We TV Cambodia

អគារខុនដូបែបជប៉ុន Arakawa Residence សំរាប់អ្នកចំណូលទាប នឹងត្រូវសង់រួចក្នុងឆ្នាំ ២០២០

រូបថតៈ Facebook Arakawa Residence

ដោយៈ ទិន សុខាវុធ

លំនៅដ្ឋាន​ប្រភេទ​ខុនដូ​​ស្តង់ដារ​ជប៉ុន សំរាប់​អ្នកមានចំណូល​ទាប​និង​មធ្យម មានឈ្មោះថា Arakawa Residence នឹងត្រូវ​សង់រួច​នៅ​ក្នុង​ឆ្នាំ ២០២០ ខាង​មុខនេះ​។

យោង​តាម​លោក អៀង សុធារ៉ា សហស្ថាបនិក​នៃ​ក្រុមហ៊ុន Akarawa អគារខុនដូ​ទាំង​នោះ​ ត្រូវបានសង់រួចរាល់​បានប្រហែលជា ៦០ ភាគរយ​ហើយ​​។ ហើយ​ក្រុមហ៊ុន​របស់​លោក បាន​ប្រើប្រាស់​ទុន​របស់​ក្រុមហ៊ុន​ទាំងអស់ ក្នុង​ការ​សាងសង់​នេះ ដោយ​មិនចាំបាច់​យក​ប្រាក់កក់​របស់​អ្នកទិញ​យូនីត​របស់​ខុនដូ​មក​ប្រើប្រាស់​ឡើយ​។

​លោក អៀង​ សុធារ៉ា បានបន្ថែមទៀត​ថា នៅ​ពេលសង់​រួច អតិថិជនអាចទិញ ដោយ​មិនចាំបាច់បង់ប្រាក់កក់ ហើយ​ពួកគេអាច​បង់​រំលោះប្រចាំ​ខែ​ចាប់​ពី $273 ដុល្លារ​ឡើងទៅ ក្នុង​រយពេល ៣៦ ខែ។ បន្ទាប់​ពី​នោះ ពួក​គេអាច​បង់​ត្រឹម​តែ $160 ដុល្លារ ទៅ $170 ក្នុង​មួយ​ខែ​បាន​។

លោក​បាន​អោយ​ដឹងទៀត​ថា នៅ​ក្នុង​ក្រុមហ៊ុន Arakawa របស់​លោក ម្ខាស់​ភាគហ៊ុន​ធំ​ជាង​គេ គឺ​ជាជនជាតិ​ជប៉ុន​។ ហើយ​ក្រុមហ៊ុនរបស់​លោក​បានចំណាយ​ទុន​វិនិយោគ​ប្រមាណ​ជា $70 លាន​ដុល្លារ ក្នុង​ការសាងសង់​អគារ​ខុនដូ​ដ៏​ប្រណិត​ទាំងនោះ​ ដែល​នឹង​​​ប្រកប​ដោយ​គុណភាព​ខ្ពស់ សុវត្ថិភាព​​ខ្ពស់ និង​ មិន​ប៉ះពាល់ដល់​បរិដ្ឋាន​​។

លោក​បាន​ថ្លែង​ប្រាប់​អ្នកសារព័ត៌មានថា៖ «ចាប់តាំងពីយើងប្រកាសលក់មក ដែលមានចំនួន ១០ អគារ ឬ៥ប្លុក (A-E) (ដំណាក់កាលទី១) ដែលមានជាង ១០០០ យូនីតទាំងធំ ទាំងតូច ហើយរហូតមកដល់ពេលបច្ចុប្បន្ន យើងលក់បានជិត ១០០០ យូនីតហើយ។»

ចំណែកឯលោក អាឡិច យ៉ាស៊ូម៉ូតូ ដែល​ជា​ជនជាតិ​ជប៉ុន​ សហស្ថាបនិក​នៃ​ក្រុមហ៊ុន Arakawa នេះ​វិញ បានថ្លែង​ថា គោល​បំណងរបស់​ក្រុមហ៊ុនរបស់​លោក ក្នុង​ការសង់​លំនៅ​ដ្ឋាន​សំរាប់​អ្នកមានចំណូលទាប​និង​មធ្យមបែបនេះ គឺ​ដើម្បី​អាច​អនុញ្ញាត​អោយ​និស្សិត គូ​ស្វាមីភរិយាថ្មី និង អ្នក​ក្រ អាច​ទិញ​លំនៅដ្ឋាន​ស្តង់ដារ​ជប៉ុន​ ក្នុង​តំលៃ​មួយ​​យ៉ាង​សមរម្យ​បំផុត​។

លោក អាឡិច យ៉ាស៊ូម៉ូតូ បាន​បន្ថែម​ទៀត​ថា នៅ​ថ្ងៃ​អនាគត ប្រជាពលរដ្ឋ​កម្ពុជា​នឹង​​សំរេច​ចិត្ត​មក​រស់​នៅ​ក្នុង​ខុនដូ​ ជិត​កន្លែង​ធ្វើការវិញ ជាជាងរស់ជាយ​ក្រុង ឆ្ងាយ​ពី​កន្លែង​ធ្វើការ​៕

Related Articles