We TV Cambodia

សេវាទូទាត់ប្រាក់តាមទូរស័ព្ទដៃ អាចធ្វើអោយអ្នកក្រងាយស្រួលទទួលបានសេវាធនាគារ

សេវាទូទាត់ប្រាក់តាមទូរស័ព្ទដៃ អាចធ្វើអោយអ្នកក្រងាយស្រួលទទួលបានសេវាធនាគារ
រូបភាពៈ ធនាគារអភិវឌ្ឍន៍អាស៊ី

ដោយៈ ទិន សុខាវុធ

អ្នក​ឯកទេស​នៃ​ធនាគារអភិវឌ្ឍន៍​អាស៊ី (ADB) បាន​លើក​ឡើងថា សេវាទូទាត់​ប្រាក់តាមទូរស័ព្ទ​ដៃ អាច​ជួយ​​អោយ​អ្នកក្រ​ទទួល​បាន​នូ​សេវា​ធនាគារ​បាន​​​យ៉ាង​ងាយ​ស្រួល​ នៅ​ក្នុង​​បណ្តា​ប្រទេស​កំពុង​អភិវឌ្ឍន៍​នៅ​ក្នុង​ទ្វីប​អាស៊ី​យើង​នេះ​។

លោក Shigehiro Shinozaki អ្នកជំនាញ​ផ្នែក​ខាង​ផ្តល់​ហិរញ្ញប្បទាន​សំរាប់​ក្រុមហ៊ុន​ឯកជន ដែល​ជា​សហគ្រាស​ធុន​តូច​និងមធ្យម (SME) បាន​លើក​ឡើង​ថា សេវា​ទូទាត់​ប្រាក់​តាម​ទូរស័ព្ទ​ដៃ ដោយ​ភ្ជាប់​ទៅ​នឹង​ទិន្នន័យ​របស់​ស្ថាប័ន​ហិរញ្ញទាំងឡាយ អាច​ជួយ​អោយ​អ្នកក្រ​គ្មាន​សេវា​ធនាគារ ទទួល​បាន​នូវ​សេវា​នេះ​បាន​យ៉ាង​ងាយ​ស្រួល​​។

«Mobile money, enabled by data connectivity, can be a game-changer for the unbanked poor in developing Asia,» នេះ​ជា​សំណេរ​របស់​លោក Shigehiro Shinozaki នៅ​ក្នុង​បទ​វិភាគ​របស់​លោក ដែល​ត្រូវ​បានចុះ​ផ្សាយ​នៅ​លើគេហទំព័រ​របស់​ ADB កាលពី​ពេលកន្លងទៅ។

លោកបាន​អះអាង​ទៀត​ថា សេវា​ទូទាត់​ប្រាក់តាម​ទូរស័ព្ទ​ដៃ​ បាននិងកំពុង​ធ្វើអោយ​ជីវិត​របស់​អ្នក​ក្រ​ឡាយ​ត្រូវ​បាន​កែ​លំអអោយ​បាន​​កាន់​តែ​ប្រសើរឡើងពី​មួយ​ថ្ងៃ​ទៅមួយ​ថ្ងៃ​។ ជាក់ស្តែង សេវា​នេះ​​ធ្វើ​អោយ​អ្នកក្រ​ធ្វើការ​ចំណាយ​តិច​​ជាង​មុន ជាមួយ​នឹង​ល្បឿន​លឿន​ជាង​មុន និងប្រកបដោយ​សុវត្ថិភាព​​ជាង​មុន ដោយ​មិន​ចាំបាច់​ធ្វើដំណើរទៅ​កាន់គ្រឹះស្ថានហិរញ្ញវត្ថុ​ នៅ​ក្នុង​តំបន់ដែលពួក​គេ​រស់នៅឡើយ​។ បាន​ន័យ​ថា សេវា​នេះ​បាន​និង​កំពុង​​បង្កើត​នូវ​សង្គមចាយលុយ​​គ្មាន​​ក្រដាស់​ប្រាក់​។

«Mobile money allows the poor to make low-cost, fast, safe, and easy transactions without going to physical branches, and encourages a cashless society.»

មួយវិញទៀត យោង​តាម​តួលេខ​របស់​ក្រុមហ៊ុន GSMA នៅក្នុង​ឆ្នាំ ២០១៦ ចំនួន​អ្នកប្រើប្រាស់​ទូរស័ព្ទ​ដៃ​នៅ​ក្នុង​ទ្វីបអាស៊ី បានកើនដល់​ចំនួន ២,៧០០ លាន​នាក់​។ ហើយ​ចំនួន​នេះ​នឹងកើន​ដល់ ៣,១០០ នាក់ នៅក្នុង​ឆ្នាំ ២០២០ ខាង​មុខ​នេះ​។

យ៉ាងណាម៉ិញ បើ​យោង​តាម​តួលេខ​របស់​ក្រុមហ៊ុន McKinsey & Co. នៅពេលបច្ចុប្បន្ននេះ ចំនួន​អ្ន​ក​ប្រើប្រាស់​ទូរស័ព្ទ​ដៃ​ក្នុង​ការទូទាត់​ប្រាក់​នៅ​ក្នុង​ទ្វីប​អាស៊ី បាន​កើនដល់​ចំនួន​ជាង ៧០០ លាន​នាក់​។

ស្រដៀង​គ្នានេះ​ដែរ នៅ​ក្នុង​បទវិភាគ​របស់​លោក​​មួយ​ទៀត​​មាន​ចំណង​ជើង​ថា «Financing agriculture value chains in the digital age» លោក Shigehiro Shinozaki ក៏​បានគូស​បញ្ជាក់​ផង​ដែរ​ថា សេវាទូរស័ព្ទ​ដៃ​​​​ដើរ​តួ​នាទី​យ៉ាង​សំខាន់​ ក្នុង​ការធ្វើ​អោយ​កសិករតូចតាច​(smallholder farmer) ​​អាច​ទទួល​បាន​នូវ​ទីផ្សារ​លក់​កសិផល​របស់​ពួក​គេ​​បាន​ថ្លៃ ហើយ​វា​ក៏​ជា​កត្តាធ្វើ​​អោយ​ពួក​គេ​អាច​កាត់​បន្ថយ​ការចំណាយ​​នៅ​ក្នុង​មុខ​របរ​រកស៊ី​របស់​ពួក​គេ​​ផង​ដែរ​៕

Related Articles