ដោយៈ ទិន សុខាវុធ
រាជរដ្ឋាភិបាល តាមរយៈក្រសួងការងារនិងបណ្តុះបណ្តាលវិជ្ជាជីវៈ
បានសំរេចអនុញ្ញាតអោយជនបរទេស អាចប្រកបមុខរបររកស៊ីនៅកម្ពុជាឡើងវិញ
ក្រោយពីក្រសួងបានចេញសេចក្តីប្រកាសហាមឃាត់មិនអោយជនបរទេសប្រកបមុខរបរចំនួន
១០ មុខរបរ។
ទាក់ទងរឿងនេះ សង្គមស៊ីវិលនិងសហជីពសំដែងក្តីព្រួយបារម្ភ
ពីការបាត់បង់ការងារសំរាប់ប្រជាពលរដ្ឋកម្ពុជា ដោយពួកគេយល់ថា
ជនបរទេសអាចមកដណ្តើមយកការងារពីប្រជាពលរដ្ឋខ្មែរទៅធើ្វ។
ឆ្លើយតបទៅនឹងការព្រួយបារម្ភរបស់អង្គការសង្គមស៊ីវិល លោក ហេង
សួរ អ្នកនាំពាក្យរបស់ក្រសួងការងារ នៅថ្ងៃទី ៧ ខែ តុលា ឆ្នាំ ២០១៩
បានថ្លែងប្រាប់អ្នកសារព័ត៌មានថា សេចក្តីសំរេចរបស់ក្រសួង ត្រូវបានធ្វើឡើង
ដើម្បីឆ្លើយតបទៅនឹងសំណូមពររបស់ក្រុមហ៊ុនសហគ្រាសធំៗ ដែលបានបោះទុនវិនិយោគនៅកម្ពុជា។
លើសពីនេះទៀត យោងតាមសេចក្តីប្រកាសរបស់ក្រសួង
ចេញផ្សាយនៅលើទំព័រ Facebook កាលពីថ្ងៃទី ៥ ខែ តុលា ឆ្នាំ ២០១៩
កន្លងទៅ ដោយសារតែតំរូវការកម្លាំងពលកម្មជំនាញ និងដើម្បីលើកទឹកចិត្តដល់វិនិយោគិនបរទេស
អោយមកវិនិយោគនៅកម្ពុជា ក្រសួងបានសំរេចអោយជនបរទេសអាចប្រកបមុខរបរដែលត្រូវហាមឃាត់ទាំងនោះឡើងវិញ។
កាលពីថ្ងៃទី ២៨ ខែ សីហា ឆ្នាំ ២០១៩ ក្រសួងបានចេញសេចក្តីប្រកាសមួយ
ហាមឃាត់មិនអោយជនបរទេសប្រកបមុខរបរចំនួន ១០ នៅកម្ពុជា
ក្នុងគោលបំណងការពារទីផ្សារការងារសំរាប់ប្រជាពលរដ្ឋខ្មែរ។
មុខរបរដែលត្រូវហាមឃាត់ទាំងនោះរួមមាន អ្នកបើកបរយានជំនិះគ្រប់ប្រភេទ
ជាលក្ខណៈអាជីវកម្ម ការលក់ដូរដោយមធ្យោបាយថ្មើរជើង ឬយានជំនិះគ្រប់ប្រភេទ
ម៉ាស្សា និងចាប់សសៃតាមសាធារណៈ កាត់សក់ អ៊ុតសក់ ថែរក្សាសម្ផស្ស សេវាកម្មដេរ
និងសម្អាតស្បែកជើង ប៉ះកង់ ជួសជុលយានយន្ត កាត់ដេរ ផលិតវត្ថុអនុស្សាវរីយ៍ខ្មែរ
ផលិតឧបករណ៍ភ្លេងខ្មែរ ផលិតបាត្រលោក ព្រះពុទ្ធរូប និងជាងទង
និងជាងច្នៃត្បូងពេជ្រ៕
