ដោយៈ ទិន សុខាវុធ
អ្នកជំនាញអចលនទ្រព្យយល់ឃើញថា បច្ចេកវិទ្យា digital បាននិងកំពុងជួយជំរុញកំណើនក្នុងវិស័យអចលនទ្រព្យនៅកម្ពជា ក៏ដូចជានៅទូទាំងសកលលោកទាំងមូល។
យោងតាមគេហទំព័រ Realestate.com.kh ដែលជាគេហទំព័រជំនាញផ្នែកអចលនទ្រព្យ ការប្រកាសដាក់លក់ឬផ្សព្វផ្សាយនៅលើគេហទំព័រអចលនទ្រព្យ មានការកើនឡើងឥតឈប់ឈរ ដោយហេតុថាម្ចាស់អចលនទ្រព្យចាប់ផ្តើមយល់ពីសារសំខាន់នៃការប្រើប្រាស់ប្រព័ន្ធ digital នៅលើទីផ្សារអចលនទ្រព្យ។ មួយវិញទៀត អ្នទិញអចលនទ្រព្យក៏កាន់តែទុកចិត្តទៅលើប្រព័ន្ធ digital ក្នុងការទិញអចលនទ្រព្យទាំងពួងផងដែរ។
លោក ម៉ឹក ចិន្តា ស្ថាបនិករបស់ក្រុមហ៊ុន Realestate.com.kh បានលើកឡើងថា បណ្តាអ្នកលក់-ទិញអចលនទ្រព្យទាំងឡាយ កំពុងតែមានការចាប់អារម្មណ៍ជាខ្លាំងទៅលើគេហទំព័រអចលនទ្រព្យរបស់ក្រុមហ៊ុនរបស់លោក ក្នុងការស្វែងព័ត៌មានផ្សេងៗទាក់ទងនឹងវិស័យនេះ។
«គេហទំព័រផ្សព្វផ្សាយអចលនទ្រព្យ Realestate.com.kh ដែលបង្កើតឡើងមុនគេ និងដំបូងគេនៅកម្ពុជាតាំងពីឆ្នាំ២០០៩ មកគឺកំពុងបានទទួលការចាប់អារម្មណ៍ច្រើន ពីសំណាក់អ្នកស្វែងរកអចលនទ្រព្យ អ្នកលក់ ភ្នាក់ងារ និងម្ចាស់គម្រោងធំៗ» នេះជាការលើកឡើងរបស់លោក ម៉ឹក ចិន្តា ។
លោកក៏បានបន្ថែមទៀតថា គេហទំព័រអចលនទ្រព្យកំពុងឆ្លើយតបទៅនឹងតំរូវការនៃបច្ចេកវិទ្យាចុងក្រោយបំផុតសំរាប់ផ្តល់ព័ត៌មានរហ័សទាន់ចិត្ត និងដ៏គួរអោយទុកចិត្ត នៅក្នុងប្រតិបត្តិការទិញ-លក់អចលនទ្រព្យនានា។
យោងតាមគេហទំព័រ Realestate.com.kh រហូតមកដល់ពេលបច្ចុប្បន្ននេះ មានគំរោងអចលនទ្រព្យជាង ៤ ម៉ឺនត្រូវបានដាក់ផ្សព្វផ្សាយនៅលើគេហទំព័រ។ ហើយគំរោងអចលនទ្រព្យទាំងនោះមានដូចជា ដីឡូតិ៍ ផ្ទះសំបែង បុរី ខុនដូ គំរោងពាណិជ្ជកម្ម ជាដើម។
ចំណែកឯអ្នកស្រី តាំង ហួរ វិញ ដែលជានាយកប្រតិបត្តិរបស់ក្រុមហ៊ុន Amatak Property Service បានប្រាប់គេហទំព័រ Realestate.com.kh ថាការដើរអោយទាន់បច្ចេកវិទ្យាថ្មីៗនៅក្នុងវិស័យអចលនទ្រព្យ មានសារសំខាន់ណាស់ សំរាប់ប្រតិបត្តិការផ្សេងៗក្នុងវិស័យនេះ។
“ខ្ញុំជឿថា ការប្រើប្រាស់បច្ចេកវិទ្យា ពិសេសគេហទំព័រ គឺអាចជួយជំរុញដល់ការទិញលក់ឲ្យកាន់តែប្រសើរឡើង។ ហើយខ្ញុំបានទទួលបានអ្នកទិញ ជាច្រើនតាមរយៈការផ្សព្វផ្សាយកន្លងមក” នេះជាការអះអាងរបស់អ្នកស្រី តាំង ហួរ ប្រាប់ដល់គេហទំព័រ Realestate.com.kh ។
យោងតាមអ្នកឯកទេសអចលនទ្រព្យ ស្ថេរភាពនយោបាយនិងសន្តិសុខសង្គម ជាកត្តាបរានុម័តដ៏ចំបងក្នុងការធានាអោយមានកំណើនក្នុងវិស័យអចលនទ្រព្យ។
ក៏ប៉ុន្តែទោះជាយ៉ាងណាក៏ដោយ ក៏អ្នកជំនាញអចលនទ្រព្យទាំងនោះ បានលើកឡើងថា កម្ពុជាត្រូវការរយៈពេលយ៉ាងហោចណាស់ក៏ ៣០ ឆ្នាំទៀតដែរ ដើម្បីអភិវឌ្ឍប្រទេសអោយក្លាយជាក្រុងហុងកុងឬប្រទេសសាំងកាពួរនាពេលបច្ចុប្បន្ន៕
