We TV Cambodia

អាជីវកម្មលក់សាច់សុនខជាច្រើនបានបិទទ្វា បន្ទាប់ពីមានច្បាប់ការពារសត្វសុនខ

អាជីវកម្មលក់សាច់សុនខជាច្រើនបានបិទទ្វា បន្ទាប់ពីមានច្បាប់ការពារសត្វសុនខ
ការធ្វើអាជីវកម្មសត្វសុនខ (ប្រភព៖ Google)

អាជីវកម្មលក់សាច់សុនខជាច្រើនបានបិទទ្វាជាបន្តបន្ទាប់ ក្រោយពីមានការចេញច្បាប់ហាមឃាត់ការធ្វើអាជីវកម្មទិញ-លក់ និងពិឃាតសត្វសុនខគ្រប់ប្រភេទ ដែលបានប្រកាសដោយក្រសួងកសិកម្មកាលពីដើមខែកក្កដាកន្លងទៅនេះ។

ការធ្វើអាជីវកម្មសត្វសុនខ (ប្រភព៖ Google)

យោងតាមលោក ព្រំ វិច ប្រធានការិយាល័យ​ផលិតកម្ម និង​បសុព្យាបាលខេត្តសៀមរាប បានឱ្យដឹងថា ក្នុង​ខេត្តសៀមរាប មាន​ទីតាំង​ពិឃាត និង​លក់​សាច់​សុនខចំនួន ​២៥​កន្លែង ប៉ុន្តែមាន ១២​ទីតាំង បានសម្រេចបិទ​ដោយ​ខ្លួនឯង បន្ទាប់ពី​មានការ​ពន្យល់​ណែនាំ​ពី​មន្ត្រី​ជំនាញ និងនៅសល់​ប្រមាណ​ ១៣កន្លែង ​ទៀត​សន្យាថានឹង​ឈប់​បន្ត​អាជីវកម្ម​លក់ពិឃាតសត្វ​សុនខ​នេះ​ក្នុងពេលឆាប់ៗខាងមុខនេះផងដែរ។

ការចុះទៅណែនាំអ្នកប្រកបរបរលក់សាច់សុនខ (ប្រភព៖ info.gov)

​លោក ចាន់ ផ្ល​ក់ និង​ភរិយា រស់នៅ​ភូមិ​អូរទទឹង ឃុំ​ព្រះ​ដាក់ ស្រុក​បន្ទាយស្រី ខេត្តសៀមរាប ដែល​បាន​ប្រកប​របរ​លក់​សាច់​សុនខ​នេះ​ប្រមាណ​ ១០​ឆ្នាំ​មកហើយ​នោះ បាន​ឯកភាព​ថា​នឹង​ឈប់​ប្រកប​អាជីវ​កម្មនេះទៅតាម​ការណែនាំ​ ដោយ​សុខចិត្តប្តូរ​មុខរបរ​ទៅ​ចិញ្ចឹមសត្វ និង​សុំច្បាប់​អនុញ្ញាត​លក់​សាច់គោ សាច់ជ្រូក​វិញ​ម្តង​។

សេចក្ដីជូនដំណឹងរបស់ក្រសួងកសិកម្មស្ដីពី ហាមឃាត់ការទិញ លក់ និងធ្វើអាជីវកម្មសត្វសុនខ (ប្រភព៖ ក្រសួងកសិកម្ម)

ទោះជាយ៉ាងណា លោក ទា គឹម​សុទ្ធ ប្រធាន​មន្ទីរ​កសិកម្ម ​រុក្ខាប្រមាញ់ ​និង​នេសាទ​ខេត្តសៀមរាប បានបញ្ជាក់ថា ការហាមឃាត់​នេះ​មិនមែន​ជាការ​រឹតបន្តឹង​ដាច់​ណាត់​នោះទេ ពោលគឺជា​ការហាម ដើម្បី​រួមគ្នា​កាត់បន្ថយ​ជា​បណ្តើរៗ​នៃ​ការ​ពិឃាត និង​បរិភោគ​សាច់​នេះ​ឱ្យមក​នៅ​កម្រិតអប្ប​បរិ​មា និង​ឈានទៅ​លែងមាន​ទាំងស្រុងនាពេល​អនាគត។

អត្ថបទដោយ៖ Nevin

Related Articles