We TV Cambodia

រោងចក្រផលិតថាមពលអគ្គិសនីពីធ្យូងថ្ម ក្នុងក្រុងព្រះសីហនុ នឹងដំណើរការនៅក្នុងខែធ្នូនេះ

រោងចក្រផលិតថាមពលអគ្គិសនីពីធ្យូងថ្ម ក្នុងក្រុងព្រះសីហនុ នឹងដំណើរការនៅក្នុងខែធ្នូនេះ
រូបថតៈ សហការី

ដោយៈ ទិន សុខាវុធ

លោក វ៉ិចទ័រ ហ្សូណា អគ្គនាយកថាមពល និង​ជា​អ្នកនាំពាក្យ​នៃក្រសួងរ៉ែ និងថាមពល បាន​ថ្លែង​​ថា រោងចក្រ​ផលិត​ថាមពលអគ្គិសនី​​​ពី​ធ្យូង​ថ្ម​​មួយ មានឈ្មោះថា CEL II​ ស្ថិត​ក្នុង​ក្រុង​ព្រះ​សីហនុ ត្រូវ​បាន​សាងសង់​រួច​រាល់​អស់​ហើយ​​ និង​ត្រូវ​សម្ពោធ​ដាក់​អោយ​ប្រើប្រាស់​ នៅ​ក្នុង​ខែ​ធ្នូ​នេះ​។

លោក​បានបន្ថែមទៀត​ថា មកទល់​នឹង​ពេលបច្ចុបុ្បន្ននេះ ការសាងសង់​និងការតំលើងប្រព័ន្ធ​គ្រប់គ្រង​ទូទៅ ត្រូវ​បាន​បញ្ចប់​រួចរាល់​អស់​ហើយ​​ និង​កំពុងស្ថិត​ក្រោម​ការសាកល្បង​​នៅ​លើ​​បញ្ហា​មួយ​ចំនួន​។ បើអ្វី​ៗ​នឹងប្រព្រឹត្ត​ដោយ​រលូន រោងចក្រ​នេះ​នឹងអាច​ដំណើរការ​នៅសប្តាហ៍​ទី ៣ ក្នុង​ខែ ធ្នូ​ នេះ​។

យោង​តាម​លោក វ៉ិចទ័រ ហ្សូណា រោង​ចក្រ​អគ្គិសនី​នេះ​ ដែល​នឹង​​មាន​សមត្ថភាព​អាច​ផលិត​ថាមពល​អគ្គិសនី​បាន​រហូត​ដល់ ១៣៥ មេហ្កាវ៉ាត់ ត្រូវ​បាន​វិនិយោគ​ដោយ​កក្រុមហ៊ុន​ម៉ាឡេស៊ី Leader Energy Holdings នៅ​ក្រោមឈ្មោះថ្មី​នៅ​ក្នុង​ប្រទេស​កម្ពុជា​ថា Cambodia Energy Limited II (CEL II) ក្នុង​ចំនួន​ទឹក​ប្រាក់​ប្រមាណជា $459 លាន​ដុល្លារ​។ ជាលទ្ធផល ថាមពលបាន​មកពី​រោងចក្រអគ្គិសនីនេះ នឹងត្រូវ​លក់​អោយ​​ក្រុមហ៊ុន​អគ្គិសនី​ស្វយ័ត​របស់​រដ្ឋ «អគ្គិសនីកម្ពុជា» (EDC) ។

គួរ​រំលឹក​ឡើង​វិញ​ថា រោងចក្រ​ផលិត​អគ្គិសនី​ក្នុង​ក្រុង​ព្រះ​សីហនុ របស់​ក្រុមហ៊ុន​ម៉ាឡេស៊ី Cambodia Energy Limited I (CEL I) ជា​គំរោង​វិនិយោគ​ទី​ ២ របស់​ក្រុមហ៊ុននេះ​។ គំរោង​វិនិយោគ​ទី ១ របស់​ក្រុមហ៊ុន​នេះ​គឺ រោង​ចក្រផលិតថាមពលអគ្គិសនី​ ១០០ មេហ្កាវ៉ាត់ ដែល​ត្រូវ​​បាន​ដាក់​អោយ​ដំណើរការតាំង​ពីឆ្នាំ ២០១៥ មក​ម្លេះ​៕

Related Articles