We TV Cambodia

រោងម៉ាស៊ិនកិនស្រូវ ១៨ ទៀត ត្រូវបានអនុញ្ញាតនាំអង្ករចេញទៅចិន

រោងម៉ាស៊ិនកិនស្រូវ ១៨ ទៀត ត្រូវបានអនុញ្ញាតនាំអង្ករចេញទៅចិន

រូបថតៈ ក្រសួងកសិកម្ម

ដោយៈ ទិន សុខាវុធ

រដ្ឋាភិបាល​នៃ​ប្រទេសចិន តាម​រយៈ​ទូតចិនប្រចាំ​នៅ​កម្ពុជា​
បានអនុញ្ញាត​អោយ​​រោងម៉ាស៊ីន​កិនស្រូវ​ចំនួន ១៨ ទៀត​នៅ​កម្ពុជា អាច​មាន​លទ្ធភាព​នាំ​អង្ករ​ចេញ​ទៅលក់​នៅ​លើ​ទី​ផ្សារ​ក្នុង​ប្រទេស​ចិនបាន​តាម​កូតា​កំណត់​​។

យោង​តាម​សេចក្តី​ប្រកាសព័ត៌មាន​របស់​ក្រសួង​កសិកម្ម
កាល​ពី​ថ្ងៃ​ទី ១៩ ខែ ធ្នូ ឆ្នាំ ២០១៩ កន្លង​ទៅ​នេះ ក្រសួង​បាន​រៀបចំ​ពិធី​ប្រកាស​ព័ត៌មាន​ស្តីពី​សិទ្ធិនាំ​អង្ករចេញ​​ទៅ​ប្រទេស​ចិន
របស់​រោង​ម៉ាស៊ីន​កិនស្រូវ​​ទាំង ១៨ នេះ ក្រោម​អធិបតីភាព​លោក​រដ្ឋ​មន្ត្រី វេង
សាខុន និង​តំណាង​ទូត​ចិន​លោក Wu Guoquan នៅ​ឯ​ទី​ស្តី​ការ​របស់​ក្រសួង​។

នៅ​ក្នុង​ពិធីនោះ លោក​រដ្ឋ​មន្ត្រីបាន​សង្កត់ធ្ងន់ថា ទោះជា​​​​បាន​ទទួល​ការអនុញ្ញាត​អោយ​នាំ​អង្ករ​ចេញ​យ៉ាង​ណាក៏​ដោយ ក៏​រោង​រោង​ម៉ាស៊ីន​កិន​ស្រូវ​ទាំងនោះ​ចាំបាច់​ត្រូវ​ធ្វើ​យ៉ាងណា​អោយ​បរិមាណ​អង្ករដែល​ត្រូវ​នាំ​ចេញ​នោះ មាន​គុណភាព​សម​ស្របតាមស្តង់ដារ​នៃ​ទីផ្សារ​នាំ​ចេញ ជាពិសេស​ស្តង់ដារ SPS ។

លើស​ពី​នេះ​ទៀត
លោក​រដ្ឋ​មន្ត្រី​ក៏​បានលើក​ឡើងផង​ដែរ​ថា កសិករ​ខ្មែរ​ទាំងឡាយ​​ដែល​ធ្វើ​ការដាំដុះដំណាំ​ស្រូវសំរាប់​នាំ​ចេញ
ក៏​ត្រូវ​ស្វែង​យល់​ពីការធ្វើពាណិជ្ជកម្ម​ផងដែរ​។ ពោល​គឺ​ពួកគេ​ត្រូវ​ធ្វើ​យ៉ាង​ណា​អោយ​ក្លាយ​ខ្លួន​ទៅ​ជា
«ក​សិ​-​ពាណិជ្ជករ»
តាម​បែប​សម័យ​កាលឌីជីតល់​យើង​នេះ​។

«​អ្នក​ផលិត​ក៏ត្រូវ​ក្លាយខ្លួន​ចេញពី
“​កសិករ​” ទៅជា “​ក​សិ​-​ពាណិជ្ជករ​” ដើម្បី​ទទួលបាន​បច្ចេកវិទ្យា​ទំនើប ទាន់សម័យ
សមស្រប មាន​លក្ខណៈ​ប្រកួតប្រជែង បរិ​យា​ប័ន្ន ធន់​នឹង​ការប្រែប្រួល​អាកាសធាតុ
និង​ការអនុវត្ត​កសិកម្ម​តាម​កិច្ចសន្យា ដែល​នាំ​ដល់​ការបង្កើន​សមត្ថភាព​ផលិត
តម្លៃបន្ថែម ធានា​បរិមាណ គុណភាព និង​ស្តង់ដារ​ទីផ្សារ​នាំចេញ​»
នេះ​ជាការលើក​ឡើង​របស់​លោក​រដ្ឋ​មន្ត្រី វេង​ សាខុន ។

យោង​តាម​លោក​រដ្ឋ​មន្ត្រី
កម្ពុជា​អាច​មាន​សិទ្ធិ​នាំ​អង្ករ​ចេញ​ទៅ​ប្រទេស​ចិន បានរហូត​ដល់​ទៅ ៤០០,០០០ តោន
ក្នុង​មួយ​ឆ្នាំ​។ ហើយ​ក្រៅ​ពី​អង្ករ កម្ពុជា​កំពុង​ចរចារ​ជា​មួយ​ភាគី​ចិន ក្នុង​គោលបំណង​ទទួល​បាន​សិទ្ធិ​នាំ​ចេញ​កសិផលផ្សេង​ៗ​ទៀត
ទៅ​លក់​នៅ​ប្រទេស​ចិនផងដែរ​។

ជាការឆ្លើយតប លោក Wu Guoquan បាន​ថ្លែង​ថា ក្រៅ​ពី​អង្ករ កម្ពុជា​ក៏​អាច​នាំ​​យ​ក​កសិផល​ផ្សេង​ៗ​ទៀត​ ទៅ​លក់​នៅ​លើ​ទីផ្សារ​ចិន​បានដូច​គ្នា​ដែរ មាន​ដូច​ជា ​ដំឡូង​មី ម្រេច ស្វាយ ស្វាយចន្ទី ត្រី កៅស៊ូ ដូង ជា​ដើម​៕

Related Articles