សហរដ្ឋអាមេរិកនឹងផ្ដល់ជំនួយបច្ចេកទេសដល់រដ្ឋាភិបាលកម្ពុជា សម្រាប់សិក្សាលើគម្រោងហេដ្ឋារចនាសម្ព័នធំៗ ដែលត្រូវការជំនាញបច្ចេកទេសខ្ពស់

យោងតាមសេចក្ដីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុ ស្ដីពីជំនួបពិភាក្សារវាងឯកឧត្តម អូន ព័ន្ធមុនីរ័ត្ន និងលោក Patrick Murphy បានឲ្យដឹងថា សហរដ្ឋអាមេរិកគ្រោងនឹងផ្ដល់ជំនួយបច្ចេកទេសដល់រាជរដ្ឋាភិបាលកម្ពុជាសម្រាប់សិក្សាលើគម្រោងហេដ្ឋារចនាសម្ព័ន្ធធំៗ ដែលត្រូវការជំនាញបច្ចេកទេសខ្ពស់។

លោក Patrick Murphy ក៏បានវាយតម្លៃខ្ពស់ចំពោះកិច្ចខិតខំរបស់រាជរដ្ឋាភិបាលកម្ពុជាក្នុងការគ្រប់គ្រងសេដ្ឋកិច្ច ក្នុងស្ថានការណ៍នៃ COVID-19 នេះ ក៏ដូចជាបានចាតើវិធានការបានយ៉ាងល្អប្រសើរចំពោះការរីគរាលដាលនៃជំងឺ COVID-19 ហើយរដ្ឋាភិបាលអាមរិកនឹងបន្តជួយគាំទ្រ និងផ្ដល់ហិរញ្ញប្បទានបន្ថែមទៀតដល់រាជរដ្ឋាភិបាលកម្ពុជាដើម្បីបង្ការ ទប់ស្កាត់ និងឆ្លើយតបទៅនឹងការរីករាលដាលនៃជំងឺ COVID-19 នេះ។

មិនតែប៉ុណ្ណោះ ឯកឧត្តម អូន ព័ន្ធមុនីរ័ត្ន ក៏បានសម្ដែងនូវអំណរគុណចំពោះរដ្ឋាភិបាលសហរដ្ឋអាមេរិក ដែលបន្តជួយដល់រាជរដ្ឋាភិបាលកម្ពុជាក្នុងករប្រយុទ្ធនឹងជំងឺ COVID-19 ពិសេសសម្រាប់វិស័យសុខាភិបាល ក៏ដូចជាវិស័យសេដ្ឋកិច្ច និងក្នុងនាមជាដៃគូអភិវឌ្ឍន៍នានាផងដែរ។

អត្ថបទដោយ៖ Nevin