We TV Cambodia

អ្នកនឹងមានបញ្ហាប្រឈមចំនួន៥ ប្រសិនបើអ្នកមិនទម្លាប់ញុំាំអាហារពេលព្រឹក

អ្នកនឹងមានបញ្ហាប្រឈមចំនួន៥ ប្រសិនបើអ្នកមិនទម្លាប់ញុំាំអាហារពេលព្រឹក

ដោយ៖ ហួ​ ឆេងស៊ីម

ជាការពិតណាស់ អាហារ​ពេល​ព្រឹក​គឺជា​អាហារ​ដែល​សំខាន់​ជាង​គេ​ក្នុង​ចំណោម​អាហារ​ទាំង​៣​ពេល​ក្នុង​១​ថ្ងៃ។ វា​ជួយ​ដាស់​ឲ្យ​រាង​កាយ​អ្នក​មាន​ភាព​សកម្ម​ពី​ព្រលឹម និងផ្តល់​នូវ​ថាមពល​ដែល​រាង​កាយ​ត្រូវ​ការ។ លើស​ពី​នេះ​ទៀត អ្នក​ចំណាយ​ពេល​អស់​មួយ​យប់​សម្រាប់​គេង ហើយ​រាង​កាយ​មិន​បាន​ទទួល​នូវ​អាហារ​សោះ ដូចនេះ​មាន​តែ​ពេល​ព្រឹក​នេះ​ហើយ​ដែល​ជា​ពេល​វេលា​សំខាន់​ក្នុង​ការ​បំពេញ​នូវ​ចំណី​អាហារ ចៀសវាង​​​ក្រពះ​មាន​បញ្ហា។ ដោយ​ឡែក មនុស្ស​មួយ​ចំនួន​ធំ​បែរ​ជា​ចូល​ចិត្ត​រំលង​អាហារ​ពេល​ព្រឹក​នេះ​ទៅ​វិញ ទោះ​ដឹង​ថា​វា​សំខាន់​ក៏​ដោយ។ ខាងម្រោមនេះជាបញ្ហាប្រឈមទាំង៥ ក្នុងការ​មិន​ទទួល​ទានអាហារ​ពេល​ព្រឹក​ ៖

  • ប្រឈម​នឹង​គ្រួស​ក្នុង​តម្រង​នោម​៖ នៅ​ពេល​គម្លាត​ពី​អាហារ​ពេល​ល្ងាច និង ពេល​ព្រឹក​មាន​រយៈពេល​យូរ​ពេក​ ធ្វើ​ឱ្យ​​អ្នក​ប្រឈម​នឹង​ការ​កើត​នូវ​គ្រួស​ក្នុង​តម្រងនោម ព្រោះ​ក្រពះ​របស់​អ្នក​គ្មាន​អ្វី​កិន​រហូត​ដល់​លើស​ពី​ ១០​ម៉ោង។​ដូចនេះ វា​មិនមែន​ជា​រឿង​លេង​សើច​នោះ​ទេ អ្នក​គួរ​យក​ចិត្ត​ទុក​ដាក់​បន្តិច​ព្រោះ​អាច​មាន​បញ្ហា​ដល់​សុខភាព។
  • ធ្វើឱ្យមាត់របស់អ្នកមានក្លិនមិនល្អ៖ អ្នកដឹងទេថា អាហារពេលព្រឹកអាចប៉ះពាល់អារម្មណ៍របស់អ្នកពេញមួយថ្ងៃ? ការមិនទទួលវា គឺអាចធ្វើឱ្យអ្នកងាយម៉ួរម៉ៅ និង គិតអ្វីមិនចេញជាដើម។ មិនត្រឹមតែប៉ុណ្ណោះ វាធ្វើឱ្យបាក់តេរីនៅក្នុងមាត់ងាយកកើត និង ធ្វើឱ្យមាត់របស់អ្នកមានក្លិនមិនល្អ។ ដូចនេះ បើមិនចង់មានក្លិនមាត់មិនល្អនោះ អ្នកគួរចាប់ផ្តើមបរិភោគអាហារពេលព្រឹកវិញទៅ។
  • ធ្វើឱ្យការចងចាំចុះអន់ខ្សោយ៖ អ្នកប្រហែលជាមិនដឹងទេថា ការរំលងអាហារពេលព្រឹកនឹងអាចធ្វើឱ្យអ្នកប្រឈមនឹងការចងចាំ និង ខួរក្បាលចុះអន់ខ្សោយ ពីព្រោះពេលអ្នកមិនបរិភោគរយៈពេលយូរពេល សម្ពាធឈាមក្នុងរាងកាយធ្លាក់ចុះ ហើយបញ្ហានេះនឹងកាន់តែធ្ងន់ធ្ងរនៅពេលអ្នកកាន់តែចាស់។ ដូចនេះ បើមិនចង់ឱ្យខួរក្បាលចុះដុនដាបទេ អ្នកមិនគួររំលងអាហារពេលព្រឹកទៀតឡើយ។
  • ប្រឈម​នឹង​ការ​ធាត់​លើស​ដើម៖ នារី​មួយ​ចំនួន​គិត​ថា​ ការ​តម​អាហារ​ពេល​ព្រឹក​ធ្វើ​ឱ្យ​ខ្លួន​ស្រក​ទម្ងន់ តែ​ការ​ពិត​ពេល​រាង​កាយ​មិន​បាន​ទទួល​យ​ក​នូវ​អាហារ​ពេល​ព្រឹក​នឹង​ធ្វើ​ឱ្យ​ឃ្លាន​ខ្លាំង​នៅ​ពេល​បន្ទាប់ ឬ ពេញ​មួយ​ថ្ងៃ។ ការ​ឃ្លាន​ខុស​ពេល​​ធ្វើ​ឱ្យ​អ្នក​បរិភោគ​នូវ​ចំណីចំណុក​នានា​ច្រើន​លើស​ការ​បរិភោគ​អាហារ​ពេល​ព្រឹក​ទៅ​ទៀត​ ជាពិសេស​ ធ្វើ​ឱ្យ​អ្នក​ឃ្លាន​របស់​ផ្អែមៗ ដែល​អាច​ឱ្យ​ឡើង​ទម្ងន់​ដោយ​មិន​ដឹង​ខ្លួន។
  • ប្រឈម​នឹង​ជំងឺ​បេះដូង៖ បើ​អ្នក​ទម្លាប់​រំលង​អាហារ​ពេល​ព្រឹក​រយៈ​ពេល​យូរ អ្នក​នឹង​អាច​ប្រឈម​នឹង​ជំងឹ​បេះដូង ព្រោះ​សរសៃ​ឈាម​ត្រូវ​បាន​រាំង​ស្ទះ​ដោយការ​ធ្វើ​ប្រតិកម្ម​ខ្លាំង​នៃ​ចរន្ត​ឈាម ដែល​ប្រតិកម្ម​នេះ​អាច​ធ្វើ​ឱ្យ​ប៉ះ​ពាល់​ដល់​បេះដូង​ និង កកើត​ជា​ជំងឺ​ខ្សោយ​បេះដូង​ទៀត​ផង។

ដូចនេះបន្ទាប់​ពី​បាន​យល់ដឹង​នូវ​ផល​វិបាក​ដែល​អ្នក​អាច​ប្រឈម​ពី​ការ​មិន​បរិភោគ​អាហារ​ពេល​ព្រឹក​នេះ​ហើយ អ្នក​គួរ​ឈប់​ព្រងើយ​កន្តើយ​ ហើយ​យក​ចិត្ត​ទុក​ដាក់​ជាមួយ​សុខភាព​របស់​ខ្លួន​វិញ ដោយ​ការ​បរិភោគ​អាហារ​ឲ្យបាន​គ្រប់​៣​ពេល​ ក្នុង​ ១​ថ្ងៃ ជា​ពិសេស​គឺ​អាហារ​ពេល​ព្រឹក​ដែល​សំខាន់​ជាង​គេ​សម្រាប់​រាង​កាយរបស់លោកអ្នក៕

Related Articles