We TV Cambodia

ស្រូវវស្សាទូទាំងប្រទេសសម្រេចបានជិត៩០%នៃផែនការ

ស្រូវវស្សាទូទាំងប្រទេសសម្រេចបានជិត៩០%នៃផែនការ

អត្ថបទដោយ៖ រដ្ឋ ស្រីពេជ្រ

ភ្នំពេញ៖ ដំណាំស្រូវវស្សាទូទាំងប្រទេស សម្រចបានជិត៩០% នៃផែនការដែលបានគ្រោងទុកជាង២ លានហិកតា។ នេះបើតាមក្រសួងកសិកម្ម រុក្ខប្រមាញ់ និងនេសាទ ថ្ងៃ ១៣ សីហា ឆ្នាំ២០២០។

តាមរយៈរបាយការណ៍ របស់ក្រសួងកសិកម្មរុក្ខាប្រមាញ់ និងនេសាទ បានឱ្យដឹងថាគិតត្រឹមខែ កក្កដា ឆ្នាំ២០២០ ការងារបង្កបង្កើនផលស្រូវរដូវវស្សានៅទូទាំងប្រទេស លើផ្ទៃដីចំនួនជាង២លានហិកតា ស្មើនឹង៨៨,១៧% នៃផែនការ លើសឆ្នាំមុនចំនួន ១៦៤ ពាន់ហិកតា ។

ក្នុងនោះ ការប្រមូលផលស្រូវស្រាល សម្រេចបានជាងចំនួន ៦៣ ពាន់ហិកតា ដោយទទួលបរិមាណផលស្រូវសរុបចំនួន ២៦៧ ពាន់តោន ។  មានចំនួន៩ខេត្ត ដែលស្រូវទទួលរងការខូចខាត ដោយគ្រោះរាំងស្ងួត សរុបចំនួនជាង ១០២ ពាន់ហិកតា ស្មើនឹង៨,៥៤%។

សូមជម្រាបជូនថា ការនាំចេញអង្ករវិញ ក្នុងរយៈពេល៧ខែឆ្នាំ២០២០នេះ មានការនាំចេញអង្ករបានចំនួន៤២៦ ០៧៣តោន និងនាំចេញទៅកាន់ទិសដៅចំនួន ៥៧ប្រទេស ក្នុងនោះប្រទេសចិនលំដាប់ទី១ បារាំងទី២ ហ្គាបុង ទី៣ ម៉ាឡេស៊ីលទី៤ អូស្ត្រាលីទី៥ ហូឡង់ ទី៦ វៀតណាមទី៧ អង់គ្លេស​ ទី៨ ប្រ៊ុយណេទី៩ និងប្រទេសប៉ូឡូញលំដាប់ទី១០ ហើយបច្ចុប្បន្នក្រុមហ៊ុនបាននាំចេញអង្ករមានចំនួន ៧០ក្រុមហ៊ុនផងដែរ ៕

 

Related Articles