We TV Cambodia

រោងចក្រដុតកំទេចកាកសំណល់ឧស្សាហកម្មនៅខេត្តកំពត ត្រូវបានដាក់អោយដំណើរការ

រោងចក្រដុតកំទេចកាកសំណល់ឧស្សាហកម្មនៅខេត្តកំពត ត្រូវបានដាក់អោយដំណើរការ

រូបថតៈ Facebook ក្រុមហ៊ុន ជីប ម៉ុង

ដោយៈ ទិន សុខាវុធ

រោងចក្រ​កែច្នៃ​សំណល់​ឧស្សាហកម្មដំបូង​គេ​បំផុត​ស្ថិក្នុង​ខេត្ត​កំពត ​របស់​ក្រុមហ៊ុន​ ជីប ម៉ុង អ៊ិនស៊ី ស៊ីមេន ខបភើរេសិន ត្រូវ​បាន​សម្ពោធ​ដាក់​អោយ​ប្រើប្រាស់​ កាលពី​ថ្ងៃ ៥ ខែ ធ្នូ ឆ្នាំ ២០១៩ កន្លង​ទៅ​នេះ​នៅ​ក្រោម​អធិបតី​ភាព​លោក​រដ្ឋ​មន្ត្រីក្រសួង​បរិស្ថាន សាយ សំអាល់ ។

យោង​តាម​ទំព័រ Facebook របស់​ក្រសួង​បរិស្ថាន រោងចក្រ​កែច្នៃ​សំណល់​ឧស្សាហកម្មនេះ ស្តិតក្នុង​បរិវេណ​រោង​ចក្រ​ស៊ីម៉ង់ ជីប ម៉ុង អ៊ិនស៊ី ស៊ីមេន ខបភើរសិន ដែលមានទីតាំងនៅស្រុកបន្ទាយមាស ខេត្តកំពត។

ក្រសួង​បរិស្ថានបានបន្ថែមទៀត​ថា រោងចក្រ​ថ្មី​នេះ​មាន​សមត្ថភាព​អាច​ដុត​កំទេច​សំណល់​ឧស្សាហកម្ម​
ក្នុង​បរិមាណ ១០ តោន​ក្នុង​មួយ​ម៉ោង ឬ ២៤០ តោន​ក្នុង​មួយ​ថ្ងៃ​ ឬ ៧,០០០
តោន​ក្នុង​មួយ​ខែ​។

មួយវិញទៀត គំរោងវិនិយោគរោង​ចក្រ​ដុត​កំទេច​កាកសំណ់​ឧស្សាហកម្មនេះ ជា​ការវិនិយោគ​ទុន​រួម​គ្នា​ រវាង​​ក្រុមហ៊ុន​ ជីប ម៉ុង និង​ក្រុមហ៊ុន ស្យ៉ាម ស៊ីធី ស៊ីមេន មកពី​ប្រទេស​ថៃ ដែលនៅ​ក្នុង​នោះ ទុនវិនិយោគ​ចំនួន ៤០% ជា​របស់​ក្រុមហ៊ុន​ ជីប ម៉ុង និង​ទុនវិនិយោគ​ចំនួន ៦០% ទៀត​បានមកពីក្រុមហ៊ុន​ថៃ ស្យ៉ាម ស៊ីធី ស៊ីមេន​ ។

«យើងបានចំណាយប្រាក់វិនិយោគអស់ជាង៤លានដុល្លារអាមេរិកលើគម្រោងនេះ។ ក្នុងដំណាក់កាលចាប់ផ្តើម គម្រោងមានបុគ្គលិកបម្រើការងារផ្ទាល់ជាង១០នាក់ និង អ្នកម៉ៅការបន្តជាង៥០នាក់ និង បន្តបង្កើតឱកាសការងារបន្ថែមទៀតនៅពេលខាងមុខ» នេះ​ជា​ការលើកឡើង​របស់​លោក​​ឧកញ៉ា លាង ឃុន ម្ចាស់ភាគហ៊ុនធំក្រុមហ៊ុន ជីបម៉ុង អ៊ិនស៊ី ស៊ីមេន ខបភើរេសិន នៅ​ក្នុងពិធីសម្ពោធដាក់ឲ្យដំណើរការជាផ្លូវការ គម្រោង ជីប ម៉ុង Ecocycle ៕

Related Articles