We TV Cambodia

រោងចក្រផលិតទឹកស្អាតចំការមន មានតំលៃជិត $25 លានដុល្លារ ត្រូវបានដាក់ឲ្យដំណើរការសាកល្បង

រូបថតៈ Fresh News

ដោយៈ ទិន សុខាវុធ

រោង​ចក្រ​ផលិត​ទឹក​ស្អាត​មួយ​នៅ​ក្នុង​ខ័ណ្ឌ​ចំការមក មាន​តំលៃ​ប្រមាណជា $25 លាន​ដុល្លារ ដែល​មាន​សមត្ថភាព​អាច​ផលិត​ទឹក​ស្អាត​បាន​ចំនួន​ប្រមាណជា ៥.២ ម៉ឺន​មែត្រ​គូប​ក្នុង​មួយ​ថ្ងៃ ត្រូវ​បាន​ដាក់​អោយ​ដំណើរការ​សាកល្បង កាល​ពី​ថ្ងៃទី ១៦ ខែ តុលា ឆ្នាំ ២០១៩ ។

លោក ស៊ឹម ស៊ីថា អគ្គនាយក​រដ្ឋាករ​ទឹក​ស្វ័យ័ត​ក្រុង​ភ្នំពេញ បាន​ថ្លែង​ប្រាប់​អ្នក​សារព័ត៌មានថា គំរោង​សំណង់​នេះ ត្រូវ​បាន​គាំទ្រ​ផ្នែក​ហិរញ្ញប្បទាន ដោយ​ទីភ្នាក់ងារ​បារាំង​​សំរាប់​ការអភិវឌ្ឍ (AFD) រួម​នឹង​​ថវិកាបដិភាគ​របស់​រដ្ឋាករ​ទឹក​ស្វ័យ័ត​ក្រុង​ភ្នំពេញ ហើយ​ត្រូវ​បាន​ទទួល​ម៉ៅការ​សាងសង់​ដោយក្រុមហ៊ុនបារាំង VINCI ។

សព្វថ្ងៃ​នេះ រដ្ឋាករទឹកស្វ័យ័ត​ក្រុង​ភ្នំពេញ កំពុង​ដំណើរការផលិតទឹកស្អាត ដោយ​ប្រើប្រាស់​រោងចក្រ​ចំនួន ៣ គឺ រោងចក្រ​ផលិត​ទឹក​ស្អាត​និរោធ មានសមត្ថភាព​អាចផលិត​ទឹកស្អាតបានប្រមាណ ២៦ ម៉ឺន​ម៉ែត្រគូប​ក្នុង​មួយ​ថ្ងៃ រោងចក្រ​​ជ្រោយ​ចង្វារ ១៤ ម៉ឺន​ម៉ែត្រ​គូប​ក្នុង​មួយ​ថ្ងៃ និង រោងចក្រ​ភូមិ​ព្រែក ១៧ ម៉ឺន​មែត្រគូប​ក្នុង​មួយ​ថ្ងៃ​។

ដូចនេះ នៅ​ពេលដែល​រោង​ចក្រ​ផលិត​ទឹក​ស្អាត​ចំការមន​ត្រូវ​ដាក់អោយ​ដំណើរការជាផ្លូវការ រដ្ឋាករទឹកនឹងអាច​ផលិត​ទឹកស្អាត​បាន​ប្រហែល​ជា ៦២ ម៉ឺនម៉ែត្រ​គូប​ក្នុង​មួយ​ថ្ងៃ​៕

Related Articles