We TV Cambodia

៣ ឆ្នាំចុងក្រោយ កម្ពុជាទទួលបានគំរោងវិនិយោគសរុប $22.5 ពាន់លានដុល្លារ

រូបថតៈ Fresh News

ដោយៈ ទិន សុខាវុធ

នៅ​ក្នុង​សន្និសីទ​សារព័ត៌មានមួយ កាល​ពី​ថ្ងៃ​ទី ១០ ខែ តុលា ឆ្នាំ ២០១៩ នៅ​ឯវិមាន​សន្តិភាព ដែល​ត្រូវ​បាន​រៀបចំ​ឡើង​ដោយ​ក្រុម​អ្នកនាំពាក្យ​របស់​រាជ​រដ្ឋាភិបាល លោក ជា វុទ្ធី ​ដែល​ជា​អគ្គលេខាធិការរង​នៃ​គណកម្មាធិការ​វិនិយោគ​កម្ពុជា របស់​ក្រុមប្រឹក្សាអភិវឌ្ឍន៍​កម្ពុជា ហៅកាត់ថា CDC បាន​ថ្លែង​ប្រាប់​អ្នកសារព័ត៌មានថា គិត​ចាប់តាំង​ពី​ឆ្នាំ ២០១៦ មក​ដល់ខែ​ សីហា ឆ្នាំ ២០១៩ CDC បានចុះបញ្ជីគំរោងវិនិយោគចំនួន ៨៣១ គំរោង សរុប​ទុនវិនិយោគ​ប្រមាណជា​ជាង $22.5 ពាន់​លាន​ដុល្លារ​។

«នៅក្នុងវិស័យវិនិយោគ កម្ពុជាក៏សម្រេចបាននូវលទ្ធផលយ៉ាងល្អប្រសើរ ដោយគិតតចាប់តាំងពីឆ្នាំ២០១៦ មកដល់ខែសីហា ឆ្នាំ២០១៩ ក្រុមប្រឹក្សាអភិវឌ្ឍន៍កម្ពុជា បានសម្រេចឯកភាពលើគម្រោង វិនិយោគចំនួន ៨៣១គម្រោង ដែលមានទុនវិនិយោគសរុបប្រមាណជាង ២២,៥ប៊ីលានដុល្លារអាមេរិក» នេះ​ជាការលើកឡើងរបស់​លោក ជា វុទ្ធី ។

លោក​បាន​បន្ថែម​ថា ដោយ​មាន​សុខ​សន្តិភាព និងស្ថេរភាព​នយោបាយ​យ៉ាង​ពេញបរិបូណ៍​ក្នុង​ផ្ទៃ​ប្រទេស ក្នុង​កំឡុង​ពេល​ជាង​ពីរ​ទស្សវត្ស​ចុង​ក្រោយ​នេះ កំណើន​សេដ្ឋកិច្ច​កម្ពុជា​ស្ថិត​ក្នុង​រង្វង់ ៧.៧ ភាគ​រយ​ក្នុ​ង​មួយ​ឆ្នាំ​។ កត្តា​នេះ​បានធ្វើអោយ​កម្ពុជា​ឆ្លងផុត​ពីឋានៈជា​ប្រទេស​មាន​ចំណូល​ទាប ទៅ​ជា​ប្រទេស​មាន​ចំណូល​មធ្យម​កំរឹត​ទាប ក្នុង​ឆ្នាំ ២០១៥ ។

លោក ជា វុទ្ធី បាន​គូស​បញ្ជាក់​ថា៖ «គិតត្រឹមខែសីហា ឆ្នាំ២០១៩ នេះ តំបន់សេដ្ឋកិច្ចពិសេសដែលកំពុងមានប្រតិបត្តិការមានចំនួន ២៣តំបន់ ក្នុងនោះមានគម្រោងវិនិយោគចំនួន ៤៨២គម្រោង ដែលមានទុនវិនិយោគប្រមាណជាង ៣,៦ប៊ីលានដុល្លារអាមេរិក ហើយទំហំនៃការនាំចេញដែលមានប្រភពចេញពីតំបន់សេដ្ឋកិច្ចពិសេសមានប្រមាណ ១៥%នៃទំហំនាំចេញសរុប របស់ព្រះរាជាណាចក្រកម្ពុជាក្នុងឆ្នាំ២០១៨»។

យោង​តាម​មន្ត្រី​ CDC រូប​នេះ គិតចាប់​ពី​ឆ្នាំ ២០១៦ ដល់​ខែ​ សីហា ឆ្នាំ ២០១៩ គំរោង​វិនិយោគលេចធ្លោ​ជាង​គេ គឺ​គំរោង​វិនិយោគ​ក្នុង​វិស័យ​ទេសចរណ៍ ដែល​មាន​ប្រមាណជា ៤៧ ភាគរយ​នៃ​ទំហំ​វិនិយោគ​សរុប​។ នៅ​សល់​ពី​នោះ គឺ​ជា​គំរោង​វិនិយោគ​ក្នុង​វិស័យ​ហេដ្ឋារចនា​សម្ព័ន្ធ​ ដែល​មានប្រមាណ​ជា ២៤ ភាគ​រយ​ គំរោង​វិនិយោគ​ក្នុង​វិស័យ​ឧស្សាហកម្ម​និង​កម្មន្តសាល មានប្រមាណជា ២៣ ភាគរយ ចំណែកឯ​​គំរោង​វិនិយោគ​​ក្នុង​វិស័យ​កសិកម្មនិង​កសិ-ឧស្សាហកម្ម មានប្រមាណជា ៦ ភាគរយ​៕

Related Articles