We TV Cambodia

សណ្ឋាគារផ្កាយប្រាំ Sunshine Bay បើកដំណើរការនៅក្រុងព្រះសីហនុ

សណ្ឋាគារផ្កាយប្រាំ Sunshine Bay បើកដំណើរការនៅក្រុងព្រះសីហនុ

រូបថតៈ Facebook ក្រសួងទេសចរណ៍

ដោយៈ ទិន សុខាវុធ

សណ្ឋាគារ​ផ្កាយ​ប្រាំ​លំដាប់​អន្តរជាតិ Sunshine Bay ​នៅ​ក្រុង​ព្រះ​សីហនុ
ត្រូវ​បាន​សម្ពោធ​ដាក់​អោយ​ដំណើរការ​ជា​ផ្លូវការ។

យោង​តាម​ទំព័រ Facebook របស់​ក្រសួង​ទេសចរណ៍ កាល​ពី​ថ្ងៃ​ទី
១៩ ខែ តុលា ឆ្នាំ ២០១៩ កន្លង​ទៅ​នេះ សណ្ឋាគារលំដាប់ផ្កាយ​ប្រាំ​ខាង​លើ​
ត្រូវ​បាន​ដាក់​សម្ពោធ​បើកអោយ​ប្រើប្រាស់​ជាផ្លូវការ ក្រោម​អធិបតី​ភាព ឯកឧត្តម គុជ
បញ្ញាសា អនុរដ្ឋ​លេខាធិការ​ក្រសួង​ទេសចរណ៍​។

នៅ​ក្នុង​ឱកាស​នោះ លោក NG Man Son ប្រធាន​ក្រុមហ៊ុ់ន
Century Entertainment
ដែល​​ជា​ម្ខាស់​គំរោង​វិនិយោគ Sunshine Bay Hotel Resort និង​ដែលជា​ក្រុមហ៊ុន​វិនិយោគ​មក​ពី​ក្រុង​ហុងកុង
បានសំដែង​​នូវ​មោទភាព​​ចំពោះ​ការសំរេចបាន​ប្រកប​ដោយ​ជោគជ័យ​ ពី​ការសាងសង់​សណ្ឋាគារ​ដ៏​ប្រណិត​មួយ​នេះ​
នៅ​​ក្នុង​ក្រុង​ព្រះ​សីហនុ​។

បើតាម​លោក NG Man Son សណ្ឋាគារ​  Sunshine Bay មាន​កំពស់ ៣០ ជាន់ និង​មាន ២២២
បន្ទប់ ដែល​​អាច​បង្កើត​ការងារ​​បាន​ចំនួន ១៥០០ កន្លែង​សំរាប់​ប្រជាពលរដ្ឋ​រស់​នៅ​ក្នុង​តំបន់នោះ​។

មួយវិញទៀត លោក​ប្រធាន​ក្រុមហ៊ុន Century Entertainment មាន​សុទិដ្ឋិនិយម​ថា
នៅ​ថ្ងៃ​អនាគត ក្រុង​ព្រះ​សីហនុ​នឹងក្លាយ​ទៅ​ជា​ទីក្រុង​ដ៏​ទំនើប​មួយ មិន​ចាញ់​ក្រុង​ហុងកុង
និង ម៉ាកាវ ឡើយ​។

«រាជរដ្ឋាភិបាលក៏បាននិងកំពុងបន្តយកចិត្តទុកដាក់ខ្ពស់ក្នុងការកែលម្អប្រព័ន្ធហេដ្ឋារចនាសម្ព័ន្ធ និងបានដាក់ចេញផែនការក្នុងការកសាងស្ថានីយចម្រោះទឹកកខ្វក់ ការពង្រីកប្រព័ន្ធលូ និងការកសាងហេដ្ឋារចនាសម្ព័ន្ធរូបវន្តសំខាន់ៗទៀត ដើម្បីដោះស្រាយបញ្ហាប្រឈមនានាដែលកើតមានឡើងនៅខេត្តព្រះសីហនុនេះ» នេះ​ជា​សំណេរ​របស់​ក្រសួង​ទេសចរណ៍​នៅ​លើ​ទំព័រ​ Facebook របស់​ក្រសួង​។

ជាមួយ​គ្នា​នេះ​ដែរ ឯកឧត្តម គុជ បញ្ញាសា បាន​អបអរ​សាទរ​ចំពោះ​សមិទ្ធិផល​​នៃ​សំណង់​សណ្ឋាគារ​លំដាប់​ផ្កាយ​ប្រាំ​​ថ្មី​មួយ​នេះ
នៅ​លើទឹក​ដី​នៃក្រុង​ព្រះសីហនុ​។ ហើយ​លោកក៏​បាន​ថ្លែង​អំណរគុណ​ដល់​ក្រុមហ៊ុន Century Entertainment
ដែល​បាន​ចូល​រួមចំណែក​ដល់​ការ​ធ្វើពិពិធកម្ម​ផលិតផល​ទេសចរណ៍ ក្នុងគោលបំណង​​លើក​កំពស់​គុណភាព​សេវាទេសចរណ៍​នៅ​ក្នុង​ខេត្ត​ព្រះ​សីហនុ
ក៏​ដូច​ជា​ការបង្កើត​ឱកាស​ការងារ​សំរាប់ប្រជាពលរដ្ឋ ក្នុង​គោលដៅ​កាត់បន្ថយ​ភាពក្រីក្រ​នៅ​កម្ពុជា​​។

យោង​តាម​ក្រសួង​ទេសចរណ៍ នៅ​ក្នុង​យុទ្ធសាស្ត្រ​អភិវឌ្ឍន៍​របស់​រាជ​រដ្ឋាភិបាល (យុទ្ធសាស្ត្រ​ចតុកោណ តំណាក់កាល​ទី ៤) ខេត្តព្រះ​សីហនុត្រូវ​បាន​រាជ​រដ្ឋាភិបាលកំណត់​ថា​​ជា​ «តំបន់​សេដ្ឋកិច្ច​ពហុបំណង» ដែល​ជា​​គោលដៅទីក្រុង​ទេសចរណ៍​មួយ ប្រកបដោយ​សក្តានុពល​សេដ្ឋកិច្ច​៕

Related Articles