នឹង​​ផ្តល់​សិទ្ធិអោយ​ក្រុមហ៊ុនបុត្រ​ MinebeaMitsumi នៅ​កម្ពុជា​ តំលើង​ឧបករណ៍លេង​ហ្គេម​ទាំងនោះ ដើម្បី​នាំ​ចេញ​ទៅ​លក់​នៅ​ប្រទេស​ផ្សេង​ៗ​ទៀត​។

អាស្រ័យ​ហេតុនេះ រោងចក្រ MinebeaMitsumi នៅ​កម្ពុជា ដែល​មាន​ទីតាំង​ស្ថិត​ក្នុង​តំបន់​សេដ្ឋកិច្ច​ពិសេស​ភ្នំពេញ​ នឹងត្រូវ​បំពាក់​ដោយ​​​គ្រឿង​ម៉ាស៊ីននិង​សំភារៈ​ចាំបាច់​ទាំងឡាយ សំរាប់​តំលើង​ឧបករណ៍​លេង​ហ្គេម​ទាំងនោះ។

ឧបករណ៍​លេងហ្គេម PSP

យ៉ាងណាម៉ិញ កាល​ពី​សប្តាហ៍​មុន លោក Yoshihisa Kainuma ប្រធាន​ក្រុមហ៊ុន​ជប៉ុន MinebeaMitsumi នៅ​កម្ពុជា បានចូលជួប​លោកនាយករដ្ឋ​មន្ត្រី នៅឯវិមានសន្តិភាព និង​បានប្រកាស​ថា ក្រុមហ៊ុនមាន​គំរោង​បង្កើន​ទុន​វិនិយោគ​នៅកម្ពុជា អោយ​កើនដល់ $400 លាន​ដុល្លារ នៅ​ដំណាច់​ឆ្នាំ ២០១៩ ខាងមុខ​នេះ​។

នៅ​ក្នុង​ជំនួបនោះ លោកប្រធានក្រុមហ៊ុន​បាន​លើកឡើងថា នៅ​ក្នុង​ឆ្នាំ ២០១៨ កន្លងទៅ​នេះ ទុន​វិនិយោគ​របស់​ក្រុមហ៊ុន​របស់​លោក​បានកើនដល់​ប្រមាណជា $372 លានដុល្លារ​។ ហើយ​នៅ​ដំណាច់ឆ្នាំ ២០១៩ នេះ ទំហំទុនវិនិយោគរបស់​ក្រុមហ៊ុនរបស់​លោកនឹងកើនដល់​​ចំនួន $400 លាន​ដុល្លារ​។

លោក Yoshihisa Kainuma បានបន្ថែម​ទៀត​ថា នៅ​ពេលបច្ចុប្បន្ន​នេះ ក្រុមហ៊ុន​របស់​លោក​បាននិងកំពុង​ផលិត​ម៉ូទ័រ ឧបករណ៍ក្មេងលេង និង អំពូល​ភ្លើង​វៃឆ្លាត ដែលត្រូវ​បិទ​ផ្លាកថា Made in Cambodia ហើយ​​ដែលត្រូវ​ដាក់​លក់​នៅ​កម្ពុជា និង​នាំ​ចេញ​ទៅ​លក់​នៅ​ក្រៅ​ប្រទេស​។

លើស​ពី​នេះទៀត យោងតាមលោកប្រធានក្រុមហ៊ុន រហូត​មកដល់សព្វថ្ងៃ​នេះ ក្រុមហ៊ុនរបស់លោកបានបង្កើត​ការងារចំនួន ៧,០០០ កន្លែង​ សំរាប់​កម្មករខ្មែរ​។ ហើយ​នៅ​ពេលអនាគតដ៏​ខ្លីខាង​មុខ​នេះ ក្រុមហ៊ុនរបស់​លោកនឹងបង្កើតការងារបន្ថែមទៀត អោយ​កើនដល់​ចំនួន ២០,០០០ កន្លែង​។

ដោយឡែក​​នៅ​កម្ពុជា លោក​ប្រធានក្រុមហ៊ុន​បាន​សុំ​អោយ​លោក​នាយក​រដ្ឋ​មន្ត្រី ហ៊ុន សែន គាំទ្រផលិតផលអំពូល​ភ្លើង​វៃឆ្លាតផលិតដោយ​ក្រុមហ៊ុនរបស់លោក ដែលជា​ផលិត​ក្នុង​ស្រុក និង​ដែល​ជា​ផលិតផល​ជួយ​ការពារ​បរិស្ថាន និងជួយ​សន្សំ​សំចៃ​ការប្រើប្រាស់ប្រេងឥន្ទនៈ​និង​ចរន្តអគ្គិសនី៕

ក្រុមហ៊ុន MinebeaMitsumi នៅ​កម្ពុជា

Related Articles