We TV Cambodia

សហភាពសហជីពកម្ពុជា មិនគាំទ្រការធ្វើវិសោធនកម្មច្បាប់ការងារ ដែលក្រសួងការងារចង់កាត់បន្ថយប្រាក់ឈ្នួលកម្មករវេនយប់

សហភាពសហជីពកម្ពុជា មិនគាំទ្រការធ្វើវិសោធនកម្មច្បាប់ការងារ ដែលក្រសួងការងារចង់កាត់បន្ថយប្រាក់ឈ្នួលកម្មករវេនយប់
ប្រភពរូបភាព៖ គជប

ដោយ៖ស្រីពេជ្រ

ភ្នំពេញ៖ សហភាពសហជីពកម្ពុជា មានការមិនពេញចិត្ត និងមិនគាំទ្រ ចំពោះគម្រោងរបស់ក្រសួងការងារ និងបណ្ដុះបណ្ដាលវិជ្ជាជីវៈ ដែលគ្រោងធ្វើវិសោធនកម្មច្បាប់ការងារ ក្នុងន័យកាត់ប្រាក់ឈ្នួលការងារកម្មការវេនយប់។ នេះ បើតាមសេចក្ដីថ្លែងការណ៍ ចេញដោយសហភាពសហជីពកម្ពុជា​នៅថ្ងៃទី ១៤ ខែ មករា ឆ្នាំ ២០២០។

នៅក្នុងសេចក្ដីថ្លែងការណ៍នេះ សហភាពសហជីពកម្ពុជា កត់សម្គាល់ឃើញថា កាលពីឆ្នាំំ ២០០៧ ក្រសួងបានធ្វើវិសោធនកម្មស្ដីពីច្បាប់ការងារ ត្រង់មាត្រា១៤៤​ ពាក់ព័ន្ធនិងអត្រាប្រាក់ឈ្នួលបន្ថែមម៉ោង និងការងារវេនយប់ពី ១៥០% មកនៅត្រឹម ១៣០% នៃប្រាក់ឈ្នួលការងារវេនថ្ងៃ ដែលកម្មករ និយោជិត បាត់បង់អត្ថប្រយោជន៍ម្ដងរួចមកហើយ។

ក្នុងពេលនេះ ក្រសួង មានគម្រោងធ្វើវិសោធនកម្ម ច្បាប់ស្ដីពីការងារម្ដងទៀត ដោយកាត់បន្ថយប្រាក់ឈ្នួលវេនយប់មកត្រឹម ១០០% ស្មើអត្រាប្រាក់ឈ្នួលវេនថ្ងៃវិញ។

លោក រ៉ុង ឈុន ជាប្រធានសហភាពសហជីបកម្ពុជា បានថ្លែងនៅក្នុងខ្លឹមសារនៃសេចក្ដីថ្លែងការណ៍ថា៖«​គម្រោងវិសោធនកម្មរបស់ក្រសួងការងារ ជាជម្រើសដ៏អាក្រក់បំផុត ដែលធ្វើឱ្យបាត់បង់ផលប្រយោជន៍កម្មករ និយោជិតធ្វើការងារវេនយប់ជាបន្តបន្ទាប់»។

លោកបន្តថា៖« ក្រសួងធ្វើបែបនេះ ជាការផ្គាប់ចិត្តថៅកែក្រុមហ៊ុន មិនបានគិតអំពីផលប្រយោជន៍ និងការលំបាករបស់កម្មករ និយោជិត ដែលបាន និងកំពុងប្រឈមសព្វថ្ងៃ ជាពិសេសកម្មករ និយោជិតការងារវេនយប់»។

លោក​បន្ថែមថា៖« សូម្បីតែកម្មករវេនថ្ងៃ ក៏មានផលប៉ះពាល់ផងដែរ អាចនឹងបាត់បង់ការងារបន្ថែមម៉ោង»។

រីឯ​លោក ហេង សួរ មន្ត្រី​នាំពាក្យ​ក្រសួង​ការងារ មិនទាន់​បាន​ឆ្លើយតប​ចំពោះ​ការលើកឡើង​របស់​ក្រុម​សហជីព​ទាំងនេះ​ទេ​។ ចំណែក​លោក ផៃ ស៊ីផាន មន្ត្រី​នាំពាក្យ​រាជរដ្ឋាភិបាល​សុំ​មិន​អត្ថាធិប្បាយ​ជុំវិញ​រឿងនេះ​ទេ ដោយ​លោក​បាន​ជំរុញ​ឱ្យទៅ​សួរ​លោក ហេង សួរ វិញ​ នេះបើតាមការបញ្ជាក់ពីប្រភពព័ត៌មានក្នុងស្រុក។

ជាមួយគ្នានេះដែរ លោក សោម អូន ប្រធានសភា​សម្ព័ន្ធ​សហជីព​ជាតិ​កម្ពុជា​បាន​ថ្លែង​ពី​ម្សិលមិញ​ប្រាប់សារព័ត៌មានក្នុងស្រុកថា លោក​មិនទាន់​ដឹង​ច្បាស់​អំពី​មូលហេតុ​នៃ​ការធ្វើ​វិសោធនកម្ម​ច្បាប់​ស្ដីពី​ការងារ​នេះ​ទេ ប៉ុន្តែ​លោក​ថា​នឹង​ផ្ដល់​បទសម្ភាស​នៅពេល​ក្រោយ បន្ទាប់ពី​លោក​បាន​ទៅ​ចូលរួម​សិក្ខាសាលា​ពិគ្រោះ​យោបល់​របស់​ក្រសួង​នៅ​ថ្ងៃទី​ ១៦ មករា​ខាង​មុខ​នេះ ។

សូមបញ្ជាក់ផងដែរថា កាលពី​ថ្ងៃ​ ៩ មករា លោក អ៊ិត សំហេង រដ្ឋមន្ត្រីក្រសួង​ការងារ និង​បណ្ដុះបណ្ដាល​វិជ្ជាជីវៈ​បានចេញ​លិខិត​មួយ​ដោយ​បញ្ជាក់ថា ក្រសួង​ការងារ​កំពុង​រៀបចំ​ការ​ធ្វើ​វិសោធនកម្ម​ច្បាប់​ស្ដីពី​ការងារ​លើ​ការកែសម្រួល​អត្រា​ប្រាក់​ឈ្នួល​វេន​ការងារ​យប់ លុប​ការឈប់​នៅ​ថ្ងៃ​បន្ទាប់ សម្រាប់​ថ្ងៃ​ឈប់សម្រាក​ចំ​លើ​ថ្ងៃ​អាទិត្យ និង​ពង្រីក​វិសាលភាព​របស់​ក្រុមប្រឹក្សា​អាជ្ញាកណ្ដាល​ក្នុង​ការដោះស្រាយ​វិវាទ​បុគ្គល៕

Related Articles