We TV Cambodia

អ្នកជំនាញថាមានខេត្តចំនួន ៦ ដែលមានសក្តានុពលក្នុងវិស័យអចលនទ្រព្យ

អ្នកជំនាញថាមានខេត្តចំនួន ៦ ដែលមានសក្តានុពលក្នុងវិស័យអចលនទ្រព្យ

ដោយៈ ទិន សុខាវុធ

លោក ច្រឹក សុខនីម អ្នកជំនាញ​​វិស័យ​អចលនទ្រ បាន​ថ្លែង​ថា​ បណ្តាអ្នក​វិនិយោគ​ក្នុង​វិស័យ​អចលនទ្រព្យ​ទាំងឡាយ គួរ​ដាក់​ទុនវិនិយោគនៅ​ក្នុង​ខេត្ត​ចំនួន ៦ ដែល​ពោរពេញ​ទៅ​ដោយ​សក្តានុពលអចលនទ្រព្យ​។

យោង​តាម​អ្នក​ជំនាញ​រូប​នេះ ខេត្ត​ដែល​មានសក្តានុពល​អចលនទ្រព្យ​ខ្ពស់​ជាង​គេ​គឺ​ខេត្ត ព្រះ​សីហនុ ដោយ​ហេតុ​ថាសំណង់​ទាំងឡាយ​កំពុង​រីក​ដុំដាលដូច​ផ្សិត ស្ថិត​នៅ​ក្រោម​ការវិនិយោគ​របស់​អ្នក​ជំនួញ​​ល្បី​ៗ ជាពិសេស​គឺ​អ្នក​វិនិយោគ​មក​ពីប្រទេស​ចិន​។

រូបថតៈ ក្រសួង​សាធារណការ​និង​ដឹកជញ្ជូន

លើស​ពី​នេះ​ទៀត សំណង់​ហេដ្ឋារចនាសម្ព័ន្ធ​ទាំងឡាយ​ មាន​ដូច​ជា​ផ្លូវ​ថ្នល់​ ស្ពាន និង​ព្រលាន​យន្តហោះ​អន្តរជាតិជាដើម ក៏​កំពុង​ត្រូវ​បាន​សង់​ឡើង​ទៅតាម​​ស្តង់​ដារ​អន្តរជាតិ ដែល​នឹងធ្វើអោយ​ខេត្ត​មួយ​នេះ​​ក្លាយ​ទៅ​ស្តង់​ដារ​គំរូ​ សំរាប់​អភិវឌ្ឍ​ខេត្ត​ផ្សេង​ៗ​ទៀត​។ នេះ​បើយោង​តាម​ការអះអាងរបស់​រាជ​រដ្ឋាភិបាល​។

ឯចំណែកខេត្ត​កំពតវិញ ក៏ជា​តំបន់​ទេសចរណ៍​ដ៏​មាន​ប្រជាប្រិយភាព​មួយ​ ដែល​មាន​ភ្ញៀវ​ទេសចរណ៍​ជាតិ​និង​អន្តរជាតិ ទៅ​លេង​នៅ​ទី​នោះ​កាន់​តែ​ច្រើន​ឡើង​ ៗ ដែរ​។ មួយវិញ​ទៀត​ ចំនួន​អ្នក​ជំនួញ​ចូល​ទៅ​វិនិយោគនៅ​ក្នុង​ខេត្ត​កំពត ក៏​កាន់​តែ​មាន​ចំនួន​កាន់​តែ​ច្រើនឡើង ៗ ដែរ​។

ចំពោះ​ខេត្ត​សៀមរាប​វិញ អ្នកណាក៏​ដឹងដែរ​ថា វា​ជា​ខេត្ត​មួយ​ដ៏​មាន​​ប្រជាប្រិយ​ជាង​គេ​បំផុត​ខាង​ផ្នែកទេសចរណ៍ ព្រោះ​​វា​​ជា​ខេត្ត​មួយ​ដែលពោរពេញ​ទៅ​ដោយ​ប្រាង្គប្រាសាទ​បុរាណជា​ច្រើន​រាប់​មិនអស់​។ ទន្ទឹម​នឹងនេះ ផ្ទះ​សំណាក់ សណ្ឋាគារ ភោជនីយដ្ឋាន រុង្គសាល និង​កន្លែងកំសាន្ត​​ជា​ច្រើន​ទៀត ក៏​កំពុង​ត្រូវ​បានសាងសង់​ឡើង​កាន់​ច្រើនទៅ​ ៗ ដែរ​ ដើម្បី​អាច​ទទួល​បំរើ​ភ្ញៀវ​ទេសចរណ៍​ជា​ច្រើន​លាន់នាក់​ ក្នុង​មួយ​ឆ្នាំ ៗ ។

បើ​និយាយ​ពី​រាជ​ធានី​​ភ្នំពេញ​វិញ សំណង់​ខុនដូ ​​អគារជន្ទល់​មេឃ និង ផ្សារ​ទំនើបនានា ក៏​កំពុង​រីកដុះដាល​ឡើង​ដូច​ផ្សិត​​ពីមួយ​ថ្ងៃ​ទៅ​មួយ​ថ្ងៃ​ដែរ ហើយ​វា​ក៏​ជា​មជ្ឍមណ្ឌល​សេដ្ឋកិច្ច ពាណិជ្ជកម្ម និង នយោបាយ​ ​ដែ​ជា​បេះដូង​​នៃ​រាជាណាចក្រ​កម្ពុជា​យើង​ផង​ដែរ​។

រូបថតៈ We TV Cambodia

ក្រៅពី​នេះ​ក៏​នៅមានខេត្ត​កំពង់​ស្ពឺ និង ខេត្ត​កណ្តាល​ពី​ទៀត ដែល​បណ្តាអ្នកវិនិយោគ​ក្នុង​វិស័យ​អចលនទ្រព្យ​មិន​អាច​មើល​រំលង​បាន​ឡើយ​ សំរាប់​ការវិនិយោគ​ បុរី​ផ្ទះ​ល្វែង​ សំណង់​រោង​ចក្រ ឃ្លាំង​ស្តុក​សំភារៈ និង​ មជ្ឍមណ្ជលពាណិជ្ជកម្មជាដើម ជាពិសេសនៅតាម​ដងផ្លូវ​ជាតិលេខ ៤ លេខ ៥ និង​លេខ ៦ ៕

Related Articles