We TV Cambodia

រដ្ឋបាល​ខេត្ត​កំពង់​ស្ពឺ​គ្រោង​សង់​ស្ពាន​អាកាស​ថ្មើ​ជើង ២ ថែម​ទៀត

រដ្ឋបាល​ខេត្ត​កំពង់​ស្ពឺ​គ្រោង​សង់​ស្ពាន​អាកាស​ថ្មើ​ជើង ២ ថែម​ទៀត

ដោយៈ ទិន សុខាវុធ

ក្រោយ​ពី​បាន​សម្ពោធ​ដាក់​អោយ​​ប្រើប្រាស់​នូវ​ស្ពាន​អាកាស​ថ្មើជើង​ដំបូង​បំផុត​ក្នុង​ក្រុង​កំពង់ស្ពឺ កាល​ពី​ចុង​ខែ​ធ្នូ​ឆ្នាំ ២០១៩ កន្លង​ទៅ​ រដ្ឋបាល​ខេត្ត​នេះ​បាន​បង្ហើប​អោយ​ដឹង​ពី​គំរោង​សាងសង់​ស្ពាន​អាកាស​ចំនួន​ពីរថែម​​ទៀត ក្នុ​ង​គោល​បំណង​ជួយ​សំរួល​ដល់​ការធ្វើដំណើរ​ឆ្លង​កាត់​ផ្លូវ​ ប្រកប​ដោយ​សុវត្ថិភាព​របស់​ប្រជាពលរដ្ឋ​​នៅ​ក្នុង​ក្រុង​​កំពង់​ស្ពឺ​​។

យោង​តាម​លោក​ វី សំណាង អភិបាល​ខេត្ត​កំពង់ស្ពឺ អនាគត​ស្ពាន​អាកាស​ទាំងពីរ​នោះ នឹង​មិន​ត្រូវ​សង់​ឡើង​ដោយ​ប្រើប្រាស់​ថវិកា​ជាតិ​ឡើយ​។ ផ្ទុយ​ទៅ​វិញ រដ្ឋបាល​ខេត្ត​របស់​លោក​​​​នឹង​ខិតខំ​ធ្វើ​យ៉ាងណាគៀង​គរ​ហិរញ្ញប្បទាន​ពី​វិស័យឯកជន​ឬ​សប្បុរស​ជន​ ដូច​ជា​ការ​សង់​ស្ពាន​អាកាស​ទី​មួយ​នោះ​​ដែរ​។

លោក​​អភិបាល​ខេត្ត​​បាន​អោយ​ដឹង​ទៀត​ថា ការសំរេច​ចិត្ត​សង់​ស្ពាន​អាកាស​ថ្មី​​ចំនួន​ ២ ថែម​ទៀត​នេះ គឺ​ដោយ​​ហេតុថា​អ្នក​វិនិយោគ​ធំ​ៗ​ជាច្រើន​បាន​សំរេច​ចិត្ត​មក​សង់​រោង​​រោងចក្រ​និង​​សហគ្រាស​ជា​ច្រើន​​​នៅ​ក្នុង​ខេត្ត​របស់​លោក ដែល​ជា​ប្រការ​ធ្វើ​អោយ​កម្មករ​​កម្មការិនី​ជា​ច្រើននាក់​​ ក៏​បាន​មក​ធ្វើការ​និង​តាំង​លំនៅដ្ឋាន​​នៅ​ក្នុង​ខេត្ត​របស់​លោក​​ផងដែរ​។ អាស្រ័យហេតុនេះ ដើម្បី​ដោះ​ស្រាយ​បញ្ហា​ចរាចរណ៍ និង​ដើម្បី​រក្សា​សុវត្ថិភាព​ដល់​ការ​ដើរ​ឆ្លង​កាត់​ផ្លូវ​​របស់​កម្មករកម្មការិនី ​ក៏​ដូច​ជា​ប្រជាពលរដ្ឋ​នៅ​ក្នុង​ក្រុង​កំពង់ស្ពឺ រដ្ឋបាល​​ខេត្ត​​របស់​លោក​ក៏​​បាន​អនុម័តជា​ឯកច្ឆន្ទ ​សាង់​សង់​ស្ពាន​អាកាស​ថ្មើជើង​​ចំនួន ២ ថ្មី​ទៀត គឺ​មួយ​​ស្ថិត​នៅ​ក្នុង​ក្រុង​​​ច្បារមន និង​មួយ​ទៀត​ស្ថិត​នៅ​ក្នុង​ស្រុក​សំរោង​ទង​។

ជាក់ស្តែង លោក វី សំណាង ​បាន​គូស​បញ្ជាក់​ថា រហូត​មក​ដល់​ពេល​បច្ចុប្ប​ន្ន​នេះ សហគ្រាស​ធុន​តូច​និង​មធ្យម​ចំនួន ២៧០ ត្រូវ​បាន​បង្កើត​ឡើង​នៅ​ក្នុង​ខេត្ត​របស់​លោក ដែល​ជា​ប្រការ​ធ្វើ​អោយ​ការងារ​ចំនួន​ជាង ១៣ ម៉ឺន​កន្លែង​ត្រូវ​បាន​បង្កើត​ឡើង​​សំរាប់​កម្មករ​/កម្មការិនី​មក​ពី​គ្រប់​ទិសទី។ ជាលទ្ធផល ​ប្រាក់​ខែ​សរុប​ប្រមាណ​ជា $33 លាន​ដុល្លារ​​ក្នុង​មួយ​ខែ​ ត្រូវ​បាន​បើក​អោយកម្មការ/កម្មការិនី​​ទាំង​នោះ​៕

Related Articles