We TV Cambodia

អ្នកជំនាញថា ការកែលំអផ្លូវជាតិលេខ ៣ ធ្វើអោយដីឡូតិ៍នៅតាមដងផ្លូវនោះត្រូវប៉ាន់

អ្នកជំនាញថា ការកែលំអផ្លូវជាតិលេខ ៣ ធ្វើអោយដីឡូតិ៍នៅតាមដងផ្លូវនោះត្រូវប៉ាន់
រូបថតៈ សហការី

ដោយៈ ទិន សុខាវុធ

អ្នកជំនាញក្នុង​វិស័យ​អចលនទ្រព្យ បានលើកឡើងថា ការជួលជុលកែ​លំអផ្លូវ​ជាតិលេខ ៣ ដោយ​រាជរដ្ឋាភិបាល បាន​និងកំពុង​​ធ្វើអោយ​ដី​ឡូតិ័​នៅតាម​ដងផ្លូវ​នោះឡើ​ងថ្លៃ ព្រោះ​មានក្រុមហ៊ុន​សង់​លំនៅដ្ឋានជាច្រើន បាន​ចាប់​ផ្តើម​ទិញ​ដីនៅក្នុង​តំបន់​នោះ សាងសង់​លំនៅដ្ឋាននិង​អគារពាណិជ្ជកម្ម​ផ្សេង​ៗ​។

យោង​តាម​លោក អ៊ិន ណាង អគ្គនាយកក្រុមហ៊ុន​អចលនទ្រព្យ Show​ Up​ Real​ Estate​ Co​,.Ltd ដីឡូតិ៍​នៅ​តាម​ដងផ្លូវ​ជាតិ​លេខ ៣ នេះ ផ្តល់​អំណោយ​ផលដ៏​ល្អ​បំផុត​ ក្នុង​ការសាសង់​លំនៅដ្ឋានកំរឹតមធ្យម។

លោកអគ្គនាយកក៏​បានលើកឡើងផងដែរថា ហេតុមួយ​ទៀតដែលបាននិងកំពុង​ជំរុញអ្នកវិនិយោគអោយ​មកទិញ​ដីនៅតាម​ដងផ្លូវ​នេះ​ សាងសង់លំនៅដ្ឋាននិងអគារផ្សេងៗ ក៏​ដោយសារ​ពួកគេ​មើលឃើញ​ពីសក្តានុពលនៃ​ដីឡូតិ៍​ទាំងនេះ នៅ​ពេល​បច្ចុប្បន្ន​ក៏​ដូច​ជា​នៅ​ពេលអនាគត​។

មួយវិញទៀត ក្រៅ​ពីការសាងសង់​លំនៅដ្ឋាននិង​អគារ​ផ្សេង​ៗ ដី​ឡូតិ៍​នៅតាមដង​ផ្លូវ​នេះ​ក៏​អាច​ត្រូវ​ប្រើប្រាស់​សំរាប់​សាងសង់​ឃ្លាំង​និង​ឬ​រោងចក្រផ្សេង​ផងដែរ​។

ចំពោះ​តំលៃ​ដីឡូតិ៍​នៅ​តាមដង​ផ្លូវជាតិនោះ​វិញ លោក អ៊ិន ណាង បានប្រាប់អោយ​ដឹង​ថា​ ដីឡូតិ៍​ស្ថិត​នៅចំងាយ​ពី​ ១ គីឡូម៉ែត​ពី​​ដង​ផ្លូវ​ជាតិ​នេះ មានតំលៃចាប់​ពី $50,000 ដុល្លារ​ឡើង​ទៅ​ សំរាប់​ផ្ទះ​មួយ​ល្វែង​។ ហើយ​ដីឡូតិ៍​នៅ​ជាប់​នឹងផ្លូវជាតិ គឺមានតំលៃចាប់ពី $150,000 ដុល្លារ​ឡើង​ទៅ សំរាប់​ផ្ទះ​មួយ​ល្វែង​៕

Related Articles