ដោយៈ ទិន សុខាវុធ
អ្នកជំនាញផ្នែកសំណង់បានអះអាងថា កម្ពុជាកំពុងត្រូវការកំលាំងពលកម្មប្រកបដោយជំនាញនិងគុណភាព ដែលឆ្លើយតបទៅនឹងសេចក្តីត្រូវការនៃទីផ្សារការងារក្នុងវិស័យសំណង់។
យោងតាមលោក វីរុត ផានិតភុតចាម៉ាន់ នាយកគ្រប់គ្រងផ្នែកទីផ្សាររបស់ក្រុមហ៊ុន SCG នៅកម្ពុជា កាលពីពេលថ្មីៗនេះ បានថ្លែងថា ក្រុមហ៊ុនរបស់លោក បានបណ្តុះបណ្តាលមេជាងសំណង់ជំនាញបាន ២០០ នាក់ហើយ កាលពីឆ្នាំទៅ ហើយនៅក្នុងឆ្នាំនេះ ក្រុមហ៊ុននឹងខិតខំធ្វើយ៉ាងណា បណ្តុះបណ្តាលមេជាងសំណង់អោយបាន ២០០ នាក់បន្ថែមទៀត។
មួយវិញទៀត យោងតាមរបាយការណ៍របស់ក្រសួងរៀបចំដែនដីនិងនគរូបនីយកម្ម និងសំណង់ វិស័យសំណង់នៅកម្ពុជា បានផ្តល់ការងារជិត ៣ ម៉ឺនការងារសំរាប់ពលករខ្មែរ ក្នុងមួយថ្ងៃ។ សំរាប់កម្មករគ្មានជំនាញ ពួកគេទទួលបានប្រាក់ឈ្នួល ៣ ម៉ឺនរៀល ក្នុងមួយថ្ងៃ។ ចំណែកឯកម្មករមានជំនាញវិញ ពួកគេទទួលបាន ៦ ម៉ឺនរៀលក្នុងមួយថ្ងៃ។ រីឯ វិស្វករ ស្ថាបត្យករ និង អ្នកជំនាញផ្សេងៗ ទទួលបានប្រាក់ឈ្នួលពី $400 ដុល្លារ ទៅ $2,500 ដុល្លារ ក្នុងមួយខែ។
ទាក់ទងនឹងរឿបនេះ លោកស្រី Inguna Dobraja នាយិកាធនាគារពិភពលោក ប្រចាំនៅកម្ពុជា នៅក្នុងសន្ទរកថា នៅក្នុងពិធីប្រកាសដាក់អោយប្រើប្រាស់របាយការណ៍ស្តីពី «អនាគតការងារនៅប្រទេសកម្ពុជា តំណភ្ជាប់ទៅនឹងសេដ្ឋកិច្ចនាថ្ងៃខាងមុខ» បានថ្លែងថា ប្រជាជនកម្ពុជា ជាមនុស្សឧស្សាហ៍ព្យាយាម ហើយមានប្រជាពលរដ្ឋកម្ពុជាប្រមាណជា ៨០ ភាគរយ កំពុងបំពេញការងារចំនួន ៨ លានការងារ។
លោកស្រីបានបន្ថែមថា ដោយហេតុថា កម្ពុជាបាននិងកំពុងអនុវត្តនូវយុទ្ធសាស្ត្រអភិវឌ្ឍន៍មួយ ដែលមានការជាប់ទាក់ទងកាន់តែច្រើនឡើង ៗ ទៅនឹងទីផ្សារអន្តរជាតិ និងវិនិយោគបរទេស វិស័យឯកជននៅកម្ពុជា ជាពិសេសឧស្សាហកម្មនាំចេញ បាននិងកំពុងពង្រីកផលិតកម្មរបស់ពួកគេ។
ជាលទ្ធផល ការងារល្អៗជាច្រើនត្រូវបានបង្កើតឡើងសំរាប់ជនកម្ពុជា ដែលមានសមត្ថភាព។ ជារួម នៅចន្លោះឆ្នាំ ២០១០ និងឆ្នាំ ២០១៥ កំណើននៃការងារមានប្រាក់ខែ គឺប្រមាណជា ១២ ភាគរយក្នុងមួយឆ្នាំ ហើយ ១/៣ នៃការងារមានប្រាក់ខែទាំងនោះ ត្រូវបានបង្កើតឡើងដោយក្រុមហ៊ុនបរទេស។
យោងតាមលោកស្រីប្រធានធនាគារពិភពលោកប្រចាំនៅកម្ពុជា ទោះបីជាកម្ពុជាបានកែលំអគុណភាពកំលាំងពលកម្មអោយបានល្អជាងមុនយ៉ាងណាក៏ដោយ ក៏ទីផ្សារការងារនៅកម្ពុជាទាមទារនូវជំនាញកាន់តែខ្ពស់ទៅ ៗ ដែរ។ កត្តានេះ ទាមទារអោយប្រព័ន្ធអប់រំនៅកម្ពុជា ត្រូវធ្វើយ៉ាងណាផ្តល់នូវជំនាញទាំងឡាយដែលឆ្លើយតបទៅតំរូវនៃទីផ្សារការងារ៕
