We TV Cambodia

សហភាពអឺរ៉ុបគាំទ្រការបង្កើនទំហំវិនិយោគអឺរ៉ុបនៅកម្ពុជា

រូបថតៈ ព្រឹទ្ធសភា

ដោយៈ ទិន សុខាវុធ

លោក​ជំទាវ Carmen Moreno ឯកអគ្គរដ្ឋទូត​នៃ​សហភាព​អឺរ៉ុប​
ប្រចាំ​នៅ​កម្ពុជា បាន​សន្យាថា​នឹង​លើកទឹកចិត្តវិនិយោគិន​អឺរ៉ុប អោយ​មក​វិនិយោគ​នៅ​កម្ពុជា​
អោយបា​ន​កាន់តែ​ច្រើនឡើង​ថែម​ទៀត​។ ​លោក​ជំទាវ​ក៏​បាន​សន្យា​ផង​ដែរ​​ថា នឹងធ្វើយ៉ាង​ណា​រក្សា​ទំនាក់ទំនងល្អ​រវាង​កម្ពុជា​និង​សហភាព​អឺរ៉ុប​
អោយ​នៅ​ដដែល​។

យោង​តាម​សេចក្តី​ប្រកាស​ព័ត៌មាន​មួយ​​របស់​ព្រឹទ្ធ​សភា
នៅ​ក្នុង​ជំណួប​ជាមួយ​លោក​ប្រធានព្រឹទ្ធសភា សាយ ឈុំ កាល​ពី​ថ្ងៃ​ទី ២៦ ខែ វិច្ឆិកា
ឆ្នាំ ២០១៩ កន្លង​ទៅ លោកជំទាវ Carmen Moreno បានទទួល​ស្គាល់​ពី​ការរីកចំរើន​សេដ្ឋកិច្ច​
ក៏​ដូច​ជា​ផ្នែក​ច្បាប់​ កើត​ចេញ​ពីការកែទំរង់​របស់​រាជ​រដ្ឋាភិបាល​កម្ពុជា​​បច្ចុប្បន្ន​។

លើស​ពី​នេះ​ទៀត លោក​ទំទាវ​ក៏​បាន​គូស​បញ្ជាក់​ផង​ដែរ​ថា
សហភាពអឺរ៉ុប​គាំទ្រ​ទាំងស្រុង​​នូវ​គោលនយោបាយនានារបស់​រាជរដ្ឋាភិបាល​កម្ពុជា​ ក៏ដូចជា​គោល​នយោបាយ​របស់​សភាជាតិនិង​​​ទ្រឹព្ធសភា​កម្ពុជា​ផង​ដែរ​​។

លើស​ពីនេះ​ទៀត សេចក្តីប្រកាសព័ត៌មាន​បានបន្ថែមថា ទំនាក់ទំនងការទូតរវាងកម្ពុជា​និងសហភាពអឺរ៉ុប ត្រូវបានបង្កើតឡើងនៅ​ក្នុង​ឆ្នាំ ១៩៩៤ ។ ហើយ​ចាប់តាំង​ពីពេលនោះមក សហភាពអឺរ៉ុប​បានផ្តល់ជំនួយ​គាំទ្រផ្នែកហិរញ្ញវត្ថុ សំរាប់ការអភិវឌ្ឍ​នៅ​ក្នុង​វិស័យ​ជា​ច្រើន​នៅ​កម្ពុជា មានដូចជា​​វិស័យសង្គម-សេដ្ឋកិច្ច ពាណិជ្ជកម្ម ហេដ្ឋារចនាសម្ព័ន្ធ អប់រំ និង​ វិស័យ​សុខាភិបាល​ជាដើម​។

នៅ​ក្នុង​ឱកាសនោះ លោក​ប្រធាន​ព្រឹទ្ធ​សភា សាយ ឈុំ ក៏​បាន​លើ​ក​ឡើ​ងផង​ដែរ​ថា ការកើន​ឡើង​ឥត​ឈប់​ឈ​រ​នៃ​ទំហំពាណិជ្ជកម្ម​រវាង​កម្ពុជា​និង​សហភាព​អឺរ៉ុប បានជួយ​ជា​វិភាគទានដ៏​សំខាន់ ក្នុង​ការកាត់បន្ថយ​ភាព​ក្រីក្រ​នៅ​កម្ពុជា​៕

Related Articles