We TV Cambodia

រាជរដ្ឋាភិបាលកម្ពុជាផ្តល់ដីសម្បទានសង្គមកិច្ច​ដល់គ្រួសារក្រីក្រគ្មានដីធ្លីចំនួន ៥,០១០ គ្រួសារ

រាជរដ្ឋាភិបាលកម្ពុជាផ្តល់ដីសម្បទានសង្គមកិច្ច​ដល់គ្រួសារក្រីក្រគ្មានដីធ្លីចំនួន ៥,០១០ គ្រួសារ
រូបថតៈ ធនាគារពិភពលោក (The World Bank)

ដោយៈ ទិន សុខាវុធ

យោង​តាម​ធនាគារ​ពិភពលោក (The World Bank) តាម​រយៈ​គំរោង​ផ្តល់ដី​ធ្លីដើម្បី​ការអភិវឌ្ឍ​​សេដ្ឋកិច្ច​និង​សង្គម​ដំណាក់កាលទី ២ (Second Land Allocation for Social and Economic Development Project) ហៅ​កាត់​ថា LASED II រាជ​រដ្ឋាភិបាល​កម្ពុជា បាន​ផ្តល់ដីសំរាប់​សង់​លំនៅដ្ឋាន​និង​ដំណាំ​កសិកម្មចំនួន ១៧,០០០ ហិកតា អោយ​ដល់​គ្រួសារ​ក្រីក្រ​និង​គ្មាន​ដី​ធ្លីចំនួន ៥,០១០ គ្រួសារ​។ លើស​ពី​នេះ​ទៀត ប័ណ្ណ​កាន់កាប់ដីធ្លី​ចំនួន ៣០៧៨ ប័ណ្ណ ក៏​ត្រូវ​បានរាជ​រដ្ឋាភិបាលផ្តល់​ជូន​ប្រជាពលរដ្ឋ​ចំនួន ១,៨២៥ គ្រួសារផង​ដែរ​។

ធនាគារពិភពលោក​បាន​បន្ថែម​ទៀត​ថា គំរោង​នេះ​មាន​ទិសដៅ​ជួយ​ឧបត្ថម្ភ​​គ្រួសារ​កសិករក្រីក្រនៅ​កម្ពុជា អោយ​​មាន​ឱកាស​អាច​ប្រើប្រាស់​ដី​អំណោយ​ទាំងនោះ សំរាប់​ធ្វើការ​ដាំដុះ​ដំណាំ​កសិផល​ទាំងឡាយ ក៏​ដូច​ជា​​ការ​សាងសង់​សាលារៀន​និង​មណ្ឌលសុខភាព ដែល​បំរើ​ផល​ប្រយោជន៍​អោយ​សហគមន៍​​មូលដ្ឋាន​​ដ៏​ទូលំទូលាយ​ផង​ដែរ​​។

មួយវិញទៀត ធនាគារពិភពលោកក៏​​បាន​គូស​បញ្ជាក់​ផង​ដែរ​ថា ការធ្វើ​អោយ​កាន់​តែ​ប្រសើរឡើងទៀត​ នូវការទទួល​បាន​នូវ​ដី​ធ្លី​សំរាប់​ដំណាំ​កសិកម្ម​និង​លំនៅដ្ឋាន គឺ​ជា​ដំណោះស្រាយ​ជា​គន្លឹះ​មួយ នៅ​ក្នុង​កម្មវិធី​អភិវឌ្ឍន៍របស់​រាជ​រដ្ឋាភិបាល​បច្ចុប្បន្ន​​ ដោយ​ហេតុថា ប្រជាជន​កម្ពុជា​ចំនួន ៨០% ជា​កសិករ​រស់​នៅ​ក្នុង​តំបន់​ជនបទ​។

ក៏ប៉ុន្តែ នៅក្នុង​ចំណោម​ប្រជាកសិករ​រស់​នៅ​ក្នុង​តំបន់​ជនបទ​ទាំងនោះ មាន​ប្រជាជន​​ចំនួន​ច្រើនជាង ១០% គ្មាន​ដី​ស្រែ ហើយ​ប្រជាពលរដ្ឋ​ជា​ច្រើនគ្រួសារ​ទៀត កំពុង​ធ្វើ​ការដាំដុះនៅ​លើ​ផ្ទៃ​ដី​ប្រមាណ​ជា ០.៥ ហិកតា ដែល​ជា​ដី​ធ្លី​ត្រូវ​បាន​ចែក​រំលែក​​ពី​ក្រុម​គ្រួសាររបស់​ពួក​គេ​។

ជាលទ្ធផល ផលិតផល​កសិផល​ទទួល​បាន​ពី​ផ្ទៃ​ដី​តិច​ជាង​ ០.៥ ហិកតា​​ទាំងនោះ មាន​ចំនួន​មិន​ដល់ពាក់​កណ្តាល​នៃ​សេចក្តី​ត្រូវការ​​អាហារូបត្ថម្ភ​ដ៏​​ចាំបាច់​សំរាប់​ក្រុមគ្រួសារ​របស់​ពួក​គេ​ផង។ ជារួម ២/៣ នៃ​គ្រួសារ​កសិករ​​រស់​នៅ​ក្នុង​តំបន់​ជនបទ តែងតែ​ជួបប្រទះ​ជារឿយ​ៗ​នូវ​បញ្ហាខ្វះ​ម្ហូប​អាហារ​​ជា​រៀងរាល់​ឆ្នាំ​។

យ៉ាងណាម៉ិញ ​គំរោង​​ផ្តល់ដី​ធ្លីដើម្បី​ការអភិវឌ្ឍ​​សេដ្ឋកិច្ច​និង​សង្គម​ដំណាក់កាលទី ២ ហៅ​កាត់​ថា LASED II នេះ ត្រូវ​បាន​ចូល​រួម​ចំណែក​យ៉ាង​សកម្មពីធនាគារ​ពិភព​លោក​។ ហើយ​ជា​លទ្ធផល នៅ​ចន្លោះ​ឆ្នាំ ២០១៦​ និង ឆ្នាំ ២០១៩​ ផ្ទៃ​ដី​ចំនួន ១៧,០០០ ហិកតា ត្រូវ​បានផ្តល់​អោយ​ដល់គ្រួសារ​ក្រីក្រចំនួន ៥,០១០ គ្រួសារ​ សំរាប់​ដាំ​ដំណាំ​កសិកម្ម​និង​សង់​លំនៅដ្ឋាន​។ ហើយ​ប័ណ្ណ​កម្មសិទ្ធិ​ដីធ្លី​ចំនួន ៣,០៧៨ ប័ណ្ណ​ក៏​ត្រូវ​បាន​ផ្តល់​ជូនប្រជាពលរដ្ឋ​ចំនួន ១,៨២៥ ៕

Related Articles