We TV Cambodia

វរសិល្បករព្រឹទ្ធចារ្យ ប៊ីវ ឆៃលាង កវីនិពន្ធដ៏ល្បីទទួលមរណភាពក្នុងជន្មាយុ ៩៣ ឆ្នាំ

វរសិល្បករព្រឹទ្ធចារ្យ ប៊ីវ ឆៃលាង កវីនិពន្ធដ៏ល្បីទទួលមរណភាពក្នុងជន្មាយុ ៩៣ ឆ្នាំ

ដោយ៖ស្រីពេជ្រ

ទីក្រុងប៉ារីស៖ វរសិល្បករព្រឹទ្ធចារ្យ ប៊ីវ ឆៃលាង ទទួលមរណភាពនៅថ្ងៃចន្ទ ទី៦ ខែមករា ឆ្នាំ២០២០ វេលាម៉ោង១និង៥៥នាទី រំលងអាធ្រាត នាគេហដ្ឋានរបស់លោក ទីក្រុងប៉ារីស ប្រទេសបារាំង ក្នុងជន្មាយុ ៩៣ឆ្នាំ ដោយជរាពាធ។

ជាការសោកស្តាយរកអ្វីប្រៀបផ្ទឹមមិនបាន ដែលព្រឹទ្ធចារ្យរៀមច្បងដែលមានស្នាដៃកំពូលមួយរូបក្នុងវិស័យអក្សរសាស្រ្ត និងភាពយន្តខ្មែរ បានទទួលមរណភាពកាលពីថ្ងៃទី ៦ ខែមករា ឆ្នាំ ២០២០ កន្លងទៅ។ លោក​ ព្រឹទ្ធចារ្យ ប៊ីវ ឆៃលាង កើត​នៅ​ថ្ងៃ​៤ ខែ​តុលា ឆ្នាំ​១៩៣០ ក្នុង​ភូមិ​ជ្រៃ​វៀន ស្រុក​ព្រៃឈរ ខេត្ត​កំពង់​ចាម។

នេះបើតាម «ក្រុមព្រះសុរិយា»លោក ប៊ីវ ឆៃលាង មិនត្រឹមតែជាកវីកំពូលមួយរូបនោះទេ លោកក៏ជាផលិតករភាពយន្តដ៏ឆ្នើមមួយរូបផងដែរ ដោយលោកបានបំរើវិស័យសិល្បៈភាពយន្តខ្មែររវាងពីឆ្នាំ១៩៦០-១៩៧៥ ក្នុងនាមលោកជាចាងហ្វាងផលិតកម្មឥន្រ្ទទេវី និងអ្នកដឹកនាំខ្សែភាពយន្តផង។ស្នាដៃភាពយន្តជាច្រើនរបស់លោកសុទ្ធសឹងតែមានឈ្មោះល្បីល្បាញពេញប្រទេសកម្ពុជានិងនៅបរទេសយ៉ាងច្រើនអស្ចារ្យ ហើយខ្សែភាពយន្តទាំងនោះនៅតែដកជាប់ក្នុងចិត្តប្រជាទស្សនិកជនគ្រប់រូបដោយមានជាអាទិ៍ដូចជា ៖ រឿង កងកម្មកងកែវ , កាកី , នាងសក់ក្រអូប , ព្រះនាងពិម្ពាសរជាតិ , ទាវឯក ,ការកេត , កាលណាផ្ការីក , ព្រះមហាមោគ្គលាន ជាដើម៕

ប្រភព៖ ក្រុមព្រះសុរិយា

Related Articles