We TV Cambodia

អ្នកជំនាញ៖ COVID-19 បានប៉ះពាល់ដល់វិស័យអចលនទ្រព្យ និងដីធ្លីនៅទូទាំងប្រទេស តែអ្នករកស៊ីដីឡូត៍ខ្នាតតូចរងផលប៉ះពាល់ធ្ងន់ជាងគេ

អ្នកជំនាញ៖ COVID-19 បានប៉ះពាល់ដល់វិស័យអចលនទ្រព្យ និងដីធ្លីនៅទូទាំងប្រទេស តែអ្នករកស៊ីដីឡូត៍ខ្នាតតូចរងផលប៉ះពាល់ធ្ងន់ជាងគេ
គម្រោងដីឡូត៍ (រូបតំណាង/ប្រភព៖ Google)

ជំងឺ COVID-19 បានធ្វើឲ្យប៉ះពាល់ខ្លាំងដល់ស័យអចលនទ្រព្យ និងដីធ្លីនោទូទាំងប្រទេស ហើយអ្នកដែលរងផលប៉ះពាល់ខ្លាំងជាងគេបំផុតដោយសារជំងឺនេះគឺ អ្នករកស៊ីដីឡូត៍ខ្នាតតូច។ នេះបើតាមការលើកឡើងរបស់អ្នកជំនាញផ្នែកវិស័យដីធ្លីនេះ។

លោក ង៉ែត ជូ អ្នកជំនាញ​ផ្នែក​ហិរញ្ញវត្ថុ និងជាអ្នក​វិនិយោគ​លើ​វិស័យ​ដីធ្លីបានឲ្យដឹងថា គម្រោង​ដីឡូត៍​ខ្នាតតូច​សម្រាប់​សាងសង់​ផ្ទះ ដែលមានទំហំ ៥ម៉ែត្រ គុណនឹង ២០ម៉ែត្រ គឺបានជួបបញ្ហាតាំងតែពីមុនការរីករាលដាល COVID-19 ទៅទៀត។ ប៉ុន្តែគិតមកទល់ពេលនេះគឺវាកាន់តែធ្ងន់ធ្ងរឡើងថែមទៀត រហូតដល់លក់មិនចេញសោះតែម្ដង។

លោក ង៉ែត ជូ (ប្រភព៖ Google)

លោកក៏បានបន្តទៀតថា ចំពោះអ្នកដែលបានលក់ចេញរួចកាលពីពេលមុ​នក៏បានជួបបញ្ហាខ្លះដែរ ទាក់ទងនឹងការប្រមូលលុយបង់រំលោះ ដោយសារតែអ្នកដែលទិញគម្រោងដីឡូត៍តូចៗភាកច្រើនជាកម្មករ និងអ្នកដែលមានមុខរបរចំណូលទាប ហើយពួកគាត់ក៏បានរងផលប៉ះពាល់ខ្លាំងដោយសារ COVID-19 នេះដូចគ្នាដែរ ទើបធ្វើឲ្យមានការបង់រំលោះមិនទាន់ពេលកំណត់។

ដោយឡែក លោកក៏បានបញ្ជាក់បន្ថែមថា សម្រាប់គម្រោងដីឡូត៍របស់លោក ដែលជាគម្រោងប្រភេទ​ជា​កន្លែងលំហែកាយ ដីឡូត៍​វីឡា ឬដីឡូត៍​ខ្នាតធំៗសម្រាប់សង់​ផ្ទះ​លំហែ​កាយ គឺពុំ​ជួប​បញ្ហា​ចោទ​ធុំដុំ​ទេ ព្រោះតែអតិថិជន​របស់​គម្រោងទាំងនេះ ភាគច្រើនជាម្ចាស់​អាជីវកម្ម ជា​អ្នក​ធ្វើការការិយាល័យដែលមានប្រាក់ខែរឹងមាំ ឬចំណូល​ច្រើន ដូច្នេះ អតិថិជនទាំងនេះ​ពុំ​មាន​បញ្ហាចោទ​ក្នុងការ​បង់​រំលស់នោះទេ។

ការប្រកាសលក់ដីឡូត៍ផ្សេងៗ (ប្រភព៖ Google)

លោកក៏បានគូសបញ្ជាក់ដែរថា ទោះបីជាពេលខាងមុខវិបត្តិ COVID-19 បញ្ចប់ក៏ដោយ ប៉ុន្តែសន្ទុះនៃការទិញលក់មិនអាចអើបឡើងភ្លាមៗនោះទេ ក្នុងរយៈពេល ២ឆ្នាំ ទៅ ៣ឆ្នាំមុខ។ មួយវិញទៀតវិបត្តិ COVID-19 ក៏មិនដឹងថាអូសបន្លាយដល់ពេលណានោះដែរ។

អត្ថបទដោយ៖ Nevin

ប្រភព៖ ក្នុងស្រុក

Related Articles