We TV Cambodia

អ្នកជំនាញលើកទឹកចិត្តអោយអ្នកវិនិយោគសង់ឃ្លាំងសំរាប់ជួល

អ្នកជំនាញលើកទឹកចិត្តអោយអ្នកវិនិយោគសង់ឃ្លាំងសំរាប់ជួល

ដោយៈ ទិន សុខាវុធ

អ្នក​ជំនាញ​ផ្នែក​អចលនទ្រព្យ​​លើក​ទឹក​ចិត្ត​អោយ​បណ្តា​អ្នក​វិនិយោគ​ក្នុង​វិស័យ​អចលនទ្រព្យ​ទាំងឡាយ​
សាងសង់​ឃ្លាំង​ទុក​សំរាប់​ជួល​អោយបាន​ច្រើន សមស្រប​ទៅតាម​សេចក្តីត្រូវការឃ្លាំង​សំរាប់ស្តុកទុក​ទំនិញ​ផ្សេង​ៗ
នៅ​ពេល​ដែល​វិស័យ​ឧស្សាហកម្មនៅ​កម្ពុជា កំពុង​តែ​​រីក​ចំរើន​​យ៉ាង​ឆាប់​រហ័យ​។

យោង​តាម​គេហទំព័រ Realestate.com.kh កាល​ពី​ថ្ងៃ​សុក្រ​សប្តាហ៍​មុន
នៅ​ក្នុង​ពិធីតាំង​​ពិពណ៌​អចលនទ្រព្យ ដែល​ត្រូវ​បាន​រៀបចំ​ឡើង​នៅ​សណ្ធាគារ NagaWorld លោក
សៀ ឬទ្ធី ប្រធាន​ក្រុមហ៊ុន WorldBridge Group បាន​អះអាង​ថា ការសង់​ឃ្លាំង​នៅតាម​តំបន់​ជាយ​ក្រុង​ទុក​​​សំរាប់​ជួល
នឹង​ទទួល​បាននូវ​ប្រាក់​ចំណេញ​​គូរ​ជាទី​គាប់​ចិត្ត​។

លោកបញ្ជាក់​ថា​៖​
«​​ខ្ញុំអាចធានាបានថាប្រសិនបើយើងមានដើមទុន
និងធនធាន ដើម្បីសាងសង់ឃ្លាំងនៅជាយក្រុងយើងនឹងទទួលបានប្រាក់ចំណូលល្អ។
ប្រសិនបើយើងសាងសង់ឃ្លាំងសម្រាប់ជួល យើង​អាច​ទទួលបានប្រាក់ចំណេញយ៉ាង​ហោច​ណាស់​ ៨ ទៅ
១០ ភាគរយ​​ ខណៈ​ដែលការជួលខុនដូអាចបង្កើតចំ​ណូល​ឲ្យ​យើងបានពី ៥ ទៅ ៨
ភាគរយតែប៉ុណ្ណោះ»។

យោង​តាម​របាយការណ៍​របស់​ VTrust Appraisal ចំនួន​ក្រុមហ៊ុន​​និង​សហគ្រាស​នៅ​រាជធានី​ភ្នំពេញ​មាន​ការកើន​ឡើង​យ៉ាង​ខ្លាំង
ពោល​គឺ​ផ្ទៃ​សំរាប់​សាងសង់​ក្រុមហ៊ុន​សហគ្រាស​ទាំងនោះ កើនពី ៣១,០០០ ម៉ែត្រ​ក្រឡា​
កាលពី​ឆ្នាំ ១៩៩៨ ដល់​ប្រហែល​ជា ១,៥៨ លាន​ម៉ែត្រ​ការ៉េ​នៅ​ក្នុង​ឆ្នាំ ២០១៨ ។

ឯ​ចំណែកលោក ចេង ខេង នាយក​ប្រតិបត្តិ​ក្រុមហ៊ុន CPL វិញ
បាន​លើក​ឡើង​ថា ប្រជាពលរដ្ឋ​កម្ពុជា​បច្ចុប្បន្ន​កាន់​តែ​​មាន​ចិត្ត​ចង់​ដាក់​ប្រាក់​វិនិយោគ​នៅ​ក្នុង​​អាជីវកម្ម​ឃ្លាំង​នេះ​។​

បើ​តាម​លោក ចេង ខេង អ្នក​វិនិយោគ​ចំណាយ​ប្រាក់​ជា​មធ្យម​ចាប់​ពី $80 ដុល្លារ ទៅ $120 ដុល្លារ​ ក្នុង​មួយ​ម៉ែត្រ​ការ៉េ ដើម្បី​សាងសង់​ឃ្លាំង​និមួយ​ៗ​​។

​«តម្រូវ​ការកន្លែងសម្រាប់រោងចក្រកំពុងកើនឡើងដោយសារតែការកើនឡើងនៃការ​ផ្តូរ​ទី​តាំង​រោងចក្រពីប្រទេសចិនមកប្រទេសកម្ពុជា។​ បន្ថែម​លើ​នេះ ដោយសាររដ្ឋាភិបាលតម្រូវ​ឲ្យ​មាន​ការផ្លាស់ទី​រោងចក្រពីខាងក្នុងទីក្រុងភ្នំពេញទៅជាយក្រុងនិងព័ទ្ធជុំវិញផ្លូវក្រវ៉ាត់ក្រុង ដូច្នេះ​តម្រូវការកន្លែងស្តុកទុកនឹងកាន់តែធំហើយការវិនិយោគក្នុង អាជីវកម្មឃ្លាំងគឺជាជម្រើសដ៏ល្អមួយ» នេះ​ជា​ការលើកឡើង​របស់​លោក ចេង ខេង ៕

Related Articles