អគារថ្មីចំនួន ៣ នៃមន្ទីរពេទ្យបង្អែកខេត្តបាត់ដំបង នឹងត្រូវសង់រួចនៅខែ មិនា ២០២០

ដោយៈ ទិន សុខាវុធ

លោក​ វឿន ប៊ុនរេត វេជ្ជបណ្ឌិតម្នាក់​ធ្វើការនៅ​​មន្ទីរពេទ្យ​ខេត្ត បាត់ដំបង បាន​អោយ​ដឹង​ថា អគារ​ថ្មីចំនួន ៣ ទៀត នៅ​ក្នុង​មន្ទីរ​របស់​លោក​ នឹងត្រូវ​សាង​សង់​រួច​នៅ​ខែ មិនា ឆ្នាំ ២០២០ ខាង​មុខ​នេះ​។

យោង​តាម​លោក​វេជ្ជបណ្ឌិត សំណង់​នៃ​អគារ​ថ្មីទាំង ៣ នោះ ត្រូវ​បានប្រារព្ធពិធីបញ្ចុះបឋមសិលា និងបើកការដ្ឋានសាងសង់​ កាល​ពី​​ខែ មិនា ឆ្នាំ ២០១៩ កន្លង​ទៅ​នេះ​ ក្រោម​អធិបតី​ភាព​លោក​រដ្ឋ​មន្ត្រីក្រសួង​មហាផ្ទៃ ស ខេង និង​លោក Hidehisa Horinouchi អតីត​ឯកអគ្គរាជ​ទូតជប៉ុនប្រចាំ​នៅកម្ពុជា​។

អគារទាំង ៣ នោះ​ជា​ជំនួយ​ឥត​សំណង​របស់​ប្រទេស​ជប៉ុន តាម​រយៈ​ស្ថាប័ន​អភិវឌ្ឍន៍​អន្តរជាតិជប៉ុន ហៅកាត់​ថា JICA ស្ថិត​ក្នុង​តំលៃ​​ទឹក​ប្រាក់​ប្រមាណជា $14.53 លាន​ដុល្លារ​៕